د كەڤالێن خۆ دا زیرەكییا زاڕۆكەكی دایە دیاركرن
دلڤین رەشید
شێوەكار (سیپان سەباح) د دیدارەكێ دا بۆ رۆژنامەیا ئەڤرۆ گۆت: ئەز دەرچویێ كولیژا هونەرێن جوانم و دژیەكێ بچووك دا من دەست ب كارێ هونەری كریە و پشتی مرنا دایكا من بەرپرساتیا مالێ وەرگرتیە و دەست ژ خواندنا خۆ ژی نە بەردایە و بەردەوام بوویمە هەتا باوەرنامەیا دبلۆمێ و بەكالوریۆسێ د بۆاری هونەرێ شێوەكاری دا ب دەستخۆڤە ئینای.
هەروەسا گۆت: ئارمانجا من یا سەرەكی ئەوە دناڤ كەڤالێن خۆدا زیرەكییا زاڕۆكەكی بدەمە دیاركرن، ئەو ژی ئەزم كا چاوا مرنا دایكا من ئەز كرمە زەلامەكی خۆڕاگر و خودان هێز و ئیرادە، بۆ زانین من پێلاڤ بۆیاغ دكرن و ب داهاتێ وێ سندۆقێ مالا خۆ پێ ب رێڤەدبر، لەورا ئەڤ سندوقە گەلەك یا ب بهایە ل دەڤ من، من دڤێ جامخانەیا بچووك دا هەلگرتیە و هندی بشێم دێ پارێزم، راستە د قوناغێن ژیانی دا ئەم راستی گەلەك سەربۆرێن ژیانێ یێن خۆش و نەخۆش، بەلێ خۆڕاگریا مرۆڤی دبیتە ئەگەر ئەم ب هێز بین بەرامبەر هەر روودانەكا نە چاڤەڕێكری، لەورا داخوازێ ژ هەموو گەنجان دكەم بەردەوام ل سەر خەون و ئارمانجێن خۆ كاربكەن و دبەردەوامبن هەتا سەركەفتنێ.
