كۆمبوون ل بن سیهوانەیا كوردینیێ
عەبدولرەحمان مەحموود
كوردایەتی نە بتنێ پڕسەكا نەتەوەییە، بەلكو ناسنامە، دیرۆك و چارەنڤێسێ گەلەكێ ستەملێكرییە، خۆیایە د درێژاهیا دیرۆكێ دا، مللەتێ كورد خۆدانێ چەندین دەرفەتێن زێڕین بوویە بۆ بجهئینانا ئارمانجێن خۆ یێن نەتەوەیی، بەلێ گەلەك جاران ژ ڤی دەردێ هەردەمی یێ كو بەردەوام كورد ژێ دنالن؛ ئەوژی نەبوونا ئێكدەنگیێ و پرت و بەلاڤبوونا ناڤخۆییە، كو مەزنترین ئاستەنگ بوویە د ڕێكا گەهشتن ب وان ئارمانجێن گەلێ كورد یێ ئەڤە چەندەها سالە خەباتێ بۆ دكەت، ژبەر ڤێ پەرتەوازیا نها، كۆمبوون ل بن چەترا كوردایەتیێ د قووناغا ئیرۆ دا، نەك بتنێ بژارەیە، بەلكو پێدڤیاتیەكا هەستیار و نیشتمانی یە، لەومان هەر چو زویە، دڤێت سەرجەم پارت و ئالیێن كوردی بڕیارەكا بەرپڕسیارانە بدەن و دەستێ خۆ یێ برایەتی و كوردایەتیێ تێك بدەن و مژارا سەرەكی یا پلان و بەرنامێن وان، كومڤەكرنا دەنگ و ڕەنگێن جودا یێن ڤی ملەتی بن، چونكی كوردایەتی چەمكەكێ بەرفرەهە و خۆ د سەر هەمی بەڕژوەندیێن حزبی، دەڤەری و عەشیرەتگەری دا دبینیت، ئەڤجار كۆمبوون ل بن ڤێ چەترێ رامانا وێ پێشئێخستنا بەرژەوەندیێن گشتیە ل سەر یێن تاكە كەسی یان حزبایەتی، هەروەكو دیار دەڤەرا ڕۆژهەلاتا ناڤەڕاست د گوهۆڕینێن بەردەوام و لەزگین دایە و ئالنگاریێن ل بەراهیا مە گەلەك د هەستیار و مەزنن؛ ژ گڤاشتنێن ئابووری بگرە هەتا گوهۆڕینێن سیاسی و سەربازی، لەومان تەڤایی و ئێك دەنگی، بهێزترین چەكێ مللەتێن بێدەولەتە، نەخاسمە ملەتێ مە، دەمێ كو كورد ب هەمی ڕەنگ و دەنگێن خۆ ل سەر مێزەكێ كۆم دبن و ب ئێك دەنگ دپەیڤن، جیهان ب ڕێزڤە گوهداریێ بۆ دكەت و نەیار ژی هزرەكێ بۆ هێزا وان دكەت، بەڕوڤاژی، پرت و بەلاڤبوون بتنێ ڕێ خۆشكەرە بۆ لاوازكرنا قەوارە و پێگەهێ هەرێمێ، مخابن، هندەك جاران بەرژەوەندیێن حزبی یێن بەرتەنگ، نەبوونا باوەریێ د ناڤبەرا لایەنێن سیاسی دا، و دەستێوەردانێن دەرەكی دبنە ڕێگر ل هەمبەر دروستبوونا ڤێ چەترا نیشتمانی، لێ بۆ دەربازبوون ژ ڤان ئالنگاریان، پێدڤی ب دیالۆكەكا ڕاستگۆیانە و دوور ژ مزایداتێن سیاسی هەیە، گەر نیەتا هەر پارتەكێ،بهێز مانا ڤی قەوارەی بیت و پاراستنا وێ بیت، نەخاسمە دڤی دەمێ نها یێ نەخوازیار دا، دێ هەمی پێكڤە بەرژەوەندیێن خۆ یێن حزبایەتی دەنە لایەكی و پڕسێن گرنگێن نیشتیمانی دەنە لایەكێ دی، پێكڤە دێ كاركەن، ڤی قەوارەی ژ هەر مەترسیەكێ بپارێزن و دەست ب كاراكرنا پەرلەمانی و پێكئینانا كابینەیا دەهێ كەن، ئەڤ چەترا كوردایەتیێ یا ئەو ل بن كوم دبن، ببیتە پارێزەرا وان هەمی دەستكەفتێن گەلێ كورد ب دەستڤە ئیناین و بلا نە بتنێ كۆمبوون ل بن چەترا كوردایەتیێ درووشمەكێ جوان بیت، بەلكو دڤێت پەیامەكا كریاری بیت بۆ هەر تاكەكێ كورد، چونكی دۆزا گەلێ كورد پێدڤی ب چەترەكێ هەیە كو جهێ هەمی ڕەنگ و دەنگان تێدا هەبیت و ب گیانەكێ كوردەواری هەمی پێكڤە كار بۆ پرس و ئارماجێن ستراتیژی یێن ڤی ملەتی بكەن و ڤێ هەرێما ب خۆه و خوین و خەباتا ڤی گەلی دروستبووی، ژ هەر مەترسیەكێ بپارێزن و بەرەف پێشڤە ببەن.
