شاندێ هه‌رێمێ ناچيته به‌غدا و ئه‌و دێ هێنه كوردستانێ
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ راگه‌هاند كو روونشتنا ئه‌ڤرۆ يا په‌رله‌مانى ژ به‌ر گرنگيا بابه‌تان ب نهێنى هاته گێران و سه‌رۆكێ حوكمه‌تا هه‌رێما كوردستانێ ژى دا زانين شاندێ هه‌رێما كوردستانێ ناچيته به‌غدا و ئه‌و دێ هێنه هه‌رێما كوردستانێ و ئيدارا په‌ترۆلێ ژى دێ د ده‌ستێن هه‌رێمێ دا بيت.
محه‌مه‌د عه‌لى ياسين بۆ ئه‌ڤرۆ نيوز گۆت: “ئه‌ڤرۆ 10\11 كۆمبوونا په‌رله‌مانێ كوردستانێ ب ئاماده‌بوونا نێچيرڤان بارزانى سه‌رۆكێ حوكمه‌تا هه‌رێما كوردستانێ و قوباد ته‌له‌بانى جێگرێ سه‌رۆكێ حوكمه‌تا هه‌رێما كوردستانێ و وه‌زيرێن دارايى و سامانێن سرۆشتى و پلاندانانێ و سكرتێرێ حوكمه‌تێ هاته گێران و تێدا نێچيرڤان بارزانى په‌يڤه‌ك پێشكێش كر”.
ئاخفتنكه‌رێ ب ناڤێ فراكسيۆنا پارتى ديموكراتى كوردستان ل په‌رله‌مانێ كوردستانێ زێده‌تر گۆت: “نێچيرڤان بارزانى سه‌رۆكێ حوكمه‌تا هه‌رێما كوردستانێ د گۆتارا خوه يا ئه‌ڤرۆ دا ماژه ب وێ چه‌ندێ كر كو د وارێ په‌ترۆلێ دا، هه‌رێم ناڤه‌گه‌ريته سه‌ر خالا چنه‌يێ و دڤێت هه‌رێم ئيدارا په‌ترۆلا خوه بكه‌ت”.
ئاماژه ب وێ چه‌ندێ ژى كر كو سه‌رۆكێ حوكمه‌تێ ته‌كست ل سه‌ر وێ چه‌ندێ ژى كر كو هه‌رێم قه‌بوول ناكه‌ت به‌هرا هه‌رێمێ ژ 17% كێمتر بيت ژبلى پۆستێن سه‌روه‌رى يێن عيراقێ.
محه‌مه‌د عه‌لى ياسين گۆتژى: “د په‌يڤا خوه سه‌رۆكێ حوكمه‌تێ دا زانين كو ئه‌و نه ب له‌زن و شاندێ هه‌رێمێ ناچيته به‌غدا، دێ عادل عه‌بدولمه‌هدى وه‌زيرێ په‌ترۆلا عيراقێ هێته كوردستانێ”.
دا زانين ژى كو نێچيرڤانى بارزانى گۆت كو ئه‌و دێ چاڤه‌رێ هاتنا وى كه‌ن و هه‌كه كێشه چاره نه‌بوو، دێ ل په‌رله‌مانێ كوردستانێ بڕيارێ ل سه‌ر هه‌لويستێ خوه ده‌ن.
