سەرکردەکێ پارتی: ھەر کەس و لایەنەکێ ب تنێ ل گەل عەبادی ڕێککەڤیت خیانەتە
ئه‌ڤرۆ نيوز
ئەندامەکێ جڤاتا سەرکردایەتیا پارتی دیموکراتی کوردستان راگەھاند، ئەو ناڤێن بۆ پۆستێن وەزارەتان ل بەغدا ژلایێ دەزگەھێن ڕاگەھاندنێ ڤە ھاتینە بەلاڤکرن، بەربژارێن کوردان نینن و ھەر کەس و لایەنەکێ بێی حزبێن کوردستانی ل گەل عەبادی ڕێککەڤیت خیانەتە و جھێ قەبوولکرنێ نینە، ھەروەسا دیارکر، شیعان پرس ب پارتی نەکریە بۆ گۆھۆڕینێن دێ ھێنەکرن، بەلێ ھەر وەزارەتەکا بەر کوردان بکەڤیت، دێ بەھرا پارتی دیموکراتی کوردستان بیت.
ئەحمەد کانی، ئەندامێ جڤاتا سەرکردایەتیا پارتی دیموکراتی کوردستان و بەرپرسێن پەیوەندیێن نیشتمانی یێن پارتی بۆ ڕۆژناما ئەڤرۆ گۆت” ئەوا نوکە حەیدەر عەبادی سەرۆک وەزیرێن عیراقێ دکەت کارەکێ شاشە، پێدڤیە عەبادی ل گەل لایەنێن کوردی ڕێککەڤیت و ل گۆرەی ئەنجامێن ھەلبژارتنێن بۆری، پۆست د حوکمەتا عیراقێ دا بھێنە بەلاڤکرن، ھەکە عەبادی ژدەرڤەی ڕێککەفتنێ ل گەل ھەر کەس و لایەنەکێ کوردستانی ڕێککەڤیت و پۆستێن حوکمەتێ تژی بکەت، ئەڤە بێگومان کارەکێ شاشە و ناھێتە قەبوولکرن ژلایێ کوردان ڤە و بۆ چو لایەنەکێ کوردی ژی نینە تنێ ل گەل سەرۆک وەزیرێن عیراقێ ڕێککەڤیت، ھەموو لایەن پێکڤە دێ بەرنامێ خوە پێشکەشی عەبادی کەن، ھەموو لایەنێن سیاسی یێن کوردی ل بەغدا ڕێککەفتن د ناڤبەرا خوەدا یا ھەی و پێشبینی دھێتەکرن دو وەزارەت بەر کوردان بکەڤن و دێ بۆ پارتی دیموکراتی کوردستان بن، چونکی بەری نوکە پۆستێ سەرۆک کۆماری مە دایە ئێکەتیێ و جێگرێ سەرۆکێ جڤاتا نوونەران دایە بزاڤا گۆڕان، پارتی تنێ پۆستێ جێگرێ سەرۆک وەزیران ھەبوو ئەوژی نەمایە، لەوما ھەر پۆستەکێ نوو بەر کوردان بکەڤیت، دێ بۆ بەربژارێن پارتی بیت.
ئەندامێ سەرکردایەتیا پارتی گۆت ژی” ھەر کەسەک ژدەرڤەی حزبێن کوردستانی سیڤیێ خوە بۆ حوکمەتا عیراقێ پێشکەش بکەت، یان گەل حەیدەر عەبادی ڕێککەڤیت، ئەڤە خیانەتا نیشتیمانیە و مللەت ڤی کەسی ب خیانەتکار دزانیت، ئەم وەکی پارتی دبەرھەڤ نینین ب تنێ ل گەل عەبادی ڕێککەڤین، ژ بەر کو مە ل گەل لایەنێن کوردی ڕێککەفتن یا ھەی، بەلێ ب پشتراست ڤە دبێژم ھەر پۆستەکێ نوو بۆ کوردان ل بەغدا ھەبیت، دێ بەھرا پارتی بیت، ھندەک ناڤ بۆ پۆستێن وەزارەتان ژلایێ دەزگەھێن ڕاگەھاندنێ ڤە یێن ھاتینە بەلاڤکرن، ئەو کەس ژی ب چو شێوەیەکی بەربژارێن کوردان نینە، ئەو گۆھۆڕینێن دناڤ حوکمەتا عیراقێ دا دھێنەکرن پەیوەندی ب ناڤمالا شیعی ڤە ھەیە و باوەرناکەم عیراق یا سەرکەفتی بیت پشتی ڤان گۆھۆڕینان، ئەم وەکی پارتی دیموکراتی کوردستان نەھاتینە ئاگەھدارکرن ژلایێ سەرکردێن شیعی ڤە بۆ گۆھۆڕینێن دێ ھێنەکرن و پرس ب مە نەھاتیەکرن دێ چاوان بیت و مەرەما وان چیە”.
