ده‌ڤه‌رداریا ئاكرێ پلانا نه‌ورۆزا ئه‌ڤ ساله راگه‌هاند
ئاكرێ، ره‌مه‌زان زه‌كه‌ریا:
ده‌ڤه‌ردارێ ئاكرێ د كۆنگره‌یه‌كێ رۆژنامه‌ڤانی دا پلانا جه‌ژنا نه‌ورۆزا ئه‌ڤ ساله راگه‌هاند، كو بڕیاره ئاگر بهێنه هه‌لكرن و خه‌تیر بهێنه بلندكرن و ل گه‌ل چه‌ندین یاریێن دی، به‌لێ ژ به‌ر مه‌ترسیا یاریێن ئاگری، رێك ب وه‌لاتیان ناهێته دان بچنه سه‌رێ گری.
مازن محه‌مه‌د سه‌عید، ده‌ڤه‌ردارێ ئاكرێ د كۆنگره‌یه‌كێ رۆژنامه‌ڤانی دا گۆت: “د دو سالێن بۆری دا، ژ به‌ر ڤایرۆسێ كۆرۆنایێ چو رێوره‌سمێن فه‌رمی ل ئاكرێ بۆ جه‌ژنا نه‌ورۆزێ نه‌هاتبوونه ئه‌نجامدان، به‌لێ ئه‌ڤ ساله بڕیاره چه‌ندین رێوره‌سم بهێنه ئه‌نجامدان”.
ده‌ڤه‌ردارێ ئاكرێ ئاشكرا ژی كر، سالانه كۆمپانیا ئێم ئار ئێف یا پاقژكرنێ ل هه‌رسێ ده‌ڤه‌رداریێن ئاكرێ و به‌رده‌ڕه‌ش و شێخان سپۆنسه‌ریا رێوره‌سمێن كه‌رنه‌ڤالا ئاگرێ نه‌ورۆزێ ل ئاكرێ دكه‌ت و گۆت: “ئه‌ڤ ساله ژی بڕیاره هه‌ر ئه‌و كۆمپانی ل سه‌ر ئه‌ركێ خوه رێوره‌سمێن جه‌ژنا نه‌ورۆزێ ل ئاكرێ ب هه‌ڤكاریا دام و ده‌زگه‌هێن ده‌ڤه‌ردارییا ئاكرێ و ده‌زگه‌هێن ئه‌منی ئه‌نجام بده‌ت”.
ناڤبری خویا ژی كر كو ل چه‌ندین جهێن ئاكرێ ئاگر دێ هێنه هه‌لكرن و خه‌تیر ل سه‌رێ گری بۆ كه‌لا ئاكرێ دێ هێنه بلندكرن ب رێوره‌سم وه‌ك سالێن بۆری و گۆت: “به‌لێ ژ به‌ر پاراستنا گیانێ وه‌لاتیان رێك ب وان ناهێته دان بچنه سه‌رێ گری، ژ به‌ركو ئه‌و كۆمپانیا كو سه‌رپه‌رشتیا یاریێن ئاگری دكه‌ت، ئاشكرا كریه، كو پێدڤیه ژ به‌ر مه‌ترسیا هێزا یاریێن ئاگری وه‌لاتی نزیكی وی جهی نه‌بن، داكو گیانێ وان یێ پاراستی بیت”.
دیسا دوهی 12/3/2022 رێڤه‌به‌ریا ره‌وشه‌نبیری و هونه‌رییا ئاكرێ ب هه‌لكه‌فتا 31 سالیا سه‌رهلدانا ده‌ڤه‌ردارییا ئاكرێ چه‌ندین چالاكی ئه‌نجامدان و ئه‌و بیره‌وه‌ری ساخكره‌ڤه.
كاوه زهێر، رێڤه‌به‌رێ ره‌وشه‌نبیری و هونه‌ری ل ئاكرێ بۆ ئه‌ڤرۆ گوت: “ب هه‌لكه‌فتا 31 سالیا سه‌رهلدانا ئاكرێ چه‌ندین چالاكی هاتنه ئه‌نجامدان، كو ده‌ربڕین ژ سه‌رهدانا ئاكرێ دكرن”.
سه‌باح به‌یتوللا، به‌رپرسێ لقێ نه‌هـ یێ پارتی دیموكراتی كوردستان ل ئاكرێ د په‌یڤه‌كێ دا ب هه‌مان هه‌لكه‌فت گۆت: “سه‌رهلدان وه‌رچه‌رخانه‌كا دیرۆكی بوو و ب فه‌لسه‌فه‌یا سیاسی یا كوردان هاته بناڤكرن و شیا ده‌نگێ میلله‌تێ مه ئێك بێخیت و میلله‌تێ مه به‌ره‌ڤ سه‌نگه‌رێن ئازادیێ و رزگاریێ ببه‌ت ل دژی داگیركه‌ران”.
