رێڤه‌به‌رێ گشتی یێ گه‌شتوگۆزارێ ل پارێزگه‌ها دهۆكێ: ل هه‌رسێ رۆژێن نه‌ورۆزێ دێ ئاهه‌نگێن جه‌ماوه‌ری ل دهۆكێ هێنه گێران
ئه‌ڤرۆ، نیوار محه‌مه‌د سه‌لیم:
پ. د. خه‌یری عه‌لی ئوسۆ، رێڤه‌به‌رێ گشتی یێ گه‌شتوگۆزارێ ل پارێزگه‌ها دهۆكێ دیار كر كو د هه‌ر سێ رۆژێن جه‌ژنا نه‌ورۆزێ دا دێ ئاهه‌نگ ل پارێزگه‌ها دهۆكێ هێنه گێڕان و ئامارا هه‌تنا گه‌شتیاران ب هه‌مان هه‌لكه‌فت دێ بۆ ده‌مێ ١٠ رۆژان هێته وه‌رگرتن. دا زانین ژی كو ژبلی دهۆكێ دێ ل قه‌زا ئاكرێ و ئامێدیێ و ئیدارا سه‌ربه‌خۆ یا زاخۆ ژی ئاهه‌نگ ب هه‌لكه‌فتا نه‌ورۆزێ هێنه گێران. هه‌ر دیسان ئاماژه ب وێ چه‌ندێ ژی كر كو رۆژ بۆ رۆژێ رێژا هاتنا گه‌هشیتاران د زێده‌بوونێ دایه و ئه‌و پێشبینی دكه‌ن بۆ نه‌ورۆزا ئه‌ڤ ساله زێده‌تری 30 هزار گه‌شتیاران سه‌ره‌دانا پارێزگه‌ها دهۆكێ بكه‌ن.
پ. د. خه‌یری عه‌لی ئوسۆ، رێڤه‌به‌رێ گشتی یێ گه‌شتوگۆزارێ ل پارێزگه‌ها دهۆكێ پلانا رێڤه‌به‌ریێ بۆ جه‌ژنا نه‌ورۆزێ ڕاگه‌هاند كو ل رۆژا پێنجشه‌مبی ١٧/٣/٢٠٢٢ دێ چه‌ندین دیاری ژ لایێ رێڤه‌به‌ریا گشتی یا گه‌شتوگۆزارێ ل سه‌ر نه‌خۆشێن ته‌لاسمیایێ ل پارێزگه‌ها دهۆكێ هێنه به‌لاڤكرن، هه‌روه‌سا ل رۆژا ٢٠/٣/٢٠٢٢ كو رۆژا هه‌لكرنا ئاگرێ نه‌ورۆزێ یه دێ چار ترۆمبێلێن بارهه‌لگر كو ب جوانترین شێوه هاتینه خه‌ملاندن دێ د ناڤ سه‌نته‌رێ باژێرێ دهۆكێ دا هاتنوچوونێ كه‌ن و گوهداریا سترانێن نه‌ورۆزێ دێ هێته‌كرن، سه‌ره‌رایی ڤێ چه‌ندێ ل رۆژا ئێكێ یا جه‌ژنا نه‌ورۆزێ ٢١/٣/٢٠٢٢ دێ ئاهه‌نگه‌كا جه‌ماوه‌ری ل (گه‌لی كورتكێ) هێته گێڕان و ل رۆژا دووێ یا جه‌ژنا نه‌ورۆزێ ٢٢/٣/٢٠٢٢ دێ ئاهه‌نگه‌كا جه‌ماوه‌ری ل (قارقاراڤا) هێته گێڕان و ل رۆژا سێیێ یا جه‌ژنا نه‌ورۆزێ ٢٣/٣/٢٠٢٢ دێ ئاهه‌نگه‌كا جه‌ماوه‌ری ل سه‌رێ چیایێ (زاوا) ل دهۆكێ هێته گێڕان و گۆت: “ئه‌ڤ جهێن بۆ گێڕانا ئاهه‌نگان هاتینه ده‌ستنیشانكرن ئه‌و جهێن یێن كو رێژه‌كا به‌رچاڤ یا خه‌لكێ پارێزگه‌ها دهۆكێ د رۆژێن جه‌ژنا نه‌ورۆزێ دا سه‌ره‌دانێ بۆ دكه‌ن، ئه‌ڤه دده‌مه‌كی دایه ل سه‌ر ئاستێ رێڤه‌به‌ریێن گه‌شتوگۆزارێ ل قه‌زایێن (ئاكرێ، ئامێدیێ، شێخان) ژی دێ ئاهه‌نگ ل هه‌ر سێ رۆژێن جه‌ژنا نه‌ورۆزێ ل جهێن جوداجودا یێن وان قه‌زایان هێنه گێڕان، هه‌روه‌سا د هه‌ر سێ رۆژێن جه‌ژنا نه‌ورۆزێ دا دێ ب سه‌دان دیاری یێن جوراوجور ل وان جهێن ئاهه‌نگ لێ دهێنه گێڕان ل سه‌ر سه‌یرانی و گه‌شتیاران هێنه به‌لاڤكرن”.
ده‌رباره‌یی ئامارا رێژا هاتنا گه‌شتیارێن بیانی و عیراقی و ناڤخۆیی بۆ ناڤا هه‌رێما كوردستانێ ژی، رێڤه‌به‌رێ گشتی یێ گه‌شتوگۆزارێ ل پارێزگه‌ها دهۆكێ ئاماژه دا وێ چه‌ندێ كو ئامارا هاتنا گه‌شتیاران ب هه‌لكه‌فتا جه‌ژنا نه‌ورۆزێ دێ بۆ ده‌مێ ١٠ رۆژان هێته وه‌رگرتن هه‌ر ژ رۆژا پێنجشه‌مبی ١٧/٣/٢٠٢٢ هه‌تا رۆژا ٢٦/٣/٢٠٢٢ د ڤان رۆژان دا یێن كو ئامار تێدا دهێته وه‌رگرتن ئه‌م پێشبینیا هاتنا پتری ٣٠ هزار گه‌شتیاران دكه‌ین و گۆت: “سال بۆ سالێ رێژا هاتنا گه‌شتیاران بۆ پارێزگه‌ها دهۆكێ به‌ره‌ف بلندبوونێ ڤه دچیت د سالا ٢٠٢١ ێ دا ملیونه‌ك و ٥٠٠ هزار گه‌شتیاران سه‌ره‌دانا پارێزگه‌ها دهۆكێ كربوو د هه‌یڤا ئێك و هه‌یڤا دو یا هه‌مان سال دا ٥٤ هزار گه‌شتیاران سه‌ره‌دانا پارێزگه‌ها دهۆكێ كربوو، به‌لێ د سالا ٢٠٢٢ دا د هه‌یڤا ئێك و هه‌یڤا دوو دا پتری ١٣٠ هزار گه‌شتیاران سه‌ره‌دانا پارێزگه‌ها دهۆكێ كریه”.
ده‌رباره‌یی ڤه‌كرنا جهێن خزمه‌تگۆزاری ژی د رۆژانێن نه‌ورۆزێ دا، پ. د. خه‌یری عه‌لی ئوسۆ، خویا كر كو بنگه‌هێن گه‌شتیاری یێن سنوورێ پارێزگه‌ها دهۆكێ هه‌می هاتینه ئاگه‌هداركرن كو د رۆژێن جه‌ژنا نه‌ورۆزێ دا د ڤه‌كری بن و ب باشترین شێوه پێشوازی و خزمه‌تكرنا گه‌شتیاران و وه‌لاتیێن پارێزگه‌ها دهۆكێ بكه‌ن و داشكاندنان بۆ گه‌شتیاران د بهایان دا بكه‌ن، به‌لێ نه ل سه‌ر بنه‌مایێ ئینانا خوارا كوالێتیا جوری، به‌لكو ب بهایه‌كێ گۆنجایی خزمه‌ته‌كا باش پێشكێش بكه‌ن و گۆت: “ل پارێزگه‌ها دهۆكێ پتری ٩٠٠ بنگه‌هێن گه‌شتیاری یێن موله‌تدای و ٢٥٠ هاڤینگه‌هـ هه‌نه.
ل دۆر ڤه‌كرنا بنگه‌هێن نوو یێن گه‌شتیاری ژی د ئه‌ڤ ساله دا، رێڤه‌به‌رێ گشتی یێ گه‌شتوگۆزارێ ل پارێزگه‌ها دهۆكێ، د سالا بۆری دا ٢٠٢١ ێ (٦٠) بنگه‌هێن نوی یێن گه‌شتیاری ل پارێزگه‌ها دهۆكێ هاتبوونه ڤه‌كرن و ئه‌ڤ ساله ژی ڤه‌كرنا بنگه‌هان یا به‌رده‌وامه و هه‌می ئاسانكاری ژ لایێ مه ڤه د چارچوڤێ یاسایێ دا بۆ هه‌می وه‌لاتیان دهێنه‌كرن یێن كو بخوازن بنگه‌هێن گه‌شتیاری ل پارێزگه‌ها دهۆكێ ڤه‌كه‌ن، هه‌روه‌سا ل پارێزگه‌ها دهۆكێ ١١٦ جهێن ڤه‌حه‌واندنێ ژ ئۆتێل و موتێل و شقێن ڕائێخستی هه‌نه كو شه‌ڤانه جهێ ڤه‌حه‌واندنا پتری ١٥ هزار گه‌شتیاران هه‌یه”.
د. خه‌یری ئه‌حمه‌د ئوسۆ پێشتر ژی د دیداره‌كێ دا بۆ رۆژناما ئه‌ڤرۆ ئاماژه ب وێ چه‌ندێ كربوو كو وان پلانه‌كا ستراتیژی یا هه‌ی، هه‌یڤا هه‌شت یا ب دووماهی هاتی، یا چوویه لایێ هنده‌ك كه‌سێن شاره‌زا و گه‌له‌ك كه‌سان بۆچوونا خوه یا ل سه‌ر دای ل چه‌ندین وه‌لاتان و ل هه‌رێمێ ژی و هنده‌ك ژی یێن مای ئه‌و ژی دێ بۆچوونا خوه ل سه‌ر ده‌ن. 28 ستراتیژیان ب خوه ڤه دگریت بۆ نمۆنه گه‌شتوگۆزاریا ماركتینكێ و یا ئاینی و هه‌ر ئێك ژی گرێدایی تشته‌كی یه.
ب ره‌نگه‌كی گشتی هه‌موو لایه‌نێن گه‌شتیاری ل دهۆكێ پێش دئێخن یێ د ناڤ وان ستراتیژیان دا، مه بۆچوونا جڤاتا پارێزگه‌ها دهۆكێ ژی یا وه‌رگرتی و رۆژه‌كێ دێ ل وێرێ ژی ڤان ستراتیژیه‌تا هه‌موویان بۆ وان به‌رچاڤ كه‌ین. ئه‌ڤ پلانه دێ بۆ چه‌ندین سالێن دی كار ل سه‌ر هێته كرن.
د ناڤ ڤان ستراتیژیه‌تێن مه دا یا هه‌یی كو مه رێنیشانده‌رێن گه‌شیاری هه‌بن. ئه‌ڤ كه‌سه چو ده‌رچوویێن پشكا مێژوویێ یان زمانێ ئنگلیزیێ بن بهێنه پێگه‌هاندن كو ب زمانێن عه‌ره‌بی و ئنگلیزی و كوردی ژی بشێن خزمه‌تا گه‌شتیاران بكه‌ن. ل هه‌ر جهه‌كێ هه‌بیت ئه‌و كه‌سه د ئاماده بن ل گه‌ل جهێن گه‌شتیاری به‌حس ل مێژوو و شوونووارێن وان ده‌ڤه‌ران ژی دا بكه‌ن.
ده‌رباره‌ی وێ چه‌ندێ ژی كا بۆچی گه‌شتیار ناچنه وان ده‌ڤه‌ران، مه بزاڤ كرینه و ل گه‌ل رێڤه‌به‌ریا شوونوواران ژی روونشتینه و ب گرنگی كار ل سه‌ر وی ته‌وه‌ری دكه‌ین كو گرنگه سه‌ره‌دانا گه‌شتیاری بۆ جهێن مێژووی و ئاینی و شوونوواری ژی بن نه ب تنێ بچنه جهێن سرۆشتی.
خۆیا ژی كر كو هنده‌ك ژ ڤان ستراتیژیه‌تا گرێدای مه‌نه و هنده‌ك ژی نه گرێدای مه‌نه، بۆ نمۆنه ماركتینكا پارێزگه‌ها دهۆكێ گرێدای مه و ده‌زگه‌هێن راگه‌هاندنێ یه. بۆ نمۆنه به‌لاڤكرنا هوشیاریا گه‌شتوگۆزاری ژی گرێدایی راگه‌هاندنێ یه و دڤێت رێز ل وان كه‌سان بهێته گرتن یێن سه‌ره‌دانا جهێن گه‌شتیاری دكه‌ن ب تایبه‌ت عه‌ره‌ب ئه‌ڤێن ژ مووسل و ناڤه‌راستا عیراقێ دهێن نه دژاتیا وان بهێته كرن و شه‌رێ وان بهێته كرن.
باوه‌ر ناكه‌م لایه‌ن هه‌بن هاریكار نه‌بن ل گه‌ل مه بۆ سه‌رخستنا ڤان ستراتیژیان ژ به‌ر كو چو مه‌زاختی لێ ناهێته مه‌زاختن. ژ به‌ر هندێ ژی ب تنێ هاریكاریه‌كا بچووك دڤێت، چو مه‌زاختی لێ ناهێته مه‌زاختن.
