فیستەڤالا گەرا ٢٥ یا پەیمانگەھا ھونەرێن جوان ل دھۆکێ دێ ھێتە گێڕان
ئەڤرۆ نیوز، رێوار مزیری:
ل ژێر درووشمێ (ھونەر ھزرێن جوان ھەمبێز دکەت) پەیمانگەھا ھونەرێن جوان ل دھۆکێ دێ فیستەڤالا خوە یا گەرا ٢٥ ێ ب چاڤدێریا (فەرھاد ئەمین ئەترووشی) پارێزگەرێ دھۆکێ ل رۆژێن ٢٧ ھەتا ٢٩/٤/٢٠١٩ێ ل ھۆلا کۆنفرانسان ل زانکۆیا دھۆکێ و پشکێن پەیمانگەھێ گێڕیت.
بشار محەمەد تاھر، رێڤەبەرێ پەیمانگەھا ھونەرێن جوان ل دھۆکێ بۆ رۆژناما ئەڤرۆ دیار کر کو فیستەڤالا پەیمانگەھا ھونەرێن جوان بۆ دەمێ چەندین سالان ژ بەر قەیرانا دارایی نەھاتبوو ئەنجامدان، ھەروەسا ل سالا ٢٠٠٣ێ ژی فیستەڤال نەھاتبوو ئەنجامدان، بەلێ ئەڤ سالە دێ پەیمانگەھا ھونەرێن جوان ل دھۆکێ فیستەڤالا خوە یا گەرا ٢٥ گێڕیت و ھەموو بەرھەڤی ژی بۆ ڤێ مەرەمێ ھاتینە کرن و گۆت: “فیستەڤال دێ ل رۆژا ٢٧/٤/٢٠١٩ێ ل دەمژمێر ٦:٠٠ ئێڤاری ب کۆنسێرتا پشکا مۆزیکێ ل ھۆلا کۆنفرانسان ل زانکۆیا دھۆک دەست پێ کەت و ل رۆژا ٢٨/٤/٢٠١٩ێ ل دەمژمێر ١٠:٠٠ سپێدێ دێ پێشانگەھا پشکا شێوەکاری ل پەیمانگەھێ ھێتە ڤەکرن و ئەڤ پێشانگەھە ھەتا ئێڤاریا رۆژا ٢٩/٤/٢٠١٩ێ دێ یا رەردەوام بیت، ھەروەسا ھەر ل رۆژا ٢٨/٤/٢٠١٩ێ ل دەمژمێر ٥:٠٠ ئێڤاری دێ شانۆگەریا پشکا شانۆیێ یا بناڤێ (ھەمی دزیکەر ناھێن بۆ زیانێ) ھێتە نیشادان و ل رۆژا ٢٩/٤/٢٠١٩ێ ئەڤ شانۆگەریە ل ھەمان دەم ھێتە دووبارەکرن”.
ناڤھاتی ئاماژە دا وێ چەندێ کو ئەڤ سالە ل پشکا مۆزیکێ وان گەلەک گرنگی دایە ئامیرێن کوردی، ھەروەسا ل پشکا شێوەکاری ژی وان بزاڤ کریە گوھۆڕینێن مەزن بکەن کو ل شوونا ھەر پارچەکا کارێ شێوەکاری ل ھۆلەکێ بھێتە نیشادان وان گەلەریەکا مەزن چێکریە و دێ ھەموو کارێن شێوەکاری دێ د وێ گەلەریێ ڤە ھێنە نیشادان و گۆت: “مە چەندین گوھۆڕین د کارێ پەیکەری ژی دا کرینە و پەیکەر مە ژ ماددێ فایبەر کلاسی چێکرینە کو ماددەکێ گەلەک بھێزە و سڤکە و دشیان دایە ئەو پەیکەر ژ جھەکی بۆ جھەکێ دی بھێنە ڤەگوھاستن نەوەکو یێن ژ چیمەنتویێ و گێچێ دھاتنە چێکرن سەنگێ وان گەلەک یێ گران بوو و بۆ ڤەگوھاستنێ ب زەحمەت بوون”.
ل دووماھیێ رێڤەبەرێ پەیمانگەھا ھونەرێن جوان ل دھۆکێ خویا کر کو ئەڤ سالە ل پشکا شانۆیێ وان ڤیایە کارێ قوتابیان بەرچاڤ بکەن و ژ بەر ڤێ چەندێ د فیستەڤالا ئەڤ سالە یا پەیمانگەھێ دا بەرھەمێن شانۆیێ یێن چو مامۆستایان ناھێنە نیشادان.
