دۆستەكێ ژینگەهێ ڕووەك و گیایێن سروشتی ئەرشیف دكەت
ب مەرەما پاراستنا سروشت و ژینگەها كوردستانێ چالاكڤان و ڤەكۆلەرەكێ ژینگەهێ ب خۆبەخشانە دەست ب پڕۆژەیەكێ كریە كو ژ تۆماركرن و نڤیسینا ناڤێن ڕووەك و گیایێن سروشتی ل دەڤەرا مزووری بالا ل سنوورێ پارێزگەها دهۆك و هەولێرێ كرییە.
ڕێكار مزووری، چالاكڤان و خودانێ پڕۆژەی بۆ ئەڤرۆ گۆت: مە هەست پێكریە كو ناڤێن پتریا وان گول و گیایێن سروشتی بەرەف بەرزەبوونێ دچن، لەورا پاراستنا ناسنامەیا سروشتی و كلتۆری یا دەڤەرێ بوو ئەگەر كو ڤی كاری ئەنجام بدەم و پڕۆژە بتنێ ناساندنا ناڤان ب خۆڤە ناگریت، بەلكو لایەنێن زانستی و مفایێن وێ یێن ساخلەمیێ و گرنگیا وان یا ژینگەهی ژی دۆكیۆمێنت دكەم، بۆ كۆمكرنێ پشت ب دو لایەنێن سەرەكی دكەم، ئێك گەڕیانێن مەیدانی و وێنەگرتنا ڕووەكان د ناڤ شاخ و چیایێن مزووری بالا دا، یا دویێ مفا وەرگرتن ژ ئەزموونا جۆتیار و كەسێن شارەزا یێن دەڤەرێ بۆ نیشادانا ناڤێن ڕەسەن و چەوانیا بكارئینانا گیایێن دەرمانی.
هەروەسا گۆت: پێزانیێن كۆمكری وەك ئەمانەتەكێ زانستی ڕادەستی راگری پەیمانگەها مێرگەسۆر كرینە داكو د داهاتی دا كار بۆ دروستكرنا كۆمەكا گیایێن هشكـكـری بۆ قوتابی و ڤەكۆلەران بكەت، هەروەسا ئەرشیف دێ بیتە ژێدەرەكێ گرنگ بۆ گەشەپێدانا گەشتیاریا ژینگەهی ل دەڤەرێ، ئەڤ ئەرشیفە پتر ژ (75) جۆرێن ڕووەك و فیقیێ سروشتی ب خۆڤە دگریت كو خەلك وەك خارن یان دەرمان بكار دئینن، و بڕیارە ئەڤ كارێ مەیدانی د پەرتووكەكا وێنەدار و ئەرشیفەكا دیجیتالی دا بهێتە بەلاڤكرن دا كو ببیتە ژێدەرەكێ بەردەوام بۆ زانكۆیان و د پلان دایە ڤی پڕۆژەی پتر بەرفرەهـ بكەم و سەرانسەری دەڤەرێن دی یێن هەرێما كوردستانێ ڤەگریتەڤە.
