سەرۆك بارزانی بۆ وەغەركرنا حەمید ئەفەندی: برا و دۆست و هەڤسەنگەر و هەڤالەكێ خوەشتڤی من ژ دەست دا
ئەڤرۆ
سەرۆك مەسعود بارزانی بۆ وەغەركرنا حەمید ئەفەندی پەیامەكا بەهیداریێ بەلاڤكر و ڕاگەهاند، كوردستانێ پێشمەرگەیەكێ قەهرەمان ژ دەستدا، من ژی برا و دۆست و هەڤسەنگەر و هەڤالەكێ خوەشتڤی ژ دەستدا.
دەقێ پەیاما سەرۆك بارزانی بۆ وەغەركرنا خەباتكەرێ ناڤدار یێ گەلێ مە حەمید ئەفەندی:
ب مخابنیەكا مەزن ڤە ل ئێڤاریا ڕۆژا ئەینی 17/2/2023 پێشمەرگە و فەرماندێ خەباتكەر و نیشتمانپەروەرێ گەلێ مە حەمید ئەفەندی وەغەركر.
حەمید ئەفەندی ل قۆناغێن جودا جودا یێن بەرخودان و خەباتا گەلێ مە و پارتی دیموكراتی كوردستان ل شۆڕەشا ئەیلوولێ و گۆلانێ و سەرهلدانێ و هەروەسا ل قۆناغا پشتی سەرهلدانێ و شەڕێ ئازادكرنا ئیراقێ و د شەڕێ دژی تیرۆرستێن داعشێ دا پێشمەرگە و فەرماندەیەكێ ئازا و بەرگریكارەكێ ب هێز یێ بها و ئارمانجێن گەلێ كوردستانێ بوو. حەمید ئەفەندی ژیێ خوە ژ پێخەمەت دۆزا ڕەوا یا گەلێ خوە تەرخانكر و پێشمەرگەیەكێ وەفادارێ ڕێبازا بارزانی و كوردایەتیێ و بەردەوام جهێ باوەریێ و پشتبەستنێ بوو.
وەغەركرنا حەمید ئەفەندی بۆ مە هەموویان خەمەكە مەزنە، كوردستانێ پێشمەرگەیەكێ قەهرەمان ژ دەستدا و من ژی برا و دۆست و هەڤسەنگەر و هەڤالەكێ خوەشتڤی ژ دەستدا. سەرەخوەشیێ ل خوە و سەركردایەتی و كادر و ئەندام و ئالیگرێن پارتی و هەڤال وهەڤسەنگەر و مالباتا بەرێز و كەسوكارێن رحمەتی حەمید ئەفەندی و هەموو خەلكێ كوردستانێ و پێشمەرگێن قەهرەمان دكەم.
ژ خودێ مەزن دخوازم گیانێ رەحمەتێ حەمید ئەفەندی ب بەهەشتا بەرین شاد بكەت و سەبر و ئارامیێ ب هەموو ئالیەكی ببەخشیت.
هەر ب هەلكەفتا وەغەركرنا خەباتكەرێ ناڤدار یێ گەلێ مە حەمید ئەفەندی، سەرۆكێ هەرێما كوردستانێ، نێچیرڤان بارزانی و سەرۆكێ حوكمەتا هەرێما كوردستانێ، مەسرور بارزانی پەیامێن بەهیداریێ و هەڤخەمیێ بەلاڤكرن.
