خورماتۆ: سێ هاون ب تاخێن كوردان كه‌فتن و بريندار و زيانێن ماددى يێن هه‌ين
ئه‌ڤرۆ نيوز:
سێ گولێن هاونى ب تاخه‌كێ كوردى ل خورماتۆ كه‌فتنه خوار و بريندار و زيانێن ماددى ژى ل پشت خوه هێلان.
ب گۆره‌يى پێزانينێن ل به‌ر ده‌ست ئه‌ڤرۆ رۆژا پێنجشه‌مبى 23ى ته‌باخا 2018ێ سێ گولێن هاونى ب تاخێن كوردنشين يێ ئيمام ئه‌حمه‌د و عه‌سكه‌رى ل ناڤه‌راست و خوارا خورماتۆ كه‌فتنه خوار.
ژ ئه‌نجامێ كه‌فتنه خوارا سێ گولێن هاونى، كه‌سه‌ك بريندار بوويه و زيانێن ماددى يێن زێده ژى ب وان جهان كه‌فتينه.
پشتى خيانه‌تا 16ى ئوكتۆبه‌رێ ل سالا بۆرى و راده‌ستكرنا ده‌ڤه‌رێ ب ده‌ستێ حه‌شدا شه‌عبى خه‌لك ئاواره بوون و ژماره‌كا زۆر يا خانوو و مالێن وه‌لاتيان ژى هاتنه تالانكرن و سۆتن.
