رێڤەبەرێ ناحیا دەرکارێ : ئەڤرۆ شەرەکێ مەزن ل پەرەخێ هاتیە کرن
ئەڤرۆ نیوز، عەلی حاجی:
رێڤەبەرێ ناحیا دەرکارێ د داخویانیەکێ دا بۆ ئەڤرۆ نیوز دیار کر، ئەڤرۆ دناڤبەرا دەمژمێر ٢:٠٠ بۆ ٣:٠٠ پشتی نیڤرۆ، شەرەکێ مەزن ل گەلیێ پەرەخێ دناڤبەرا هێزێن پەکەکێ و سوپایێ تورکیا دا دروست بوویە.
زێرەڤان موسا زێدەتر گۆت : ژ ئەنجامێ وی شەری دەنگێ چەکی د گەهشتە ناحیا دەرکارێ و ئەو شەرە بۆ دەمێ دو دەمژمێران ڤەکێشا و دەنگەکێ زۆر د گەهشتە ناحیا دەرکارێ، لدووڤ گوتنێن خەلکێ گوندێ پەرەخێ سوپایێ تورکیا ل چیایێ کوخێ یێ دناڤبەرا گوندێ پەرەخێ و قەسروکێ دا هاتیە جێگیر کرن کو ئەو چیایە ل هنداڤی گەلیێ پەرەخێ یە و بۆ ئێکەم جارە شەرەکێ ب ڤی رەنگی دهێتە کرن و کو دەنگێ جورەها چەکان ل ناحیێ بگەهیتە وان و هەتا نوکە پێزانینێن ل دور قوربانیێن وی شەری دناڤبەرا هێزێن پەکەکێ و سوپایێ تورکیا دا نەگەهشتینە دەستێ مە، هەر دیسان توپبارانا شەڤا بوری یا گوندێ ئیسڤ ئاڤا چو زیانێن گیانی لدووڤ خوە نەهێلا بوون و هەتا گەنمێ جوتیارێن وێ دەڤەرێ ژی نەهات بۆ سوتن و ب تنێ ئاگر ب پیش و پەلەخی کەفتبوو.
