ل ئامه‌دێ كۆنفرانسه‌ك بۆ پشته‌ڤانیا رۆژهه‌لاتێ كوردستانێ هاته سازكرن
ئه‌ڤرۆ:
ل باژێرێ ئامه‌دێ ب پشته‌ڤانیا چه‌ندین پارتێن كوردی كۆنفرانسه‌ك ژ بۆ پشته‌ڤانیا كوردێن رۆژهه‌لاتێ كوردستانێ هاته سازكرن و تێدا كه‌سایه‌تیێن كورد پشته‌ڤانیا خوه بۆ شورشا رۆژهه‌لاتێ كوردستانێ دیار كرن و راگه‌هاندن كو دڤێت كورد ل ئیرانێ بگه‌هنه مافێن خوه یێن ره‌وا.
ل باژێرێ ئامه‌دێ ب پشته‌ڤانیا چه‌ندین پارتێن كوردی كۆنفرانسه‌ك سه‌باره‌ت ب گوهۆرینێن ل ئیرانێ و رۆژهه‌لاتێ كوردستانێ هاته ساز كرن و گه‌له‌ك سیاسه‌تمه‌دار و كه‌سایه‌تیێن كوردی پشكدار بوون و تێدا به‌حسێ گوهۆرینێن ڤێ دووماهیێ ل ئیرانێ و رۆژهه‌لاتێ كوردستانێ هاتنه كرن.
بایرام بۆزیه‌ل سه‌رۆكێ گشتی یێ پارتا سوسیالیست یا كوردستانێ و ئێك ژ پشكداربوویێن كۆنفرانسێ راگه‌هاند كو گوهۆرینێن ڤێ دووماهیێ ل ئیرانێ و رۆژهه‌لاتێ كوردستانێ گه‌له‌ك گرنگن، ب تایبه‌تی ژی كوردێن رۆژهه‌لات ده‌ست ب قۆناغه‌كا نوو كرینه، دڤێت ده‌ستهه‌لاتدارێن ئیرانێ باش بزانن كو ئێدی نه‌شێن ب زۆرداری و ته‌په‌سه‌ركرنێ كوردان بێده‌نگ بكه‌ن، دڤێت كورد بگه‌هنه مافێن خوه، یا نها ل ئیرانێ و رۆژهه‌لاتێ كوردستانێ روو دده‌ت شورشه‌كا مه‌زنه و بێگومان دێ كاریگه‌ریا خوه ل هه‌موو ده‌ڤه‌رێ ژی كه‌ت.
د كۆنفرانسێ دا راپۆرتا ناڤه‌ندا پارتێن رۆژهه‌لاتێ كوردستانێ ژی هاته خواندن كو تێدا به‌حسێ شورشا نها ل ئیرانێ و رۆژهه‌لاتێ كوردستانێ هاته كرن و د راپۆرتێ دا هاته دیار كرن كو كورد و نه‌ته‌وێن دی یێن بنده‌ست ل ئیرانێ ب سالانه ل دژی زۆرداریێ شه‌ری دكه‌ن و نها ژی كورد سه‌ركێشیا شورشه‌كا نوو دكه‌ن و مخابن ده‌ستهه‌لاتا ئیرانێ ژی جاره‌كا دی دڤێت ب كوشتن و سێداره‌دانێ خه‌لكی بێده‌نگ بكه‌ت لێ شورشا نوو یا ئیرانێ ب سه‌ركێشیا كوردان به‌رده‌وام دكه‌ت و هه‌موو نه‌ته‌وێن دی یێن ل ئیرانێ ژی نها پشته‌ڤانیێ ل مافێن ره‌وا یێن كوردان دكه‌ن و ئه‌و یه‌ك ژی گوهۆرینه‌كا گه‌له‌ك مه‌زنه، ژ به‌ر هندێ ژی نها ده‌ستهه‌لاتا ئیرانێ هه‌ری زێده زۆرداریێ ل كوردان دكه‌ت، لاوێن كورد ل سێداره دده‌ت و ب هزاران هێزێن سه‌ربازی ل باژێرێن رۆژهه‌لاتێ كوردستانێ هاتینه بجهكرن دا كو كوردان چاڤترسی بكه‌ن، لێ كورد ل سه‌ر داخوازیێن خوه د رژدن.
د كۆنفرانسێ دا سه‌ركردێن پارتێن كوردی یێن باكورێ كوردستانێ ژی به‌حسێ گوهۆرینێن ڤێ دووماهیێ ل ئیرانێ و رۆژهه‌لاتێ كوردستانێ كرن و پشته‌ڤانیا خوه بۆ كوردێن رۆژهه‌لاتێ كوردستانێ دیار كرن و هه‌روه‌سا داخواز ژ هه‌موو پارتێن رۆژهه‌لاتێ كوردستانێ ژی كرن كو پێكڤه به‌ره‌یه‌كێ ئاڤا بكه‌ن و د ئاستێ نێڤده‌وله‌تی دا ده‌ست ب خه‌باته‌كا مه‌زن یا دبلۆماسیێ بكه‌ن، چونكی گه‌له‌ك گرنگه ئه‌مریكا و وه‌لاتێن دی یێن رۆژئاڤایی پشته‌ڤانیێ ل كوردێن رۆژهه‌لاتێ كوردستانێ بكه‌ن، ژ به‌ر هندێ ژی دڤێت كورد ده‌نگێ خوه بگه‌هیننه هه‌موو جیهانێ و داخوازا پشته‌ڤانیێ بكه‌ن.
