پاریس و بەرشەلۆنا د گوپیتكا یاریێن ئەڤرۆ دا
جەماوەرێ وەرزشی تایبەت حەزژێكەرێن فوتبۆلا ئۆرۆپا ب ژڤانن ئەڤرۆ ب شەڤبیریەكا دی یا ئاگرین ژ چارچووڤەیێ یاریێن گەڕا سێیێ ژ قارەمانییا یانەیێن ئۆرۆپا قارەمانێن خولا چامپیۆنز لیگ، یارییا پاریس سانجێرمان هەلگرا ناسناڤێ وەرزێ بۆری و بەرشەلۆنا دهێتە هژمارتن گۆپیتكا یاریێن ئەڤ شەڤە دانە.
فەنەربەخشە- سلافیا براغ
بڕیارە ل دەمژمێر 7:45 شەڤ یانەیا فەنەر بەخشە یا توركی ل یاریگەها خوە شكری سیراج ل ئستەنبۆلێ یانەیا سلافیا براغ یا چیكی مێڤان كەت، یانەیا توركی دێ هێتە دناڤ یاریگەهێ دا ب كۆمكرنا خالەكێ ژ دو یاریێن بۆری، ژلایێ خوەڤە سلافیا براغ نەشیایە هیچ خالەكێ كومبەك پشتی ل گەل لانس یا فرەنسی و سەباح یا ئازەربێجانی خوسارەت بووی، دادڤانێ ئسپانی ریكاردو دی بیرگۆس دێ یاریێ برێڤەبەت.
سەباح- بۆرۆسیا دۆرتمۆند
یارییا دویێ یا دەمژمێر 7:45 شەڤ یانەیا بۆرۆسیا دۆرتمۆند یا ئەلمانی دێ بیتە مێڤانا یانەیا سەباح یا ئازەربێجانی د یارییەكا دی یا بدەستڤەئینانا خالان و خوەشكرتا جهێ خوە د ڕێزبەندیێ دا، یانەیا ئازەربێجانی خودانا سێ خالایە ل ڕێزا 22ێ دهێت ژلایێ خوەڤە ژی بۆرۆسیا سێ خال هەنە ب ڕێزا 18ێ دهێت.
پاریس سانجێرمان- بەرشەلۆنا
جەماوەرێ هەردو یانەیان دێ چاڤەڕێ دیدارا ئاگرین بن دەمێ یانەیا پاریس سانجێرمان هەلگرا ناسناڤێ وەرزێ بۆری ل یارلیگەها خوە یانەیا بەرشەلۆنا یا ئسپانی ل دەمژمێر 10ی شەڤ مێڤان دكەت، هەردو یانە دێ هێنە دناڤ یاریگەهێ دا د باشترین كاودان دانە، د هەردو یاریێن بۆری شەش خال بدەستڤەئیناینە، پاریس سانجێرمان سەرێ لیستا رێزبەندیێ دهێت ب جوداهییا گۆلێن تۆماركری یانەیا بەرشەلۆنا ل ڕێزا دویێ دهێت، یانەیا ئسپانی د 11 یاریێن بۆری یێن خولێ و چامپیۆنزێ سەركەفتن ئیناینە ئانكو باشترین شێوە ئامادەیە، ژلایێ خوەڤە یانەیا فرەنسی ژی د دەمەكێ زێڕین دا دەرباز دكەت، دیدارێن وان ژی ئاگرین بووینە، هەریانەیەكێ شەش سەركەفتن ئیناینە بەرانبەر چار وەكهەڤییان هەروەسان هەر یانەیەكێ 29 گۆل ل سەر یانەیا دی تۆماركرینە.
لیڤەرپۆل- ڤیاریال
یارییەكا دی ژ هەڤڕكیێن چامپیۆنزا ئەڤ شەڤە یانەیا لیڤەرپۆل یا ئنگلتەرایێ دناڤ یاریگەها خوە ئەنفێلد دێ یانەیا ڤیاریال یا ئسپانی مێڤان كەت، لیڤەرپۆل چاڤ ل پێشیێ یە پشتی دو سەركەڤتنان شەش خال كۆمكرینە ل رێزا پێنجێ دهێت، ژلایێ خوەڤە یانەیا ئسپانی سەركەفتنە هەیە ل ڕێزا 14ێ دهێت ب هیڤیێن پێشڤەچوونێ یە، دیدارێن وان چار جاران بەرانبەر ئێك بووینە، سێ سەركەفتن بۆ لیڤەرپۆلێ و سەركەفتنە بۆ ڤیاریالێ.
مانچستەر ستی- ئەیكا ئەسینا
ژلایێ خوەڤە یانەیا مانچستەر ستی یا ئنگلتەرایێ دێ ل یاریگەها خوە یانەیا ئەیاك ئەسینا یا یونانستانی د تاقیكرنەكا نوو دا مێڤان كەت، مان ستی ب هیڤیێن مەزن چاڤ ل سەركەفتنێ هەیە ئەوا نوكە بتنێ سێ خال هەین ل ڕێزا 17ێ دهێت، ژلایێ خوەڤە مێڤانا وێ یا یونانستانێ پاریەكێ ب سانەهی نابیت ئەوا ب سێ خالان ل ڕێزا 20ێ دهێت، ئەڤ دیداری دبیتە یا ئێكێ هەردو یانەیان كۆمڤە دكەت.
شتۆتگارد- ئەتلەتیكۆ مەدرید
د یاریەكا دی دا یانەیا شتۆتگارد یا ئەلمانی دێ ل یاریگەها خوە یانەیا ئەتلەتیكۆ مەدرید یا ئسپانی مێڤان كەت، یانەیا ئەلمانی د دەمەكێ باش دەرباز دكەت ئەوا د هەردو یاریێن بۆری یێن چامپیۆنزێ سەركەفتن ئیناین و هاتیە ڕێزا چارێ ب شەش خالان، ژلایێ خوەڤە ئەتلەتیكۆ مەدرید ئەوا ل گەل لیڤەرپۆل خوسارەت بووی و سەركەفتن ل سەر مانچستەر یۆنایتد ئینایی ب سێ خالان ل ڕێزا 15ێ دهێت.
پۆرتۆ- ئایندهۆڤن
یانەیا پۆرتۆ یا پۆرتۆگالی ل یاریگەها خوە دێ یانەیا ئایندهۆڤن یا هۆلەندی مێڤان كەت، هەردو یانە پێدڤی ب خالێن یاریێ هەنە ژبۆ گەشكرنا هیڤیێن پێشڤەچوونێ، خودانێن ئەردی د هەردو یاریێن بۆری دا نەشیایە هیچ خالەكێ كۆمبكەن ل ڕێزا 30ێ دهێت، ژلایێ خوەڤە یا هولەندی بتنێ ئێك خال هەیە ل ڕێزا 26ێ دهێت، دیدارێن پێشتر دو یاری بووینە، پۆرتۆ ب سەركەفتبوو و یاریا دی وەكهەڤی بوون.
رۆما- سلۆڤان براتیسلاڤا
د یاریەكا دی یا هەڤسەنگ دا یانەیا رۆما یا ئیتالی دێ ل یاریگەها خوە یانەیا سلۆڤان براتیسلاڤا یا سلۆڤاكی مێڤان كەت و چاڤ ل قەرەبوویا سێ خالێن یارییا بۆری یە، خودانێن ئەردی ب خالەكێ ل ڕێزا 25ێ دهێت و یانەیا سلۆڤاكی بێ هیچ خالە ل ڕێزا 36ێ و دووماهیێ دهێت، دیدارێن پێشتر د ڤاڤارتنێن خولا ئۆرۆپا دا بوو، یانەیا سلۆڤاكی شیابوو رۆمایێ ژ ڤاڤارتنان دووربێخیت، پشتی یارییا ئێكێ 1-چنە و یارییا دویێ وەكهەڤی ب دووماه بنیت، لێ ڕەوشا هەردو یانەیان دڤێ یاریێ دا جودایە.
