ل عەفرینێ گەلەک خەلکێ سڤیل یێن د بەر پیا دچن
ئەڤرۆ نیوز:
شەرێ ل عەفرینێ دژوار دبیت و لاوێن کورد پێلا بەرخوەدانێ گەلەک بلند کرینە و ل دووڤ ئاگاھیێن داوی چار تانک و ھەشت ترۆمبێلێن سەربازی یێن تورکیا ھاتینە ژناڤبرن و ٣٧ سەربازێن تورک و ٢٩چەکدارێن سوپایێ ئازاد ھاتینە کوشتن و ٣٢ سەربازێن تورک و چەکدارێن سوپایێ ئازاد ژی دیل ھاتنە گرتن.
زەردەشت خۆجا یەک ژ فەرماندارێ یەکینەیێن پاراستنا گەل د داخۆیانیەکا تایبەت دا بۆ رۆژناما ئەڤرۆ راگەھاند کو ئەڤ دو رۆژن فرۆکێن شەری یێن تورکیا بەردەوام ل گوندان ددەن و د ئەنجاما ھێرشێن دەولەتا تورک و چەکدارێن سوپایێ ئازاد دا ٢١ وەلاتێن سڤیل جانێ خوە ژ دەست داینە و گۆت: (وەسا دیارە تورکیا چاڤەرێ بەرخوەدانا مەزنا ھێزێن مە نەبوو و وەسا باوەر دکر کو دێ وەک چەکدارێن سوپایێ ئازاد و کۆمێن جیھادی ئەم ژی دێ دەست ژ ئاخا خوە بەردەین لێ بەرخوەدانا مە مەزنە و ھێزێن مە ل ھەموو دەڤەرێن عەفرینێ بجە بووینە و ھەتا نھا یەک بھوست ئاخا مە ژی نەکەڤتیە د دەستێ ھێزێن داگیرکەر دا و دوە شەڤێ مە ئۆپەراسیۆنا پاقژکرنێ دا دەستپێ کرن و د ئەنجاما ئۆپەراسیۆنا مە دا ٣٧ سەربازێن تورک و ٢٩ چەکدارێن سوپایێ ئازاد ھاتنە کوشتن و ٣٢ سەربازێن تورک و چەکدارێن سوپایێ ئازاد ژی ب ساخی ھاتنە گرتن و ئەم دێ وێنێن وان ژی بەلاڤ بکەین).
زەردەشت خۆجا ھەروەسا راگەھاند ژی ژ ھەموو دەڤەرێن رۆژئاڤایێ کوردستانێ ب ھزاران لاو و کچێن کورد سەرەدانا بنگەھێن یەپەگێ دکەن و چەک ھەلدگرن و بۆ پاراستنا ئاخا عەفرینێ دچنە مەیدانێن شەری و گۆت: (ئەم باش دزانین ئەڤ شەر بۆ پاشەرۆژا رۆژئاڤایێ کوردستانێ و ھەموو کوردستانێ و گەلێ کورد گەلەکێ گرنگە و ئەم د زانابوونا ڤێ یەکێ دانە و ئەرکێن خوە باش دزانین، پشتەڤانیا گەلێ مە ل باکور، باشور و ئورۆپا ئانکۆ ھەموو جیھانێ بۆ مە گەلەکێ گرنگە و گیانێ کۆبانێ نھا ل عەفرینێیە و ئەڤ گیان تەسلیم نابیت و دێ ھەر سەرکەڤیت).
ھەر د ڤێ مژارێ دا د قادا دبلۆماسیێ دا ژی گەنگەشێن گەلەک مەزن دھێنە کرن و ب پێشنیازا حوکمەتا فرەنسا، نەتەوێن یەکگرتی ژ تورکیا خواست کو ھێرشان بدەتە راوەستاندن و ب دیالۆگێ پرسگرێکێن ل گەل باکورێ سووریێ چارە بکەت و د ھەمان دەمی دا سازیا مافێن مرۆڤان یا سەر ب نەتەوێن یەکگرتی ژی کوشتنا وەلاتیێن سڤیل ژ ئالیێ تورکیا ڤە شەرمەزار کر.
ل ئالیێ دی ئەمریکا ژی ب داخۆیانیێن جودا جود ژ تورکیا داخواز دکەت ھێرشێن سەر عەفرینێ بدەتە راوەستاندن و زانایێن سیاسی وەسا دبینن کو د ناڤبەرا وەزارەتا دەرڤە یا ئەمریکا و پنتاگۆن دا ل سەر عەفرینێ دو نێرینێن جودا ھەنە و پنتاگۆن ب تەمامی ل دژی ئۆپەراسیۆنا سەربازیە و وەزارەتا دەرڤە ژی وەکو ئەندامەکێ ناتۆ مافێ تورکیا دبینیت کو سنورێن خوە ب پارێزیت. ھەر ل سەر ڤێ یەکێ بریت ماکگورک نوونەرێ سەرۆکێ ئەمریکا بۆ شەرێ داعشێ ژی راگەھاند کو ئێرشێن دەولەتا تورکیا خزمەتا چارەکرنا پرسگرێکان ناکەت و رێ خوەش دکەت کو جارەکا دی داعش دەلیڤا ھێرشان پەیدا بکەت و داخواز ژ تورکیا دکەین زمانێ دیالۆگێ ئەساس بگریت.
ژ ئالیێ خوە روسیا ژی خیانەتا ل کوردان ب ئەمریکا را گرێ ددەت و دیار دکەت کو سەدەمێ ھێرشا تورکیا پرچەککرنا ھێزێن کوردیە ل سووریێ و وەزیرێ دەرڤە یێ روسیا سیرگێی لاڤرۆڤ راگەھاند کو ئەمریکا ب پرچەککرنا ھێزێن کوردی بەھانە دا دەستێ تورکیا دا ھێرشی عەفرینێ بکەت، لێ د قادا نێڤدەولەتی دا ژی دھێتە دیار کرن کو روسیا ل ھەمبەر ئدلیبێ، رێ دایە تورکیا کو ھێرشی عەفرینێ بکەت.
