ده‌رمانسازه‌ك:خوارنا ده‌رمانان بێ نوشدار ڤێ كاره‌ساتێ په‌یدا دكه‌ت
ئه‌ڤرۆنيوز:
وه‌رگرتنا هه‌ر جۆره ده‌رمانه‌كى و خوارنا وى ژ لایێ خه‌لكى ڤه بوویه دیارده‌یه‌كا ئاسايى و هه‌ر جۆره‌كێ ده‌رمانى مرۆڤ ب ساناهى دشێت ل ده‌رمانخانه‌يان وه‌ربگریت و ب كار بینیت و ئه‌ڤ چه‌نده ژ لایێ ساخله‌میێ ڤه گه‌له‌ك یا مه‌ترسیداره و نوشدار دیاردكه‌ن كو خوارنا ده‌رمانان بێ ئاگه‌هیا نوشدارى ئه‌گه‌رێ په‌يدابوونا چه‌ندین نه‌خوه‌شیانه .
دیار تاهر ره‌جه‌ب، ده‌رمانساز و سه‌رۆكێ پشكا ده‌رمانخانێ ل نه‌خوه‌شخانا ئازادى بۆ نوش نیوز گۆت” دیاردا خوارنا ده‌رمانان بێ ئاگه‌هیا نوشدارى يا بوویه دیارده‌یه‌كا به‌ربه‌لاڤ ل سه‌رانسه‌رى هه‌رێما كوردستانێ و دهۆكێ و ئه‌ڤ چه‌نده ئه‌گه‌ره بۆ دروستبونا چه‌ندین نه‌خوه‌شیان، چونكى ب چو ره‌نگه‌كێ نابیت و دروست نینه چ كه‌س بێ ئاگه‌هیا نوشدارى ده‌رمانان ژ ده‌رمانخانان وه‌ربگریت و بكاربینیت”.
ديارى گوت ژى” ب چ ره‌نگه‌كێ نابیت ده‌رمانێن دژى هه‌وركرنێ(نه‌خوه‌شیێن ئیلتیهاباتا) بێ ئاگه‌هیا نوشدارى بهێنه خوارن و مه‌زنترین خرابی ئه‌وچه‌نده یه خه‌لكێ مه فێربویه هه‌ر ده‌مێ په‌رسیڤ و نه‌خوه‌شیه‌ك هاتێ بله‌ز قه‌ستا برینپێچه‌كێ دكه‌ن و دو شرینقا تێكهه‌لى ئێك دكه‌ن و بۆ خوه ددانن، لێ ئه‌وچه‌نده ئه‌گه‌ره بۆدروستبونا چه‌ندین نه‌خوه‌شیان و هه‌رده‌م نه‌خوه‌شیا په‌رسیڤى دناڤ مه دا یا زێده و بهێزه چونكه ئه‌گه‌ر تێكهه‌لكرنا دوشرینقا مفا بو مرۆڤى هه‌با، دا كۆمپانیا ده‌رمانان هه‌ردو شرینقا تێكهه‌لى ئێك كه‌ن نه‌كو برینپێچ”.
ناڤبرى ئه‌و چه‌نده ژى دا دیاركرن” ده‌رمانخانان مافێ فرۆتنا هه‌مو جۆرێن ده‌رمانان نینه، لێ ل كوردستانێ بتنێ ئه‌و ده‌رمانه نه‌بن ئه‌وێن بۆ نه‌خوه‌شیێن سه‌ر ئێشێ دهێنه بكارئینان” .
