عه‌بادێ دێ گوهۆڕينان د ده‌سته و پێكهاتێن حوكمه‌تێ دا كه‌ت
ئه‌ڤرۆ نيوز، نيوار محه‌مه‌د سه‌ليم:
ئه‌ندامه‌كێ جڤاتا نوونه‌ران رادگه‌هينيت كو عه‌بادى دێ گوهۆڕينان ئێخيته ناڤ پۆستێن ده‌سته‌يێن سه‌ربه‌خۆ و بۆ هه‌ڤسه‌نگيا شيعى سونى كوردى ل عيراقێ دێ گوهۆڕينان كه‌ت.
ئوسمان تاهر دۆسكى، ئه‌ندامێ جڤاتا نوونه‌رێن عيراقێ بۆ مالپه‌رێ شرۆڤه گۆت: “جڤاتا وه‌زيران لژنه‌ك بۆ پێداچوونێ د هه‌موو پۆستێن ل عيراقێ هه‌ين دا هاتيه پێكئينان”.
زێده‌تر دبێژيت: “ئه‌ڤ گوڕانكاريه بۆ هه‌ڤسه‌نگكرنا پشكا شيعه و سنونه و كوردانه، دێ هه‌ر ئێك ژ رێڤه‌به‌رێن گشتى و بريكارێن وه‌زيران و ده‌سته‌يێن سه‌ربه‌خۆ ب خوه ڤه گريت، به‌لێ هێشتا ده‌ست ب كار نه‌بوويه”.
دا زانين ژى كو هێشتا كوردان ژ د ناڤا خوه دا ئه‌ڤ پۆستێن دێ بۆ وان كه‌ڤن ل سه‌ر فراكسيۆنا به‌لاڤ نه‌كرينه و گۆت: “به‌لێ لژنه‌كا بچووك بۆ دووڤچوون و پێداچوونا كارێ ڤێ لژنێ هاتيه پێكئينانان”.
ده‌سته‌يێن سه‌ربه‌خۆ ل عيراقێ 26 ده‌سته‌نه و 11 دێ بۆ شيعان و 10 بۆ سونان و پێنج ژى بۆ كوردان دێ كه‌ڤن، به‌لێ هه‌تا نوكه د ناڤا لايه‌نێن سياسى دا نه‌هاتينه ئێكلاكرن ب گۆره‌يى ڤى په‌رله‌مانتارى.
كوردان هه‌ر ئێك ژ ده‌سته‌يا كۆمسيۆنا بلندا سه‌ربه‌خۆيا هه‌لبژارتنان و مافێ مرۆڤى و راگه‌هاندن و په‌يوه‌ندى و هه‌ڤسه‌نگى و ده‌سته‌يه‌كا دى ب به‌ر دكه‌ڤن.
هه‌ر ب گۆره‌يى گۆتنێن دۆسكى ئه‌ڤ گوهۆڕينه دێ هه‌ر ئێك ژ سه‌رۆكاتيا كۆمار و جڤاتا وه‌زيران و جڤاتا نوونه‌رێن عيراقێ ب خوه ڤه گريت.