سه‌رۆك بارزانى: د عێراقا نوو دا مافێن گه‌لێ كوردستانێ هاتینه بن پێ كرن
ئه‌ڤرۆ نیوز:
سه‌رۆك بارزانى د پێشوازیا شانده‌كێ بلندێ هه‌ڤپه‌یمانیا نیشتمانى یا عیراقێ ب سه‌رۆكایه‌تیا سه‌ید عه‌مار ئه‌لحه‌كیم سه‌رۆكێ هه‌ڤپه‌یمانیێ، به‌حسێ وان ده‌رده‌سه‌ریان كر یێن حكومه‌تا عیراقێ ب سه‌ر گه‌لێ كوردستانێ دا ئیناى، ژ قوناغا دروستبوونا عیراقێ هه‌تاوه‌كو رژێما به‌عس و ئاماژه ب وان پێشێلكارییان كرن كو پشتى 2003 ێ ده‌رحه‌ق ب گه‌لێ كوردستانێ هاتیه كرن و رژدى ل سه‌ر وێ یه‌كێ كر كو گه‌لێ كوردستانێ پشتى ژ ناڤچوونا رژێما به‌عس، هه‌موو بزاڤ یێن كرن بۆ ئاڤاكرنا عیراقه‌كا نوو، به‌لێ هه‌روه‌كو قوناغێن به‌رێ كار بۆ تێكدانا شه‌راكه‌ت و پێشێلكرنا مافێن گه‌لێ كوردستانێ و زالكرنا زمانێ پرانى و دوماهیێ برینا قویتێ خه‌لكێ كوردستانێ هاته كرن، كو ئه‌ڤ خاله بونه ئه‌گه‌رێ نه‌مانا باوه‌ریێ و كووربوونا كێشان.
ئه‌لحه‌كین د گوتنه‌كێ دا ئاماژه ب دیرۆك و ئه‌زموونا هه‌ڤپشكا لایه‌نێن عیراقێ كر د دژایه‌تیكرنا دكتاتوریه‌تێ دا، هه‌روه‌سا رژدى ل سه‌ر وێ یه‌كێ كر كو پێدڤه پێداچوون ب په‌یوه‌ندیێن ناڤبه‌را لایه‌نێن كوردستانى و هه‌ڤپه‌یمانیا نیشتمانى بهێته كرن و خالێن لاواز و كێماسى و كێشان چاره بكه‌ن.
