كۆمپانیێن كوردستانێ دێ پشكداریێ د سەكۆیا ئەلكترۆنییا بانكا ناڤەندی كەن
هەولێر، قائید میرۆ
رێڤەبەرێ گشتیێ تۆماركرنا كۆمپانیان ل هەرێما كوردستانێ ئاشكرا كر، بڕیارە كۆمپانیێن دراڤی یێن هەرێما كوردستانێ پشكداریێ د سەكۆیا ئەلكترۆنی یا بانكا ناڤەندی بكەن و دبێژیت، هەر كۆمپانیەكا پشكدار دێ دۆلاری ب بهایێ فەرمی دەتە گەشتیاران و وەلاتیێن هەرێما كوردستانێ دێ ژ چەندین خزمەتگوزاریان مفاداربن، چونكە ل هەرێما كوردستانێ ٦٠٠ كۆمپانیێن تایبەت ب دراڤی هەنە و هەتا نوكە نەشیاینە پشكداریێ د سەكۆیا ئەلكترۆنی دا كەن.
بلند محەمەد، رێڤەبەرێ گشتیێ تۆماركرنا كۆمپانیان ل هەرێما كوردستانێ بۆ رۆژناما ئەڤرۆ دیار كر «نوكە ل ئیراقێ كۆمپانیێن دراڤی ب رێیا سەكۆیا ئەلكترۆنی پشكدارن ل كڕینا دۆلاری ل بانكا ناڤەندیا ئیراقێ و چەند جاران مە سەرەدانا بەغدا و بانكا ناڤەندی كریە، هەتا كۆمپانیێن دراڤی یێن هەرێما كوردستانێ ژی پشكداریێ د سەكۆیا ئەلكترۆنی دا بكەن، مە ل هەرێما كوردستانێ 600 كۆمپانیێن تایبەت ب دراڤی هەنە و نوكە بزاڤان دكەین هەموو ئەو كۆمپانیا پشكداربن د سەكۆیا ئەلكترۆنی ل بانكا ناڤەندی، بەلێ هندەك رێكار هەنە پێدڤیە ئەو رێكارێن بانكا ناڤەندی هێنە بجهئینان و كۆمپانیێن دراڤی ل سەر دو گرۆپان هاتینە بەلافكرن.
زێدەتر گۆت: گرۆپێ ئەی دێ 20 كۆمپانیا ئێكگرن و پشكداربن د سەكۆیا ئەلكترۆنی دا، گرۆپێ بی دێ 10 كۆمپانی ئێكگرن و پێكڤە پشكداربن، نوكە هندەك پێنگاڤ هاتینە هاڤێتن بۆ ڤێ مەرەمێ و د قۆناغێن وەرگرتنا مۆلەتێ ماینە، ل دەستپێكێ دڤێت كۆمپانیێن دراڤی مۆلەتا ئەمنی ل ئاسایشا هەرێما كوردستانێ هەبیت، ل دووڤ دا هندەك مەرجێن بانكا ناڤەندی هەنە بهێنە بجهئینان، ئاسانكاری ژی هەنە، ژ بەر كو ئێك ژ مەرجێن بانكا ناڤەندی ئەڤە پارەیەكێ زۆر هەبیت هەتا پشكداریێ دكەن، بەلێ ئەم شیاینە ڤی مەرجی لادەین، نوكە 60 كۆمپانیا ئێكگرتیە و بەرهەڤیان دكەن پشكداریێ د سەكۆیا ئەلكترۆنی دا بكەن، كۆمپانیێن دراڤی ل هەرێما كوردستانێ هندەك ئاریشە هەنە دڤێت بهێنە چارەسەركرن بۆ نموونە ل بەغدا ب تنێ ناڤێ كۆمپانیێن كوردی و عەرەبی دهێنە پەسەندكرن ئەو كۆمپانیێن ناڤێن وان ئینگلیزی ناهێنە پەسەندكرن، چەند ئاریشەیەك هەنە ئەگەر بهێنە چارەسەركرن دێ كۆمپانیێن هەرێمێ ژی چنە ناڤا سەكۆیا ئەلكترۆنی.
بڵند محەمەد گۆت ژی «د دەمێ پشكداریا كۆمپانیێن دراڤی یێن هەرێما كوردستانێ دێ چەندین مفا هەنە، ژ وان ژی ئەو كۆمپانیا دێ لقێن خوە ل فڕۆكەخانەیان ڤەكەن و كەسێن گەشتیار دخوازن سەرەدانا دەرڤە بكەن ئەڤە دێ ب رێیا ئەڤان كۆمپانیا دۆلاری ب بهایێ فەرمی ١٣٢ هزاران وەرگرن، هەروەسا وەكی بانك دێ مامەلە دگەل كۆمپانیێن دراڤی بهێتەكرن و دشیاندایە كوژمێن مەزن یێن پارەی ڤەگوهێزێن بۆ بانكێن دی یێن جیهانێ و دگەل كۆمپانیێن جیهانی دێ مامەلە بهێتەكرن، چونكە هەتا نوكە كۆمپانیا پشكدار نەبووینە ل هەرێما كوردستانێ و نەشێن دۆلاری ب بهایێ فەرمی وەربگرن ل بانكا ناڤەندی چەندین مفایێن دی ژی هەنە و وەلاتیێن هەرێما كوردستانێ دێ مفاداربن ل خزمەتگوزاریێن گۆهۆڕین و ڤەگوهاستنا پارەی هەتا ئەو كۆمپانیێن مووچێ فەرمانبەران بەلاڤ دكەن دێ پشكداریێ د سەكۆیا ئەلكترۆنی دا كەن.
