دو گوندێن کەفتینە بەر بۆمبەکرنا فرۆکێن تورکیا ھاتنە قەرەبووکرن
ئەڤرۆ نیوز:
ئەندامەکێ پەرلەمانێ عیراقێ دیارکر کو حوکمەتا عیراقێ پشکەک ژ قەرەبوویا گوندێن بنارێ قەندیلی کو کەفتبوونە بەر بۆمبەبارانکرنا فرۆکێن شەری یێن تورکیا و زیان گەھشت بوونێ قەرەبووکرن.
سیروان سرێنی، ئەندامێ پەرلەمانێ عیراقێ ل سەر فراکسیۆنا پارتی دیموکراتی کوردستان بۆ ئەڤرۆ ئاشکرا کر، د دەمێ بۆری دا فرۆکێن شەری یێن تورکیا چەند گوندەکێن بنارێ قەندیلی ب ھێجەتا لێدانا بارەگەھێن پەکەکێ بۆمبەبارانکربوون و زیانیچن گیانی و ماددی گەھشت بوونێ و گۆت: “مە راپۆرتەک ل سەر وان زیانان بەھەڤکر و بۆ پەرلەمان و حوکمەتا عیراقێ، حوکمەتا ھەرێمێ و تورکیا بلندکربوو کو بھێنە قەرەبووکرن، نوکە حوکمەتا عیراقێ ب رێیا وەزارەتا کۆچ و کۆچبەران ملیۆن دینار بۆ ھەر خێزانەکا زیانڤێکەفتیێن گوندێن زارگەلێ و گریسکان یێن بنارێ قەندیل وەکو قەرەبووکرن مەزاختن، بەلێ ب چ رەنگەکی ئەڤە ل دووڤ زیانێن ماددی و گیانیێن وان گوندان نینە”.
خویا ژی کر، نێزیکێ 100 خێزانێن چەند گوندەکێن بنارێ قەندیلی ژ ئەنجامێ بۆمبەبارانکرنا فرۆکێن شەری یێن تورکیا و زانێن گیانی و ماددی پێگەھشت بوون و گۆت: “ھندەک خێزانان سێ شەھید و بریندار ھەنە و د ھەمان دەم دا خانیێ وان ژی ژناڤچوویە، لەو ب ملیۆنەکێ ناھێنە قەرەبووکرن، ب ھزرا من حوکمەتا عیراقێ دڤی دەمی دا نەشێت قەرەبوویا گوندێن زیانڤێکەفتی بکەت ، ھەروەسا دخوازین ئەو خانیێن ھاتینە خرابکرن ژی ژ زڤراندنا پێشینێ بۆ حوکمەتێ بھێنە لێبۆرین”.
ل 24 تەمووزا ئەڤ سالە و پشتی تێکچوونا پرۆسا ئاشتیێ د ناڤبەرا کوردستانا باکوور و حکومەتا تورکیێ دا، چەند گوند و دەڤەرێن جودا یێن باشوورێ کوردستانێ ژ لایێ فرۆکێن تورکیا ب بھانەیا ھەبوونا بارەگەھێن پەکەکێ ھاتبوونە بۆمبەبارانکرن و زیانێن گیانی و ماددی ب وەلاتیێن وان دەڤەران گوھشت بوون.