دەستپێشخەریا سـەرۆك بـارزانـی، وەرچەرخـانـەكە بۆ دویماهیئینان ب «خـۆخـۆریـێ»

دلۆڤان ئاكرەیی

رێكخستنەڤەیا ناڤمالیا كوردی نە دۆزەكا بژاردەیی یە، بەڵكو قەڵغانێ سەرەكی یێ پاراستنا دەستكەفتێن دیرۆكی یێن مللەتێ مە یە و رەوشا نۆكە یا هەرێمایەتی داخواز دكەت كو پەرلەمان بهێتە چالاككرنەڤە و كابینەیا نوو یا حوكمەتێ ل سەر بنەمایێ هەڤپشكیێ بهێتە ئاڤاكرن، دا كو ناڤمالا مە هەمبەر زنجیرەیا ئالۆزیان یا بهێز بیت و ئەڤ كیانە و دەستكەفتێن ب خوینا شەهیدان هاتینە هەبوونێ، ژ دەست نەچن.
د ڤێ قۆناغا هەستیار و چارەنڤیسساز دا، كو هەرێما كوردستانێ د ناڤبڕا ئالۆزیێن ناڤخۆیی و گۆهرینێن هەرێمیدا دەرباز دبیت، دەستپێشخەریا نیشتمانی یا سەرۆك مەسعود بارزانی وەك وەرچەرخانەكا ستراتیژی بۆ شكاندنا چەق بەستیا سیاسی (Political Stagnation) هاتە رۆژەڤێ و پەیاما هێژا یا سەرۆك بارزانی ب هەلكەفتا جەژنا قوربانێ، تنێ پیرۆزباهیەكا نەریتی نەبوو، بەڵكو بانگەوازەكا نیشتمانی و بەرپرسانە بوو بۆ دویماهیئینان ب دیاردەیا سستكەر یا «خۆخۆریێ» و ڤەكرنا دەرگەهێ دیالۆگەكا ئاڤەدان و ڕژد د ناڤبەرا تەڤایا هێزێن سیاسیدا.
كارڤەدانا ب لەز و ئەرێنی یا لایەنێن سیاسی هەنبەر ڤێ دەستپێشخەریێ، نیشانا وێ چەندێ یە كو هوشیاریا سیاسی گەهشتیە ئاستەكێ راست، كو تێدا دیالۆگ دۆزەخا ململانێیان ڤەمرینیت و ئەڤ پەیامە وەك «دەرگەهەكێ زێڕین» بۆ دەستپێكرنا دانوستاندنێن پێكئینانا كابینەیا دەهێ یا حوكمەتا هەرێمێ دهێتە دیتن و هەر بزاڤەكا ستراتیژی د ڤێ ئاراستەیێدا، نە تنێ جهێ دەستخۆشیێ یە، بەڵكو پێدڤیەكا نیشتمانی یە بۆ تێپەڕاندنا قۆناغا لێكدووركەفتنێ بەر ب تیشكا تەباییێ.
د مژارا پرۆسەیا دیموكراسی دا، هەر چەندە دوبارەكرنەڤەیا هەلبژارتنان د رەوشێن ئاسایی دا مافەكێ دەستووری یە، بەلكو د ناڤ ڤان گۆڕانكاریان دا هەڤبەری چەندین ئاستەنگ و ئاریشەیان دبیت، لەوما چالاككرنەڤەیا پەرلەمانێ كوردستانێ د گۆپیتكا بژاردەیێن گونجای و هۆشمەندانە دا دهێت و پێدڤییە، هێزێن سیاسی ل سەر میكانیزمێن لێكتێگەهشتنێ رێكبكەڤن دا كو پەرلەمان وەك چەترەكا یاسایی و قەبوولكری بهێتە كاراكرن، چونكی ئەڤ پەرلەمانە دەربرینێ ژ ئیرادەیا گەل دكەت و باشترین ئامرازە بۆ زێدەتر خزمەتكرنا وەلاتیان و دابینكرنا مافێن وان یێن رەوا.
ژ لایەنێ رەوشەنبیری و فەلسەفەیا حوكمڕانیێ ڤە، لێكگۆهارتنا بیروبۆچوونان و كۆمبوونێن راوێژكاری، بنەمایێ سەرەكی یێ دیموكراسیێ و جڤاكێ سڤیل پێكدئینن و د هەمان دەم دا، د ئایینێ پیرۆزێ ئیسلامێ دا، بنەمایێن سیاسەت و حوكمڕانیێ ل سەر كۆڵەكەیێن، ئاشتی و تەباییێ، وەڵاتپارێزی یا راستەقینە، پێكڤەژیانا ئاشتیانە، پێكدهێت و ل سەر ڤان بنەمایان، ئەركێ ئەخلاقی و نیشتمانی یێ تەڤایا چین و تەخێن جڤاكی و لایەنێن سیاسی یە كو بەرژەوەندیێن بلند یێن گەل و نیشتمانی بخەنە پێش بەرژەوەندیێن حزبی یێن بەرتەنگ. دەرئەنجام ژێ‌ پاراستنا قەوارەیێ هەرێمێ ب رێكا ناڤمالیا كوردی.

کۆمێنتا تە