سه‌رۆك بارزانی د سالیادا 34 یا ئه‌نفالێن به‌هدینان دا:گه‌لێ كورد چ جاران زمانێ زۆرداریێ و تاوانێ قبوول ناكه‌ت
ب هه‌لكه‌فتا سالیادا قوربانیێن تاوانا ئه‌نفالێن به‌هدینان، سه‌رۆك بارزانی په‌یامه‌ك به‌لاڤكر و راگه‌هاند، گه‌لێ كورد چ جاران زمانێ زۆرداریێ و تاوانێ قبوول ناكه‌ت.
ده‌قێ په‌یاما سه‌رۆك مه‌سعود بارزانی، ب هه‌لكه‌فتا ده‌ربازبوونا 34 سالان ل سه‌ر تاوانا ئه‌نفالێن به‌هدینان :
ل 25 ئاب 1988 هه‌تا شه‌شێ ئیلۆنا 1988 ل درێژیا زنجیره تاوانێن رژێما ئیراقێ ل دژی خه‌لكێ كوردستانێ، پشكه‌كا مه‌زن ژ ده‌ڤه‌ر و گوندێن به‌هدینان كه‌فتنه به‌ر هه‌وا نه مرۆڤانه یا كیمیابارانكرن و گده‌سته‌سه‌ركرن و كوشتن و ڤه‌گوهاستن و ئه‌نفالكرنا وه‌لاتیێن بێ تاوان ژ ئالیێ هێزێن رژێما وی سه‌رده‌می یا ئیراقێ، ژ ئه‌نجامێ وێ تاوانا نه مرۆڤانه ب هزاران وه‌لاتیێن كوردستانێ شه‌هید و بێ سه‌روشوین و ئاواره بوون و ب سه‌دان گوند هاتنه خرابكرن.
مه‌به‌ستا رژێمێ ژ وێ ره‌فتارا شوڤینی و ئه‌و تاوانه مه‌زن گوهۆرینا دیموگرافیا كوردستانێ و شكاندنا ئیرادا گه‌لێ كوردستانێ ب رێیا چه‌كێ و سته‌مكاریێ بوو. به‌لێ ئیرادا گه‌لێ كوردستانێ بۆ مانێ و ئازادیخوازیێ سه‌ركه‌فت و دوژمن و نه‌یار و تاوانبار كه‌فتنه د زبلدانا دیرۆكێدا.
ب هه‌لكه‌فتا 34 سالیا تاوانا ئه‌نفالێن به‌هدینان سلاڤان بۆ گیانێ پاقژێ شه‌هیدێن كومكۆژیا كوردێن فه‌یلی و ئه‌نفالێن به‌هدینان و گه‌رمیان و بارزان و هه‌موو شه‌هیدێن رێیا ئازادیا كوردستانێ دهنێرین. د ڤێ هه‌لكه‌فتا دلته‌زیندا رادگه‌هینین كو گه‌لێ مه چ جاران زمانێ زۆرداریێ و تاوانێ قبوول ناكه‌ت و پێدڤیه ده‌وله‌تا ئیراقێ ژی قه‌ره‌بوویا هه‌موو وان تاوان و سته‌مكاریان بده‌ت كو دژی ملله‌تێ مه هاتینه ئه‌نجامدان.
