داخواز ژ وەلاتیێن ھەرێمێ دھێتەکرن سەردانا ڤێ پارێزگەھێ نەکەن
ئەڤرۆ:
ئەندامەکێ لژنا ئاسایش و بەرەڤانیێ ل جڤاتا نوونەرێن عیراقێ د داخوەیانیەکا رۆژنامەڤانی دا دیار کر کو دیاردا رەڤاندنا وەلاتیان د ناڤ باژێرێ بەغدا دا و ل رێیا سەرەکی یا دناڤبەرا بەغدا و دەڤەرێن کوردستانی یێن دەرڤەی ئیدارا ھەرێما کوردستانێ بەرەڤ زێدەبوونێ یە، ژبەر ڤێ چەندێ داخوازێ ژ وەلاتیێن ھەرێما کوردستانێ دکەت سەرەدانا بەغدا نەکەن.
ھشیار عەبدوللا، ئەندامێ لژنا ئاسایش و بەرەڤانیێ ل جڤاتا نوونەرێن عیراقێ ئاشکرا کر کو ل دووڤ وان ئامارێن نە فەرمی یێن ب دەست لژنا وان کەفتین ل دەستپێکا مەھا ئیلۆلا ئەڤ سالە و ھەتا نوکە ٤٠ کەس د ناڤ باژێرێ بەغدا و ٨٠ کەس ل سەر رێیا دناڤبەرا کەرکۆکێ و دەڤەرێن ڤەقەتیایی ژ بەغدا ھاتینە رەڤاندن و د ناڤ وان کەسان دا کورد و تورکمان ژی ھەبوون، بەلێ ل دووڤ پێزانینێن ب دەست وان کەفتین ھژمارە کەسێن رەڤاندی ژ یا ئامارا پترە و گۆت:” بەرپرسێن حکومی ژی د ناڤ وان کەسێن ھاتینە رەڤاندن دا ھەنە و ئێک ژ وان کەسان بریکارێ وەزیرێ داد یێ حوکمەتا عیراقێ یە”.
