عیراق گه‌فێن ده‌ركرنا رێكخراوێن نیڤده‌وله‌تى ژكوردستانێ دكه‌ت
ئه‌ڤرۆ نیوز، نه‌وزاد هلۆرى:
پشتى 16 ئوكتۆپه‌را 2017، هه‌ول و بزاڤێن عیراقێ بۆ دۆرپێچا ئابوورى زۆر بووینه و دنهادا عیراق بزاڤێن ده‌ركرنا رێكخراوێن نیڤده‌وله‌تى ژ هه‌رێما كوردستانێ دكه‌ت و دخوازیت ئه‌و پاره‌یێ كو ب رێیا وان رێكخراوان دهێته هه‌رێمێ ببریت و بۆ عیراقێ بزڤرینیت.
عه‌بدولا خالد سه‌رۆكێ رێكخراوا ئاشتى و ئازادى ل كوردستانێ دیاركر كو نها چار رێكخراوێن نیڤده‌وله‌تى كه‌فتینه به‌ر گه‌ڤێن دژوار و هه‌كه تشته‌ك نه‌هێته‌كرن ره‌نگه بهێنه ده‌ركرن و گۆت” ده‌ركرنا رێكخراوێن نیڤده‌وله‌تى ژ هه‌رێما كوردستانێ ، یان ڤه‌گوهاستنا وان بۆ به‌غدا چو بنه‌مایێن قانوونى و ده‌ستوورى بۆ نینن و تنێ مه‌ره‌م ئه‌وه كو دورپێچا ئابوورى یا ل سه‌ر هه‌رێمێ هه‌ى دژوارتر لێ بهێت و ئه‌و پاره‌یێ كو ب رێیا وان رێكخراوان دهێته كوردستانێ ببرن و بۆ عیراقێ ببه‌ن”.
زێده‌تر گۆت” پتريا وان رێكخراوان كار و خزمه‌تان ژ بۆ ئاواره و په‌نابه‌ر و هوشیاركرنا مرۆڤایه‌تى و كێمكرنا كێشه و دابینكرنا ماف و ئازادیێن مرۆڤایه‌تى ل جیهانێ و كوردستانێ ژى كاردكه‌ن و ب ده‌ركرنا وان دێ زیانێن مه‌زن گه‌هنه كوردستانێ، ژبه‌ركو ئه‌و رێكخراو ل سه‌ر ئه‌ركێ خوه هه‌موو چالاكیان دكه‌ن و پاره‌یه‌كێ باش ژى بۆ هه‌ژار و خه‌لكى دابین دكه‌ن”.
دیاركر ژى كو نها چار رێكخراوێن مه‌زن وه‌كو رێكخراوا ڤێراگه‌هشتنا نه‌رویجى يێن كه‌فتینه به‌ر هه‌ره‌شه‌یان و هوشداریا باركرنێ ژ كوردستانێ بۆ هاتیه، گۆت ژى” ب ره‌نگه‌كێ گشتى زێده‌ترى 100 رێكخراوێن نیڤده‌وله‌تى و بیانى ل كوردستانێ يێن هه‌ين و سالانه ب رێیا خوه ده‌هان چالاكیێن جودا جودا پێشكێشى خه‌لكێ كوردستانێ دكه‌ن”.
