شۆڕەشا چاكسازیێ، دربەك بۆ نەهێلانا گەندەلیێ
عەبدولرەحمان مەحموود
د تەرازیا ملەتێن پێشكەفتی دا، هەمی دەما چاكسازی، د وارێن جودا یێن حوكمڕانیێ دا ئێك ژ پێشینەیێن كارێن وان دهێت، هەردەما وان دیت، گەندەلی یا سەرێ خۆ دهەلینیت و تاكان ژ خۆ ددەت، ئێكسەر ڕادبنە سەر پێ و ناهێلن وەلاتێ وان بكەڤیتە دناڤ گوما گەندەلی و قەیرانێن جۆراوجۆر دا، لەوما دەما دبینن گەندەلی یا جهێ خۆ خۆش دكەت، هەر زوی دەست ب چاكسازیان دكەن، داكو هەر زوو، ڕهێن هەر گەندەلی و قەیرانەكێ قوت بكەن و نەبنە ئاستەنگ ل هەمبەر بڕێڤەچوونا كاروبارێن حوكمەتێ، گەر تەماشەكەین وەلاتێن پێشكەفتی چاكسازی ل دەف وان، نە بتنێ درووشمەكێ سیاسی یە، بەلكو پێدڤیەكا هەردەمی و نیشتمانی یە، بۆ پاراستنا قەوارە و پاشەڕۆژا هەر جڤاكەكی، دەما ئەم باسێ شۆڕەشا چاكسازیێ دكەین، ئەم باس ل وەرچەرخانەكا رهـ و ڕیشالی دكەین؛ شۆڕەشەك كو چەكێ وێ یێ سەرەكی یاسا و شەفافیەتە د هەمی دام و دەزگەهێن حوكمەتێ دا و ئارمانجا وێ یا هەرە مەزن ژی لێدانا دربەكێ كوژەك و بێ دلوڤانیە د جەستەیێ گەندەلیێ دا، چونكی گەندەلی، مەزنترین دژمنێ پێشكەفتن و دادپەروەریێ یە، ڕێگرەكە ل هەمبەر هەر پێنگاڤەكا جڤاك بەر ب پێشڤە بهاڤێژیت و داهات و ئارمانجێن گەنجان ژناڤ دبەت، هەر لایەن و جورەكێ گەندەلیێ چو دارایی بیت، كارگێڕی یان سیاسی بیت، دبیتە ئەگەرێ پاشكەفتنا بەرهەم ئینانێ و لاوازبوونا باوەریا هەڤوەلاتیا ب دەستهەلاتێ و تێكدانا هەڤسەنگیا جڤاكی، ل ڤێرێ چاكسازی دبیتە ئەركەكێ نەتەوەیی كو چو ڤەزڤڕین تێدا نینە، ئەڤجار ئەگەر مە بڤێت شۆڕەشا چاكسازیێ، بۆ هندێ یا سەركەفتی بیت و ببیتە دربەكێ كارا دژی گەندەلیێ، پێدڤیە بەری هەر تشتەكی یاسا سەروەر بیت و ڕۆلێ خۆ یێ دروست بگێڕیت، چونكی ئەو دەمێ یاسا ب سەر هەمیا دا وەك ئێك هاتە جێبەجێكرن، دەرگەهێ دزینێ و دەست بسەرداگرتنا مۆلكێ گشتی دهێتە گرتن، د دەولەتا چاكسازیێ دا، چو كەس ژ یاسایێ بلندتر نین، لێپرسینەڤە دگەل هەر كەسەكێ كەمترخەم، ستوونا پشتا گەندەلیێ دشكێنیت، بێگومان چاكسازی بتنێ ب بڕیارێن سەرێ دەسەلاتێ ناچیتە سەر، بەلكو پێدڤی ب هۆشیاری و پشتەڤانیا جڤاكی هەیە، پێدڤی یە ڕاگەهاندن، ڕەوشەنبیر و تاك ب تاكێ جڤاكێ بببنە چاڤێ دلسۆزێ ڤێ شۆڕەشێ، بێدەنگ بوون ل سەر گەندەلیێ، پشكدارییە د تێكدانا پاشەڕۆژا ڤی ملەتی، ئەڤجار ئەو دربێ ل گەندەلیێ دهێتە دان، دێ دەرگەهێ ئاڤەدانیێ، گەشەپێدانێ و دادپەروەریێ بۆ پاشەڕۆژا كوردستانێ ڤەكەت و سەروەت و سامانێ ڤی وەلاتی ب هەدەر ناچیت و كوردستان ڕۆژ ب ڕۆژ دێ پێنگاڤێن پێشڤەچوونێ هاڤێت، هەرچەندە ل دەستپێكا پێكئنانا كابینەیا نەهێ، سەروكێ حوكمەتێ دەست ب پڕۆسا چاكسازیێ كریە و ئەڤ ئێكە ژ پێشینەیێن كارێ كابینەیا نەهێ بوویە، هەلبەت پێنگاڤێن باش دڤی بواری دا هاتینە هاڤێتن و ئەو ڕوتینا جاران ل دام و دەزگەهێن حوكمەتێ تا ڕاددەیەكێ باش كێم بووینە، ئەڤجار بەردەوامی دان ل سەر ڤێ پڕۆسێ، دێ ڕهێن گەندەلیێ ژ ڕیشالان دەرئێخیت و تەڤ داهات و سامانێ ڤی ملەتی دێ كەڤیتە د خزمەتا بەڕژەوەندیا گشتی دا.
