خودان پێدڤیه‌كی تایبه‌ت پێدڤی ب چاڤدێریێ یه
ئامێدیێ، مه‌حمود نهێلی
سه‌یفه‌دین كه‌سه‌كی خودان پێدڤیێن تایبه‌ته خه‌لكێ رۆژئاڤایێ كوردستانێ و په‌نابه‌ره ل دێره‌لۆكێ ئاكنجی یه، د خانیه‌كی بێ سه‌روبه‌ر و سر و سار دا دژیت، شیانێن كاری و رێڤه‌برنا خوه نینه و ژلایێ ده‌روونی ڤه ژی یێ دروست نینه. ژ به‌ر كو ناڤبری ژلایێ جه‌سته‌یی و ده‌رونی ڤه یێ دروست نینه كه‌س و كارێن وی نه‌شێن ب دروستی چاڤێ خوه بده‌نێ و دبێژن ئه‌ڤه پێدڤی ب چاڤدێریێ هه‌یه.
كازم نهێلی ئاكنجییێ دێره‌لۆكێ بو رۆژناما ئه‌ڤرۆ دیار كر، ئه‌ڤ كه‌سه خه‌لكێ رۆژئاڤایێ كوردستانێ یه و ره‌وشا وی گه‌له‌گا خرابه، ژ به‌ر كو شیانێن جه‌سته‌یی و هه‌روه‌سا یێن ئاخفتنێ نین و نه‌شێت چ كارا بكه‌ت و ب رێكا نڤێسینێ پێدڤیێن خوه داخاز دكه‌ت و گۆت: ئه‌م وه‌ك چه‌ند گه‌نجێن دێره‌لۆكێ رابووینه ب سه‌رۆبه‌ركرنا خانیێ وی و هه‌ره‌وسا دابینكرنا هند كه‌ره‌ستێن خارنێ و یێن نڤستنێ.
موسلح نێروه‌ی كه‌سه‌كی دی یه كو ب كارێ خێرخازی رابوویه دیار كر، ئه‌ڤه پێدڤی ب چاڤدێریێ هه‌یه و نه‌شێت خوه چایه‌كی ژی بو خوه چێكه‌ت و كه‌س نه‌شێت به‌رده‌وام چاڤدێریا وی بكه‌ت ژ به‌ر وێ یه‌كێ ئه‌و پێدڤی ب چاڤدێریه‌كا تمام هه‌یه ژلایێ حكومه‌تێ ڤه و گۆت: ئه‌ڤی كه‌سی خارن دڤێت شوشتن دڤێت پاقژكرنا رۆژانه دڤێت ئه‌ڤی مروڤی زیندان پێ خوه‌شتره كو ل ڤێرێ بیت.
موقه‌دم غازی عزت رێڤه‌به‌رێ ناحیا دێره‌لۆكێ بو رۆژاناما ئه‌ڤرۆ دیاركر، وان وه‌ك رێڤه‌به‌ریا ناحیێ سه‌ره‌دانا ڤێ خێزانێ كریه كو پێكدهێت ژ دایكه‌كا بێ چاره و هه‌روه‌سا كوره‌كێ خودان پێدڤیێن تایبه‌ت و دان عه‌مر و گۆت: ئه‌م دێ ژلایێ خوه ڤه هند كه‌ره‌سته‌یان بۆ دابینكه‌ین و كه‌ل په‌لێن خارنێ و ڤه‌خارنێ، هه‌روه‌سا نڤینكان و ته‌كه‌ست ژی كر، دێ بزاڤێ كه‌ن ل گه‌ل رێكخراوێن تایبه‌تمه‌ند ڤه كاره‌كێ بۆ ڤی كه‌سی بكه‌ن هه‌روه‌سا رێڤه‌به‌ریا چاڤدێریا جڤاكی ژی ل سه‌ر بابه‌تێ وی هاتیه ئاگه‌هدار كرن بو وێ یه‌كێ هه‌كه بشێن جهه‌كی ڤه‌حواندنا بو بهێته دابینكرن.
كاركه‌ر عه‌بدولله رێڤه‌به‌رێ چاڤدێری و گه‌شه‌پێدانا جڤاكی ل ئامێدیێ بۆ رۆژناما ئه‌ڤرۆ دیاركر، وان ژی ب فه‌ردیت سه‌ره‌دانا ڤێ خێزانێ بكه‌ن بۆ وێ یه‌كێ بشێن ئاریشا وان بۆ چاره‌سه‌ر بكه‌ن و گۆت: مه راپورته‌ك ل سه‌ر به‌رهه‌ڤكریه و مه بۆ جهێن بلند فرێكریه بۆ وێ یه‌كێ هه‌ر رێیه‌كا هه‌بیت بشێن هاریكاریا ڤێ خێزانێ بهێته كرن، ب تایبه‌تی ژی هه‌كه دشیان دابیت ئه‌ڤ هه‌ردو كه‌سه كو كه‌س چاڤێ خوه ناده‌تێ ل جهێ ڤه‌حه‌واندنا دانعه‌مران بهێنه ب خودان كرن.
