رۆژا ژ دایکبوونا پێغەمبەری (س) دێ ل پارێزگەھا دھۆکێ ھێتە ساخکرن
ئەڤرۆ نیوز:
ل ژێر درووشمێ (پێغەمبەر سلاڤێن خودێ ل سەر بن پێغەمبەرێ مرۆڤایەتی و پێکڤەژیانێ و لێبۆرینێ یە) و ل ژێر چاڤدێریا (فەرھاد ئەمین ئەترووشی) پارێزگەرێ دھۆکێ، رێڤەبەریا ئەوقاف و کاروبارێن ئایینی ل دھۆکێ ب ھەڤکاری دگەل ئێکەتیا زانایێن ئایینێ ئیسلامێ ل دھۆکێ دێ رۆژا ژ دایکبوونا پێغەمبەری (محەمەد) سلاڤێن خودێ ل سەر بن ل رۆژا 11/12/2016 ب چەندین چالاکییان ل پارێزگەھا دھۆکێ ھێتە ساخکرن.
سەمیان عەبدولخالق، رێڤەبەرێ گشتی یێ رێڤەبەریا ئەوقاف و کاروبارێن ئایینی ل پارێزگەھا دھۆکێ بۆ رۆژناما ئەڤرۆ ئاشکرا کر کو رۆژا ژ دایکبوونا پێغەمبەری سلاڤێن خودێ ل سەر بن تایبەتمەندیا خوە یا ل دەف مللەتێ کورد ھەی ژ بەر ڤێ چەندێ ئامادەکاریێن ساخکرنا ڤێ رۆژێ ل سنوورێ پارێزگەھا دھۆکێ ھاتینەکرن و گۆت: “ب ڤێ ھەلکەفتێ ئاھەنگێن ئایینی دێ ل حەفت قەزایێن سەر ب پارێزگەھا دھۆکێ ڤە ھێنە گێران و سەرەرایی ڤێ چەندێ دێ ئاھەنگێن ئایینی ل رۆژئاڤایێ دیجلە ل دەڤەرا زومار ژی ھێنە گێڕان و ھەموو مەزاختیێن ڤان ئاھەنگان دێ ژ لایێ پارێزگەرێ دھۆکێ ڤە ھێنەدان”.
ناڤھاتی ئاماژە دا وێ چەندێ کو ب ھەمان ھەلکەفت دێ 10 سمینار ل ھەر قەزایەکا سەر ب پارێزگەھا دھۆکێ ڤە ھێنە پێشکێشکرن کو سەر جەمێ وان دبیتە حەفتێ سمینار.
مەئموون عەلی محەمەد، رێڤەبەرێ پەیوەندی و راگەھاندنێ ل رێڤەبەریا ئەوقاف و کاروبارێن ئاینی ل پارێزگەھا دھۆکێ ئاشکرا کر کو رۆژا ژ دایکبوونا پێغەمبەری (محەمەد) سلاڤێن خودێ ل سەر بن دێ ل مزگەفتا (سەید محەمەد) ل تاخێ مالتا خارێ ھێتە ساخکرن.