دی میستورا: ئاگربە‌ستا ل سووریێ دێ رێ خۆشکە‌ر بیت بۆ چارەسەریێ
ئەڤرۆ نیوز:
نوونە‌رێ تایبەت یێ سکرتێرێ گشتی یێ نەتەوێن یەکگرتی بۆ پرسا سووریێ راگەھاند کو ھە‌تا دە‌مە‌کا نە‌دیار دە‌ستپێکرنا کۆمبوونێن جنێڤێ ھاتینە پاشخستن و دیار ژی کر ئە‌و ژ ئاگربە‌ستێ ب ھێڤینە و پشتی ھە‌ڤدیتنێن ل گە‌ل روسیا و ئە‌مریکا دێ رۆژا دە‌ستپێکرنا کۆمبوونێن بۆ چارەکرنا قەیرانا ل سووریێ دیار بکە‌ن.
ستیفان دی میستورا نوونە‌رێ تایبەت یێ نەتەوێن یەکگرتی بۆ چارەکرنا قەیرانا سووریێ د داخویانیە‌کی دا ل باژێرێ جنێڤێ راگەھاند کو ئاگربە‌ستا کو ب دە‌ستپێشخە‌ریا روسیا و ئە‌مریکا ل سووریێ ھاتیە راگەھاندن گە‌لە‌ک ئە‌رە‌نیە و گۆت: (ئە‌م وە‌ک نەتەوێن یەکگرتی گە‌لە‌ک ب ھێڤینە کو ئاگربە‌ست سە‌ربگریت و شە‌ر ب تە‌مامی راوە‌ستیت، ژ بە‌ر کو د رە‌وشا ئاگربە‌ستێ دا چارەکرنا ئالۆزیێن سووریێ گە‌لە‌ک ئاسانە و ھە‌کە ئاگربە‌ست بگە‌ھیتە ئە‌نجامە‌کی دێ ل کۆمبوونێن جنێڤێ ژی نە‌خشێ چارەسەریێ ھێتە دە‌ستنیشانکرن).
ل دۆر دەمێ دە‌ستپێکرنا کۆمبوونێن جنێڤێ یێن سێیێ ژی دی میستو‌رای راگەھاند کو مخابن د گەرا یە‌کە‌م یا کۆمبوونان دا چو ئە‌نجامە‌ک دە‌رنە‌کە‌ڤت و ناکۆکیێن گە‌لە‌ک مەزن د ناڤبە‌را رژێمێ و ئۆپۆزسیۆنێ دا ھە‌بوون و ب تە‌مامی ل دژی ھە‌ڤدو بوون و گۆت: (ئە‌م ھێڤیدارین کو ئاگربە‌ست رێ خۆشکە‌ر بیت بۆ پە‌یداکرنا چارە‌کا سیاسی و وە‌سا باوە‌ر دکە‌م کو د بن سیبە‌را ئاگربە‌ستێ دا پە‌یدا کرنا چارە‌یان دێ گە‌لە‌ک باشتر بیت، لێ ھە‌تا نھا مە رۆژا دە‌ستپێکرنا قۆناغا دویێ یا کۆمبوونێن جنێڤێ دە‌ستنیشان نە‌کریە و دڤێت روسیا و ئە‌مریکا د ڤێ دە‌ربارێ دا ھە‌ڤدیتنە‌کی تایبەت ساز بکە‌ن و پاشی د بن چاڤدێریا مە دا دە‌ست ب کۆمبوونان بھێتە کرن).
دی میستورا د پشکە‌کی دی یا ئاخڤتنا خوە دا ژی راگەھاند کو ئە‌و ژ سێ ئالیان ڤە چاڤدێریا ئاگربە‌ستێ دکە‌ن و نھا ژ ئالیە‌کی ئە‌مریکا و ژ ئالیە‌کی دی ژی روسیا چاڤدێریا ئاگربە‌ستێ دکە‌ن و بە‌ردە‌وام نەتەوێن یەکگرتی ل سە‌ر چا‌وانیا برێڤە‌چوونا ئاگربە‌ستێ ئاگاھدار دکە‌ن و گۆت: (شە‌رێ کو نھا ل نێزیکی حە‌لە‌ب، ئیدلیب و دە‌ڤە‌رێن ناڤە‌راستا سووریێ دھێتە کرن نە د چارچۆڤێ ئاگربە‌ستێ دایە و ئۆپە‌راسیۆنێن ل دژی ئە‌لنوسرا و د‌اعشێ د بن چاڤدێریا روسیا و ئە‌مریکا دا دھێنە کرن، ژ بە‌ر کو ھە‌ردو رێکخستنێن تیرۆرست ناکە‌ڤنە د چارچۆڤێ ئاگربە‌ستێ دا).
ستیفان دی میستورا د داویا ئاخڤتنا خوە دا ژی راگەھاند کو وان داخواز ژ وە‌لاتێن جیرانێن سووریێ کرینە کو دەستێوەردانێ د رە‌وشا ناڤخوە یا سووریێ دا نە‌کەن. ژ بە‌ر کو ھە‌ر دە‌ستێوەردانە‌ک رە‌وشا سووریێ زێدە‌تر ئالۆز دکە‌ت و ئە‌و یە‌ک ژی دە‌ستێ تیرۆرستان ب ھێزتر دکە‌ت.
