فلمێ مە یێ کوردی یێ بناڤێ (جیران) ل باژێڕێن ڕۆژئاڤایێ کوردستانێ هاتە نیشادان
زاخۆ، دلۆڤان هالۆ:
دەرهێنەرێ کورد (مانۆ خەلیل) د دیدارەکێ دا بۆ ڕۆژناما ئەڤرۆ دیارکر کو پشتی فلمێ مە یێ سینەمایی یێ کوردی بناڤێ (جیران) پشکداری د چەندین ڤیستەڤالێن نێڤدەولەتی یێن فلمان دا کری و چەندین سەرکەفتن و خەلات ب دەستڤەئیناین، ل سینەمایێن ڕۆژئاڤایێ کوردستانێ ل باژێڕێن کوردی وەکو قامشلۆ و عاموودێ و دێرکێ و ڕۆمێلان و تربەسپیێ و دەربەسیێ هاتە نیشاندان.
ناڤهاتی ئاماژە ب وێ چەندێ ژی کر، کو نیشاندانا ڤی فلمی دەلیڤە پەیداکر ژ بۆ وێ چەندێ کو پشتەڤانێن ڕۆژئاڤایێ کوردستانێ ژ نێزیك ڤە ئێك ژ گرنگترین بەرهەمێن سینەمایی یێن کوردی ببینن، لەوما ئەز سۆپاسیا وان بینەرێن کورد دکەم یێن کو پێشوازی ل بینەریا فلمێ مە کرین، بێ گۆمان پشتەڤانیا وان ل هونەر و سینەمایا کوردی بەشەکە د گەهاندنا پەیامەکا مرۆڤایەتی و مێژوویی دا.
گۆت ژی:»ئەڤ فلمە بەحسێ چیڕۆکا زاڕۆکەکێ کورد یێ شەش سالی دکەت، کو ل گۆندەکێ نێزیك سنۆرێ باکوور و ڕۆژئاڤایێ کوردستانێ یێ سەر ب باژێڕێ قامشلۆ ڤە دژیت، و مالباتا وی دناڤبەرا هەر دوو وەلاتێن تورکیا و سوریا دا هاتیە دابەشکرن، و هەروەسا ئەڤ فلمە بەحسێ زۆلما50ی سالیا ڕژێما بەعس دکەت، و ئەڤ فلمە بۆ هەموو کوردان یا پڕە ژ خەم و ئازار و بیرهاتنێن نەخوەش، وەکو ئەو زاڕۆکێ ژبەر ئاخفتنا ب زمانێ کوردی دهێتە قوتان و ل قوتابخانێ ب زمانێ عەرەبی د ئاخڤیت و ل مالێ ژی ب زمانێ کوردی دئاخڤیت، و بەحسێ وی سنۆری دکەت یێ کو مال و کەلتوور و هەست و مرۆڤایەتی دابەش کری».
زێدەتر ژی گۆت:»ئەز سۆپاسیا وان هەموو کەسان دکەم یێن کو ڕابووین ب ڕێکخستن و بەرهەڤکرنا نیشاندانا ڤی فلمی ل باژێڕێن کوردی یێ ڕۆژئاڤایێ کوردستانێ، بێ گۆمان بێی زەحمەت و وەفاداری و ماندیبوونا وان ئەڤ کارە نە دهاتە ئەنجامدان».
