قەیران بوویە پرەك د ناڤبەرا نفشێ نوو و یێ بەرێ دا
هەرهین محەمەد
هونەرمەندێ سترانبێژ (شەریف قەیران) دیاركر كو ئەو دەمەكێ درێژبوو ئەو مژوولی چێكرنا كلیپەكێ بوو ب ناڤێ (سەی بەنی) كو ب زمانێ توركی هاتیە گۆتن و ئەڤە چەند رۆژە كلیپ هاتیە بەلاڤكرن.
ناڤهاتی د دیدارەكێ دابۆ رۆژنامەیا ئەڤرۆ گۆت: چێكرنا كلیپان نە كارەكێ ب سناهی یەو گەلەك قوناغ دەرباز دبن و دەست بۆ دەستی هەتا كو ب دووماهی دهێت و ل دەستپێكێ مەزاختیەكێ مەزن دڤێت هەتا كو مرۆڤ بشێت كلیپەكا پرۆفیشنال بەرهەم بینت و من ب خوە پرۆدەكشن هەیە و كارێ توماركرنا دەنگی و میكس و ماسترینگێ ل نك من دهێتەكرن، بەلێ هەكە سترانبێژەكێ دی بیت دبیت گەلەك زەحمەتێ و دەمی ببەت هەتا ب دووماهی بیت و گەلەك سترانبێژ قەستا من دكەن ژبۆ توماركرنا دەنگێ وان.
پەیاما من یا سەرەكی پاراستنا رەسەناتیا زمانێ دایكێ یە و پێشخستنا كەلتوورێ نەتەوەیی بۆ نفشێ نوو، لەورا نوكە هەموو دزانن كارو بەرهەمێن من یێن هونەری بووینە پرەك دناڤبەرا نفشێ نوو و یێ بەرێ دا و بڤی رەنگی شیایمە ل هەرچار پارچەیێن كوردستانێ بمە خودان بینەرو گوهدار.
