شـۆڕشـا ئیلۆنـێ شـۆڕشا ئێكگرتن و ئێك ههلوهستیا كوردستانیان بوو
نـهوزاد زاده
شۆڕشا ئیلۆنێ، ب ئێك ژ گرنگترین وهرچهرخانێن دیرۆكی یێن خهباتا گهلێ كورد ل پێناڤ ماف و ئازادییان دهێته هژمارتن، ئهڤ شۆڕشه كو ب سهركردایهتیا بارزانیێ نهمر بوو كو ب پشكداریا تهخ و چینێن جودا یێن گهلێ كوردستانێ ل ههمی دهڤهرێن كوردستانێ شێوهیهكێ سهرانسهری ب خۆڤه گرت.
شۆڕشا ئیلۆنێ نه تنێ شۆڕشهكا ناڤخۆیی بوو، بهلكو قووناغهكا نوو بوو د دیرۆكا خهباتا نهتهوهیی یا كوردان دا، چونكو ب رێبهریا بارزانیێ نهمر شیانا كوردان بۆ ئێكگرتن و رێكخستن و خهباتكرنێ بۆ مافێن نهتهوهیی نیشا دا، ئهڤ شۆڕشه وهكو ئێك ژ گرنگترین شۆڕشان د دیرۆكا نوێ یا كوردستانێ دا دهێته هژمارتن، كو كاریگهرییهكا درێژخایهن ل سهر بزاڤا نهتهوهیی یا كوردی و پێگههی سیاسی یێ كوردان ههبوو، و شیا ماف و داخوازیێن گهلێ كورد ب دهنگهكێ بلندتر بگههینیت.
بارزانیێ نهمر ژبهركو ئهزموونهكا زۆرا سیاسی و شۆرشگێری ههبوو دزانی سهركهفتنا شۆرشێ و پێشمهرگهیان بێ پشتهڤانیا جهماوهری بسهرناكهڤیت، لهوما بدهستڤهئینانا پشتهڤانیا جهماوهری ئێك ژ ئارمانجان بوو، د ڤێ شۆرشێ دا داستانێن مهزن هاتنه تۆماركرن ژ وان ژی داستانا زاویته و چیایێ هندرین و ..هتد، گورزێن مهزن و ب هێز ل داگیركهرێن كوردستانێ هاتنهدان، دیسا ژ رویێ جڤاكی و سیاسی ڤه د ڤێ شۆرشێ دا گوهۆرین چێبوون كو ڤێ شۆرشێ هوشداریا نیشتمان پهروهریێ ل دهڤ كوردستانیان بهێز و زێدهكر و ههتا نوكه ب شانازی ڤه ببێژن رۆژهكێ ژ رۆژان وهك ئهركهكێ نهتهوهیی ئهم پشكهك بووین ژ ڤێ شۆرشێ بۆ بهرهڤانیكرن ژ ماف و داخوازیێن ڕهوا یێن گهلێ كوردستانێ، ههروهسا ههر د شۆرشا ئیلۆنێ دا گهلێ كورد پتر هاته نیاسین د بیاڤێ نیڤدهولهتێ دا و دبلۆماسیهتا كوردی ب هێزبوو ل سهر ئاستێ ههرێمی و نیڤدهولهتی ڤه.
شۆڕشا ئیلۆنێ ژمارهیهكا دهستكهفتێن نهتهوهیی یێن گهلهك گرنگ ههبوون، رێككهفتننامهیا ١١ێ ئادارا ١٩٧٠ ژ گرنگترین دهستكهفتێن ڤێ شۆڕشێ بوو، كو دانوستاندن و ڕێككهفتن ل سهر مافێن گهلێ كوردستانێ بهر ب قووناغهكا نوی ڤه بر. ئێك ژ گرنگترین پهیامێن شۆڕشا ئیلۆنێ ئهو بوو كو ئێكگرتنا گهلێ كورد بنهمایێ سهركهفتنێ یه، دهمێ كورد بۆ بهرژهوهندیێن نهتهوهیی ب ههڤ ڕاوهستن، دێ هێزا وان زێدهتر بیت و دێ شێن بهر ب مافێن خۆ پێشڤه بچن.
ساخكرنا سالرۆژ ڤێ شۆڕشێ تنێ بۆ بیرئینانا دیرۆكێ نینه، بهلكو وانهیهكه بۆ داهاتی ژی كو پێدڤیه ل سهر ههمی حزب و لایهنێن سیاسی یێن كوردستانێ و ههروهسا خهلكێ كوردستانێ ژی بهرژهوهندیێن گهل ل سهر ههمی بهرژهوهندیهكێ دابنن، ههمی پێكڤه ب ئێكڕێزی و ئێك ههلوهستی ل پێناڤی گهلێ كوردستانێ كار بكهن، ب تایبهتی د ڤێ قووناغا ئالۆز یا ئهڤرۆ دا كو پاراستنا دهستكهفتێن دیرۆكی و زێدهتر بهر ب پێشڤهبرنا كوردستانێ، پێدڤی ب ئێكگرتنێ و ههڤكارییهكا بهردهوامه.
د نوكهدا گرنگترین وانهیا شۆڕشا ئیلۆنێ بۆ مه ئهوه كو ئێكگرتن هێزا مهیه لهوما دڤێت ههمی دهمان بهرژهوهندیێن گهلێ كوردستانێ و پاراستنا ههرێما كوردستانێ بهری ههر بهرژهوهندیهكێ بن.
