ل سرایا پانزینێ
عەبدولرەحمان مەحموود
ئەڤە دەمەكە قەیرانا كێمیا پانزینێ ب سەر هەرێما كوردستانێ دا هاتی و شۆفێر ژ گرانیا پانزینا بازڕگانی نەچارن پتر بەرێ خۆ بدەنە بەر ب كڕینا پانزینا حكومی، لێ ئەڤە ژی ب ساناهی ب دەست ناكەڤیت و شۆفێر نەچارن نۆرەیا خۆ بگرن تاكو بكارن (40) لترێن پانزینا حكومی ب دەستخۆڤە بینن، هەرچەندە پتریا جاران ل سرایێ پشتی دو هەتا سێ دەمژمێران مرۆڤ ڤێ بڕا پانزینێ وەردگریت، لێ هندەك جاران ژ نە دروست بڕێڤە چوونا سرایێ پشتی چەندین دەمژمێرێن مانا ل سرایێ پانزین ب شۆفێری ڕا ناگەهیت و ئەو ماندیبوون و مانا وی هەموو ل سرایێ بەلاش دچیت و ب سەر و دلێن نەخۆش ڤە دزڤریتە ڤە مال هەتا ڕۆژا پاشتر بۆ خۆ بچیت نۆرەیەكا دی بگریت، ئەڤە ژی ڤەدگەڕیت بۆ ئاستێ لاواز و تێگەهشتنا هندەك شۆفێران كو ب هەر ڕێكەكا هەبیت خۆ دهاڤێتە دناڤا سرایێ دا ل ڕێزێن پێشیا سرایێ، یان ژی هەر ناچیتە سرایێ و ئێكسەر دچیتە د پانزینخانێ دا و پانزینێ وەردگریت، یان ژی هندەك كەسان بۆ خۆ ئەڤ قەیرانە ب دەلیڤە دیتیە و هەر زۆی دچن نورەیا چەندین ترۆمبێلا ب بەرا دگرن و بێی ترۆمبێل هەبیت و دهێن دبێژنە شۆفێرا مە جهێ هندە ترۆمبێلا هێلایە گەر وە بڤێت بەرامبەر گۆژمەكێ پارەی دێ نۆرەیێن خۆ دەینە هەوە، هەنە شۆفێر داكو زوی پانزینێ وەربگرن، گوژمێ وان داخوازكری پێ ددەن و دچنە د سرایێ دا و ب گەلەك ڕەنگێن دی یێن فێلبازی و واستەكاریێ دسرایا پانزینێ دا دبینین، ب ڕاستی ل جهێ ماندیبوونەكا زۆر ل سرا پانزینێ و ل ڤێ گەرمێ، چەند بێزار دبین ب دیتنا ڤان دیمەنێن سەرپێچكاران هندێ دی بێزارتر لێ دهێین، ئەڤجا یا گرنگ ئەوە دڤێ ڕەوشا هندە نەخۆش دا، ماندیبوونا شۆفێرێن ب دروستی ل ڤێ گەرمێ نۆرا خۆ گرتی، ئەو شۆفێرێن سەرپێچكار بیرا خۆ ل وژدانا خۆ بینن و نەبنە ئەگەرێ تێكدانا سرایێ و پتر بێزاركرنا شۆفێرێن دی و بلا نە بۆ خۆ ب شانازی بزانن كو هەما شیان ب ڕێكێن نە دروست پانزینێ وەربگرن، هەر چۆ گاڤا ڤیا بێی سرا بۆ خۆ بچن وەربگرن، دڤێت ئەوژی وەكی هەر شۆفێرەكێ دی سرا خۆ بگرن و نەبنە جهێ تێكدانێ و دروست بڕێڤەنەچوونا سرایێ.
