ل پاشەرۆژێ دێ جهەكێ تایبەت بۆ كارێ خۆ ڤەكەم
سندس سالح سلێڤانەیی
شێوەكار(بیرهات بەشیر) د دیدارەكێ دا بۆ رۆژنامەیا ئەڤرۆ گۆت: ئەڤە پتری سالەكێ یە ئەز نەخشەیان ب خەنایێ و وێنەیان ب ڕەنگان ل سەردێمێ زارۆكان چێدكەم و ئەو كەسێن سەرەدانا من دكەن گەلەك كەیفا وان دهێت، ب تایبەت ژی زاڕۆكان و دەمێ ئەز دبینم ئەو كەیفخۆش دبن بۆ من ژی هەستەكێ خۆش چێدبیت كو ئەز بشێم گرنژینەكێ ل سەر لێڤێن وان پەیدا بكەم.
هەروەسا گۆت: هەلبژارتنا من بۆ ڤی جهی، كو ئەو ژی ل (پاركا سەرهلدان) ژ هزرا من بوو، چنكو پاركەكا نوو و جوانە گەلەك خەلك دهێنێ، بۆ زانین ئەڤ كارە حەزا منا زاڕۆكینیێ بوو، كو ل دەستپێكێ بتنی من دێمێ زاڕۆكێن مە و نیاسێن مە و یێن تاخی ڕەنگدكرن، لێ نوكە بوویە پشیە بۆ من و ئەز گەلەكێ پێ كەیفخۆشم، لەورا من ل بەرە ل پاشەرۆژێ جهەكێ تایبەت بۆ كارێ خۆ ڤەكەم.
