روویێ راستەقینە
مووسا خالد
رویێ ڕاستەقینە، یان ئەو ڕاستییا كو مرۆڤ د كەت و راسییا ناخێ خۆ دا ڤەدشێریت و ژ چاڤێن خەلكی بەرزە دكەت، ئێكە ژ ئالۆزترین و گرنگترین بابەتێن دەروونی و جڤاكی د ژیانا مە دا، د سەردەمێ ئەڤرۆ دا، كو پتر وەك جیهانا شاشە و دیمەنێن دەستكرد دهێتە نیاسین، پاراستنا وێنەیەكێ جوان ل بەر چاڤێن جڤاكی بوویە خەمەكا مەزن. تۆرێن جڤاكی و پەیوەندیێن بسەرڤەیی (ڕووكەش) وە ل مە كرییە كو گەلەك جاران، ب نەچاری یان ب حەزا خۆ، ماسكەكێ بدەینە بەر چاڤێن خۆ دا كو برینێن خۆ، لاوازی یان تەنانەت كێماسیێن خۆ بڤەشێرین، بەلێ ڕاستی ئەوە كو مرۆڤ چەند هەول بدەت ناسنامەكا دی نیشا بدەت، دێ هەر ڕۆژەك هێت كو ئەڤ ماسكە ب بەركەفتنا ڕاستیێن ژیانێ بكەڤیت.
پرسیارا سەرەكی ئەڤەیە: كەنگی و چاوا رویێ ڕاستەقینە یێ مرۆڤی دەردكەڤیت؟ بەرسڤ گەلەك یا سادەیە، د دەمێن تەنگاڤی، فشارێن دەروونی و قەیرانێن مەزن دا، د دەمێن خۆشی و ئارامیێ دا، كارەكێ ب زەحمەت نینە كو مرۆڤ خودان ڕەوشتەكێ بلند بیت، پەیڤێن شرین بێژیت و خێرخواز دیار ببیت، بەلێ دەمێ بەرژەوەندیێن تایبەت دكەڤنە د مەترسیێ دا، یان دەمێ مرۆڤ دكەڤیتە بن بارێ گران یێ ئەزموون و تاقیكرنێن ژیانێ، ل وێرێ ماسكێن چێكری خۆ ل بەر ناگریت، د وان خولەكان دا، كانییا ناخێ مرۆڤی دتەقیت، یێ دلسۆز وی پتر دیار دبیت و یێ بەرژەوەندی پەرست ژی ڕاستییا خۆ ئاشكرا دكەت.
ناسكرنا ناخێ ڕاستی یێ كەسێن دەوروبەر، پڕۆسەكا ب ئێش و مرۆڤایەتییە، گەلەك جاران دەمێ مرۆڤ دبینیت ئەوان كەسێن كو جهێ باوەرییا وی بوون، د بن ماسكی دا تشتەكێ دی بوون، تووشی حەپەسیانەكا مەزن و ئێشەكا دڵ (خەیبەتەكا گران) دبیت، بەلێ ئەڤ ئێشە، سەرەڕای تالییا خۆ، مەزنترین دەرس و وانەیە بۆ ژیانێ، ئەڤە مە فێری هندێ دكەت كو ب چاڤەكێ كێمتر سۆزدار و پتر عاقلانە و لۆژیكی بەرێ خۆ بدەینە پەیوەندیێن خۆ، مرۆڤ ل وێرێ تێدگەهیت كێ هێژایی هندێ یە ببیتە هەڤالێ ڕاستی و ل ڕۆژێن ڕەش دا ل پشت وی بمینیت.
ژ ئالیەكێ دی ڤە، رویێ ڕاستەقینە بتنێ بۆ دیتنا خەلكی نینە، بەلكو بەحسێ ئاشتییا ناڤخۆیی یا مرۆڤی ب خۆ دكەت. مەزنترین دلسۆزی ئەوە كو مرۆڤ ل هەمبەر ئاوێنێ ڕاوەستیت، كێماسی، ترس و باشیێن خۆ وەك خۆ قەبوول بكەت و پێویستی ب خۆڤەشارتنێ نەبیت، ڕاستی و سادەیی هێزەكا دەروونی یا بێ وێنە ددەنە كەسایەتییا مرۆڤی، ئەو كەسێ ب شێوازەكێ سروشتی و بێ ماسك دژیت، ڕەنگە د چاڤێن جڤاكەكێ پڕی ژ ماسك دا یێ نموونەیی نەبیت، بەلێ ب پشتڕاستی ڤە ل سەر بالیفا خەوێ دێ یێ ئارام، خودان ویژدان و دوور ژ دۆڕووییێ بیت.
