كه‌مال كه‌ركووكی:بجهئینانا ماده‌یێ 140 سه‌قامگیریا ئیراقێ دایه
پێدڤیه سه‌رژمێریه‌ك ل سه‌ر بنه‌مایێ سه‌رژمێریا سالا 195 ل كه‌ركووكێ بهێته ئه‌نجامدان
ئه‌ڤرۆ:
ئه‌ندامێ مه‌كته‌با سیاسی و به‌رپرسێ ڕێكخستنا كه‌ركووك و گه‌رمیان یا پارتی، كه‌مال كه‌ركووكی، ڕاگه‌هاند، بۆ بجهئینانا ماده‌یێ 140 ژ دستوورێ ئیراقێ پێدڤیه سه‌رژمێریه‌ك ل سه‌ر بنه‌مایێ سه‌رژمێریا سالا 195 ل كه‌ركووكێ بهێته ئه‌نجامدان.
كه‌مال كه‌ركووكی گوت ژی” بجهئینانا ماده‌یێ 140 د به‌رژه‌وه‌ندیا هه‌موو خه‌لكێ ئیراقێ و سه‌قامگیریا وێ یه، هۆكارێ بجهنه‌ئینانا وێ ماده‌یا دستووری ژی بۆ لژنه‌یا بلند یا بجهئینانا ماده‌یا ناڤبری و حوكمه‌تا ئیراقێ ژ دابین نه‌كرنا بودجه‌یا پێدڤی ووه‌رگرتنا گاڤێن بجهئینانا ماده‌یێ دزڤریت”.
سه‌باره‌ت كاراكرنا لژنه‌یا بلند یا بجهئینانا ماده‌یا 140، گوت” بزاڤه‌ك هه‌یه جاره‌كادی هادی عامری ببیته سه‌رۆكێ وێ لژنه‌یێ كو پێشتر وی ڕۆل هه‌بوو د په‌كخستنا گاڤێن بجهئینانا وێ ماده‌یێ، ئه‌ڤ بزاڤه ژی د كۆمبوونا د ناڤبه‌را ئێكه‌تیێ و ئالیێن ئیراقی یێن حوكمه‌ت پێكئینای ل مالا مام جه‌لال ل به‌غدا باس لێ هاتیه كرن”.
ئاماژه‌كر” پۆستێ سه‌رۆكێ لژنه‌یا بلند یا بجهئینانا ماده‌یێ 140، مافێ كوردایه و پشكه‌كا باره‌گه‌هێن لژنه‌یا ناڤبری ژی ل هه‌ولێرێ بن”.
كه‌مال كه‌ركووكێ باس ل به‌رده‌وامیا پرۆسه‌یا ب ئه‌ره‌بكرنێ ل باژێرێ كه‌ركووكێ كر و ڕه‌وشا نوكه یا كه‌ركووكێ ب خراب هه‌ژمارت.
ل دۆر تێكچوونا ڕه‌وشا ئه‌منی ل پارێزگه‌ها كه‌ركووكێ ل ڤێ دووماهیێ، كه‌مال كه‌ركووكی گوت” دو برایێن ئه‌ركان جبووری پارێزگارێ نوكه یێ كه‌ركووكێ داعش بوون و نوكه ئه‌و هه‌ردو ده‌ستێ وی یێ ڕاستێ و چه‌پێ نه كو ئێك ژوان سه‌ركرده‌یه‌كێ داعشێ بوو، یێ دی ژی ل حه‌ویجه پێشمه‌رگه‌یێن دیلكری به‌ربارانكربوون”.
كه‌مال كه‌ركووكی ئاماژه ب هه‌بوونا هه‌ماهه‌نگیێ د ناڤبه‌را ده‌زگه‌هێن ئه‌منی كه‌ركووكێ و چه‌كدارێن داعشێ دا كر و ب پێدڤی ژی زانی ده‌زگه‌هێن هه‌والگیری و ئه‌منی یێن ئیراقی ب هووری ڤه‌كۆلینێ د وێ دۆسیێ دا بكه‌ن.
