خەلكێ دهۆكێ گەلەك گرنگیێ ب ساخلەمیا خۆ ددەن
سندس سالح سلێڤانەیی
شارەزایەكا گیا و دەرمانێن سرۆشتی ب ناڤێ (نیدا ئەلموئمنی) كو ژ وەلاتێ (ئوردن) ێ هاتیە و ئێك ژ پشكدارێن فێستیڤالا بازاڕگەڕییا مسری یە، ئەوا بەری چەند رۆژان ل پارێزگەها دهۆكێ هاتیە ڤەكرن، د دیدارەكێ دا بۆ رۆژنامەیا ئەڤرۆ گۆت: ژبەر حەزژێكرنا من یا زێدە بۆ كوردان ئەز هاتیمە پارێزگەها دهۆكێ و من هژمارەكا زۆرا جۆرێن (سابینان) كو ب گیایێن سرۆشتی هاتینە چێكرن، پشكداری دڤێ فێستیڤالێ دا كریە، ل وەلاتێ من (ئوردن) بەرهەمێن مە ناڤودەنگیا خۆ هەیە و مە (3) تا ڤەكرینە، هەروەسا ل ئیراقێ ژی مە بریكارێ خۆ یە و د پتری (10) پێشانگەهان پشكداربووینە و دێ د بەردەوام بین.
هەروەسا گۆت: بەری بهێمە ڤێ فێستیڤالێ ئەز ل هەولێرێ بووم، فێستیڤالەك هەبوو، لێ ئەوا ڕاستی بیت فرۆتنا بەرهەمێن مە یا كێم بوو، لەورا دەمێ من گۆتی دێ چمە دهۆكێ گۆتنە من نەچە دێ ل وێرێ خرابتر بیت، لێ من بڕیارا خۆ دا و ئەز هاتم پشكداربووم و هەر ژ رۆژا ئێكێ داخوازی ل سەر بەرهەمێن من هەبوو، هەروەسا ل رۆژێن دووڤدا ژی پتر داخوازی هاتن و من ب خۆ ئەڤ چەندە باوەرنەدكر كو دێ بڤی ڕەنگی داخوازی ل سەر بەرهەمێن من هەبن، لێ بۆ من دیاربوو كو خەلكێ دهۆكێ د ڕەوشەنبیرن و گەلەك گرنگیێ ساخلەمیا خۆ ددەن، چنكو هەر زوو باوەری ب بەرهەمێن مە ئینا، هەروەسا بۆ من دیاربوو بكرێن بەرهەمێن مە هەموو خودان ڕەوشتەكێ باشن و ئاخفتن و سەردەری و رەفتارێن وان دگەل مە جهێ رێزێ نە.
