سه‌رۆك بارزانی:دادگه‌ها فیدرالی ئه‌جیندایه‌كا ب گومان بجه دئینیت و جهێ (دادگه‌ها شۆڕه‌شێ) یا ڕژێما به‌رێ گرتیه
ئه‌ڤرۆ:
سه‌رۆك مه‌سعود بارزانی، ل دۆر نووترین بڕیارا دادگه‌ها فیدرالی یا ئیراقی دژی هه‌رێما كوردستانێ په‌یامه‌ك ڕاگه‌هاند.
د په‌یاما خوه دا، سه‌رۆك بارزانی دبێژیت، بڕیارا دادگه‌ها فیدرالی، به‌ری دژی هه‌رێما كوردستانێ بیت، دژی پرۆسه‌یا سیاسی و دژی حوكمه‌تا ئیراقێ و دژی به‌رنامه‌یێ هه‌ڤپه‌یمانیا ئیدارا ده‌وله‌تێ ب خوه‌یه ژی.
هه‌روه‌سا دبێژیت، جهێ حێبه‌تیێ یه هه‌ر ده‌مێ سه‌قایه‌كێ ئه‌رێنی د ناڤبه‌را به‌غدا و هه‌رێمێ دا دروست دبیت و ده‌لیڤه‌یه‌ك بۆ چاره‌سه‌ریا گرفتان په‌یدا ببیت، ئێكسه‌ر دادگه‌ها فیدرالی كار بۆ تێكدانا وێ ده‌لیڤه‌یێ كریه و ب بڕیاره‌كا دوژمنكارانه ده‌لیڤه ژناڤبریه و بوویه ئه‌گه‌رێ ئالۆزتربوونا كێشه‌یان.
ده‌قێ په‌یاما سه‌رۆك بارزانی…
مخابن جاره‌كادی دادگه‌ها فیدرالی یا ئیراقی هه‌لویسته‌كێ دی یێ دوژمنكارانه به‌رانبه‌ر هه‌رێما كوردستانێ نیشان دا و ڕێگری ل وێ چه‌ندێ كر ئه‌و گۆژمێ پاره‌ی بۆ هه‌رێمێ بهێت كو بڕیار بوو حوكمه‌تا فیدرالی بۆ هه‌رێما كوردستانێ بهنێریت.
لڤێرێ مه‌به‌ست گۆژمێ پاره‌ی نینه به‌لكو كێشه‌یا سه‌ره‌كی پێشێلكرنا ماف و پرنسیپی یه. هه‌موو ئالی د ئاگه‌هدارن كو پشكداریا مه د هه‌ڤپه‌یمانیا ئیداره‌یا ده‌وله‌تێ و پێكئینانا حوكمه‌تا نوو یا ئیراقێ دا، ل سه‌ر بنه‌مایێ به‌رنامه‌یه‌كێ رۆهن و تێر و ته‌سه‌ل بوو كو هه‌موو ئالیان ڕێككه‌فتن ل سه‌ر كریه. دابینكرنا پشكه‌ك ژ شایستێن دارایی یێن هه‌رێما كوردستانێ ژی كو مافه‌كێ ڕه‌وا یێ خه‌لكێ كوردستانێ یه، پشكه‌ك بوو ژ وی به‌رنامه‌ی و ڕێككه‌فتن ل سه‌ر هاتیه كرن. له‌وما بڕیارا دادگه‌ها فیدرالی، به‌ر وێ چه‌ندێ دژی هه‌رێما كوردستانێ بیت، دژی پر‌وسه‌یا سیاسی و دژی حوكمه‌تا ئیراقێ و دژی به‌رنامه‌یێ هه‌ڤپه‌یمانیا ئیداره‌یا ده‌وله‌تێ بخوه‌یه ژی.
جهێ حێبه‌تیێ یه هه‌رده‌مێ سه‌قایه‌كێ ئه‌رێنی د ناڤبه‌را به‌غدا و هه‌رێما كوردستانێ دا دروست دبیت و ده‌لیڤه‌یه‌ك بۆ چاره‌سه‌ریا گرفتان په‌یدا دبیت، ئێكسه‌ر دادگه‌ها فیدرالی كار بۆ تێكدانا وێ ده‌لیڤه‌یێ كریه و ب بڕیاره‌كا دوژمنكارانه ده‌لیڤه ژناڤبریه و بوویه ئه‌گه‌رێ ئالۆزتربوونا كێشه‌یان. دیاره ئه‌جیندایه‌كا ب گومان بجه دئینیت و جهێ دادگه‌ها شۆڕه‌شێ (محكمه الپوره) یا ڕژێما به‌رێ گرتیه.
ل ڤێرێ داخوازێ ژ حوكمه‌تا ئیراقێ و ئالیێن هه‌ڤپه‌یمانیا ئێداره‌یا ده‌وله‌تێ پێكئینای دكه‌م هه‌لویستێ خوه ل دۆر ڤێ پێشێلكاری و دژایه‌تیكرنێ نیشان بده‌ن كو ژ ئالیێ دادگه‌ها فیدرالی ڤه دژی به‌رژه‌وه‌ندیێن ئیراقێ و هه‌رێما كوردستانێ دهێنه ئه‌نجامدان.
