دیدارێن سەرۆكێ هەرێما كوردستانێ ل گەل سەركردەیێن وەلاتێن جیهانێ ل كۆنفرانسێ ئاسایشێ ل میونشن
ئەڤرۆ
ل ڕۆژا ئەینی 17/2/2023 نێچیرڤان بارزانی، سەرۆكێ هەرێما كوردستانێ ب داخوازنامەیەكا فەرمی بۆ پشكداریێ د كۆنفرانسێ ئاسایشێ ل میونشن گەهشتبوو ئەلمانیا.
نێچیرڤان بارزانی ل گەل سەرۆك و سەركردەیێن وەلاتێن جیهانێ، پشكداری د دیدار و دانوستاندنێن تایبەت ب بوارێ ئاسایشێ و سەقامگیریێ دكەت كو ئەو كۆنفرانسە بۆ دەمێ سێ ڕۆژان دێ بەردەوامبیت.
سەرۆكێ هەرێما كوردستانێ، نێچیرڤان بارزانی و سیلیست والاندەر، هاریكارێ وەزیرێ بەرگریا ئەمریكا د چارچۆڤەیێ كۆنفرانسێ میونشن ل ئەلمانیا كۆمبوون و تێدا ڕەوشا ئەمنی یا ئیراقێ و هەرێما كوردستانێ و دەڤەرێ و دووماهی پێشهاتێن شەڕێ دژی تیرۆرێ و بەرهنگاریا مەترسیێن داعشێ هاتنە باسكرن.
سەرۆكێ هەرێمێ ل ڕۆژا ئێكێ یا كۆنفرانسێ ئاسایشێ ل میونشن ل ئەلمانیا ل گەل محەمەد شیاع سودانی، سەرۆك وەزیرێن ئیراقێ كۆمبوو. د دیدارەكێ دا هەردو ئالیان خوەشحالیا خوە ب بەردەوامیا دانوستاندنێن بەغدا و هەولێرێ و چارەسەكرنا كێشەیان ل سەر بنەمایێ دەستووری دەربری و د هەڤڕا بوون كو بەرهنگاربوونا مەترسیێن ڕوو ب ڕوویی وەلاتی دبن، پێدڤی ب پێكڤە كاركرن و هاریكاریا هەموو ئالی و پێكهاتەیێن ئیراقێ یە.
هەر د زنجیرە كۆمبوونێن خوە دا، نێچیرڤان بارزانیل گەل ئیلهام عەلییف، سەرۆك كۆمارێ ئازرەبایجان كۆمبوو و هەردو ئالیان دووپاتی ل پێشڤەبرنا پەیوەندیان كر و سەرۆكێ ئازرەبایجانێ دیاركر كو كار ل سەر ڤەكرنا قونسۆلخانەیا وەلاتێ وی ل هەولێرێ دكەن.
هەروەسا سەرۆكێ هەرێمێ ل گەل نیكۆل پاشینیان، سەرۆك وەزیرێن ئەرمینیا كۆمبوو و هەردو ئالیان پەیوەندیێن ئەرمینیا ل گەل ئیراقێ و هەرێما كوردستانێ د هەموو بواراندا باسكر و هەردو ئالیان دووپاتی ل بەرفرەهكرنا زێدەتر یا چالاكی و ئالوگۆریا بازرگانی كر و ئاماژە ب هەبوونا دەلیڤەیێن باشتر ل دۆر ڤێ چەندێ كر. هەروەسا هەردو ئالیان ڕۆناهی خستە سەر ڕەوشا ڕەڤەندا كوردی ل ئەرمینیا و ڕەڤەندا ئەرمەنی ل هەرێما كوردستانێ و باس ل پەیوەندیا دێرین د ناڤبەرا هەردولا كر.
سەرۆكێ هەرێمێ ل گەل ماتیوش مورافیتسكی سەرۆك وەزیرێن پولەندا ژی كۆمبوو و د پێگەهێ خوە دا ل تویتەری بەلاڤكر مە باس ل چەسپاندنا پەیوەندیێن دو قۆلی كر.
سەرۆكێ هەرێمێ د بەردەوامیا دیدارێن خوە دا ل گەل محەمەد بن عەبدولرەحمان بن جاسم ئال سانی، جێگرێ سەرۆك وەزیران و وەزیرێ دەرڤەیێ قەتەر كۆمبوو، و هەردوئالیان دوپاتی ل پێشڤەبرنا پەیوەندیێن دو قۆلی د هەموو بواراندا كر و ئال سانی خواستا وەلاتێ خوە بۆ بەرفرەهكرنا كار و وەبەرئێنانێ ل ئیراقێ و هەرێما كوردستانێ ب تایبەتی دوپاتكر و هیڤی خواست دەلیڤەیێن باشتر بۆ كەرتێ تایبەتێ قەتەری ل هەرێما كوردستانێ پەیدا ببیت، سەرۆكێ هەرێمێ ژ ئالیێ خوەڤە هەموو پشتەڤانی و ئاسانكاریێن ئالیێن پەیوەندیدارێن هەرێما كوردستانێ ل دۆر ڤێ چەندێ نیشان دا.
هەروەسا سەرۆكێ هەرێما كوردستانێ د دو دیدارێن جودا دا ل گەل هەر ئێك ژ كریس ڤان هۆلن سیناتۆرێ ئەمریكی و شاندەكێ كۆنگرێسێ ئەمریكی ب سەرۆكایەتیا مایكل تورنەر، سەرۆكێ لژنا هەوالگیریێ ل جڤاتا نوونەرێن ئەمریكی كۆمبوو. هەروەسا سەرۆكێ هەرێمێ ل گەل جۆزێپ بۆرێل، بەپرسێ سیاسەتا دەرڤە یا ئێكەتیا ئۆرۆپا كۆمبوو.
ژ ئالیەكێ دی ڤە سەرۆكێ هەرێمێ ل گەل نادیا موراد، چالاكڤانا كورد یا ئێزدی و هەلگرا خەلاتێ نۆپل بۆ ئاشتیێ كۆمبوو و هەردو ئالیان باس ل ڕەوشا كوردێن ئێزدی و ئاوارەیێن ئێزدی، شنگالێ و بەردەوامیا پرۆسەیا ئازادكرنا ڕەڤاندیێن كوردێن ئێزدی كر و دووپاتی ل گرنگیا كاركرنێ بۆ ئاساییكرنا ڕەوشا شنگالێ و ئاڤەدانكرنا دەڤەرێ هاتە كرن.
