زاخۆ و هەولێر یاریزانێن خوە ب لێبڕینا مووچەی سزادان
دووڤچووون: قەیس وەیس
ب فەرمی هەردو یانەیێن زاخۆ و هەولێر یاریزانێن و كادرێ ڕاهێنانێ یێن تیمێن خوە سزادان ب لێبڕینا مووچەیێ هەیڤانە ژ ڕێژەیا 15 و 20 % ، ئەڤ چەندە هان ژبەر ئەوان ئەنجامێن لاواز د خولا ستێرێن ئیراقێ و كۆپا كەنداڤی دا.
هەولێر ب توندی یاریزانێن خوە سزادا
د ڕاگەهاندنەكا فەرمی دا یانەیا هەولێر بڕیار دا ب سزادانا یاریزان، كادرێ ڕاهێنانێ ب لێبرینا مووچەیێ مەها چریا دویێ یا بهێت ب ڕێژەیا 20% وەكو هەلوەستەكێ فەرمی یێ كارگێریێ بەرانبەر ئەوێ ئاستێ خراب یێ تیمێ د خولا ستێرێن ئیراقێ و كۆپا كەنداڤی دا، ئەڤ بڕیارە بۆ وێ یەكێ یە دوبارە یاریزان ڤەگەڕیتە ل سەر ئاستێ خوە و ئەنجامێن تیمێ باشتر بكەت، بۆ زانین تیما یانەیا هەولێر د خولا ستێرێن ئیراقێ ژ 10 یارییان پێنج سەركەفتن هەنە، سێ وەكهەڤی و دو خوسارەتی ژوانا حەفتییا بۆری ل گەل مووسل ب گۆلەكێ خوسارەت بوو و هەروەسان د كۆپا كەنداڤی دا بەرانبەر عەجمان یا ئیماراتی ژی تووشی خوسارەتیێ بوو.
دوەم جارە زاخۆ یاریزانێن خوە
سزا ددەت
ژلایێ خوەڤە كارگێرییا یانەیا زاخۆ ب فەرمی یاریزانێن خوە سزا دا و دەرگەهێ چوونێ بۆ هەر ئێكێ حەزا مانێ نەبیت ڤەكر، د ڕاگەهاندنەكێ دا یانەیا زاخۆ بڕیار دا ب سزادانا یاریزانێن خوە بۆ لێبڕینا مووچەیێ مەهەكێ ب ڕێژەیا 15% ژبەر ئەنجامێن لاواز یێن تیما وان د خولێ دا كو دووماهی خوسارەتی د گەڕا بۆری یا 10ێ دا بەرانبەر یانەیا نەفت ب دو گۆلان بێ بەرانبەر خوسارەت بووی بوویە ئەگەر د نوكە دا زاخۆ ل ڕێزا 15ێ بهێت ژ دو سەركەفتنان، سێ وەكهەڤی و پێنج خوسارەتی هەنە، هەروەسان 14 گۆل ل سەر هاتینە تۆماركرن بەرانبەر دا حەفت گۆل تۆماركرینە.
سەرۆكێ یانەیێ تووڕەیە و هوژداریەكا توند دایە
د چەند پارچە گۆتارێن دیدارەكا تایبەت یا چیا ئەمین سەرۆكێ یانەیا زاخۆ هاتیە بڤی شێوەیی: ئەو ئەنجامێن هەتا نوكە دهێن نە ل دووڤ هیڤیێن مە نە، مە پرۆژەیەكێ ڕێكخستی دانابوویە كو هەڤڕكییێ ل سەر ناسناڤێ خولێ بكەین و بگەهیتە ئاستەكێ باش و دەستتكەفتان دەستڤە بینیت، مە گرێبەستێن گرانبوها یێن ئیراقی و نێڤدەولەتی ئیمزاكرن كەسەكێ هزر نەدكر ئەو ستێر دێ درێسێ یانەیا زاخۆ لبەرخوەكەن.
هەروەسان ناڤهاتی گۆت: ئەڤا هاتیە كرن كارەكێ ب سانەهی نەبوویە ل سەر یانەیێ ب داراییەكا زوور كەڤتیە، هەموو ئارمانجا مە و سەرپەرشتێ ئیدارا زاخۆ ئەوە خەونا 39 سالان یا پشتەڤان و جەماوەرێ زاخۆ بجهبینین و هەڤڕكییا چەند ناسناڤان بكەن، ژبەركو دلخوەشكرنا جەماوەرێ مە مەزنترین دەستكەڤتە.
ژلایەكێ چیا ئەمین گۆت: هەتا نوكە ئەو ئەنجامێن تیما مە د خولێ دا دئینن جهێ دلگرانیا مەنە و ڕەخنەیێن پشتەڤانان قەبول دكەین، ئەوا ئەم و جەماوەر چاڤەڕێ ژ ڤێ تیمێ نە هاتیە دیتن، لەوما ژی مە بڕیاردایە ب سزادانا یاریزانێن خوە بەردەوامبین مە بڕیاردا 15% ژ مووچەیێ وان بهێتە بڕین، یا دویێ هەر یاریزانەكێ حەزا چوونێ هەبیت دەرگەهێ ڤەكرییە و دشێت بچیت، یا سێیێ د قووناغ دویێ یا خولێ دا هندەك یاریزان د پلانێن مە دانینن دێ هێنە گوهۆڕین و یاریزانێن باشتر هێنە جهێ وان و تیمەكا باش چێكەن
لدووماهیێ ناڤهاتی گۆت: وەكو زانین هێشتا 75% ژ وەرزێ خولێ مایە، هیڤییا مە ئەوە ژ پشتەڤانێن زاخۆ پشكەكا گرنگ بن ژ پرۆژەیێ مە ئەوێ نە بتنێ بۆ مەهەكێ یا سێ مەهانە، پرۆژە یێ درێژخایانە كو سالێن بهێت دا زاخۆ ببیتە خودان ناسناڤ، هەكە پشتەڤانێن مە پشكەك نەبن ژ پرۆژەیی بن هوسا هزردكەین سەرناكەڤین، دخوازین پشتەڤانبن و نە بنە بارگرانیەك ل سەر یاریزانان و ب رژدی هزر بكەن یارییا هەولێر ئێكەم یارییا خولێ و هێشتا خول یا مایی و درێژە و مە ئۆمێدین مەزن هەنە بۆ هەڤڕكیێ
