ل ڤێ جەژنێ چوونا گەشتیاران بۆ دەرڤەی وەلاتی ل كێمیێ دابوو
ئەمیر ئەترووشی:
پەیڤدارێ گەشتوگوزارا دهۆكێ دیار كر، هاتنا گەشتیاران بۆ دهۆكێ ل جەژنا ڕەمەزانا ئەڤ سالە، جوداهی دگەل جەژنێن سالا بوری كێمبوویە، كێمبوونا وێ ژی بۆ دوو ئەگەران ڤەدگەرینیت. هەروەسا چوونا گەشتیارێن هەرێما كوردستانێ و پارێزگەها دهۆكێ ژ بۆ وەلاتێ توركیا و وەلاتێن دەرڤە بەرەڤ كێمبوونێ چوویە، ئەو ژی بۆ چەند ئەگەران ڤەدگەریت، وەكو درەنگ بەلاڤكرنا مووچەیان و ئەو گرانیا بازاری یا ل وەلاتێ توركیا پەیدابووی.
شەمال هروری پەیڤدارێ گەشتوگوزارا دهۆكێ بۆ رۆژنامەیا ئەڤرۆ دیار كر، پشتی جەژنا ڕەمەزانێ ئێكسەر تاقیكرنێن قوتابیان دێ دەست پێ كەت، د ڤێ دووماهیێ ژی دا ڕەوشا سەقایێ هەرێما كوردستانێ یا جێگیر نەبوو، ئەڤ چەندە بووینە ئەگەر هاتنا گەشتیاران بۆ پارێزگەها دهۆكێ كێمبوویە، هەروەسا گەشتیارییا نافخۆ ژی كێمبوویە.
ئاماژە ب وێ ئێكێ كر،جداهی دگەل دوو ڕۆژێن بوری هەتا ڕادەكی هاتنا گەشتیاران زێدەتر بوویە، لێ ب شێوەكێ گشتی هاتنا گەشتیاران ل جەژنا ڕەمەزانا ئەڤ سالە جداهی دگەل جەژنێن سالا بوری كێمبوویە و گۆتژی: لیژنێن مه بەردەوام خزمەتێ دكەن ل روژانێن جەژنێ، هەروەسا سەردانێن مەیدانی یێن رێڤەبەرێ گشتی بۆ زالگەها بۆ پتر هاریكاریكرنا وان گەشتیارێن كۆ دهێنە دهوكێ.
پەیڤدارێ دەستەیا گەشتوگوزارا هەرێما كوردستانێ ڕاگەهاند د دەمێ سێ هەیڤێن بوریدا زێدەتر ژ ئێك ملیۆن و 500 هزار گەشتیار هاتنە هەرێما كوردستانێ.
ئیبراهیم عەبدولمەجید پەیڤدارێ دەستەیا گەشتوگوزارا هەرێمێ ئاماژە ب وێ دا كۆ ڕێژا هاتنا گەشتیارا بۆ هەرێما كوردستانێ زێدە كریە و تنێ د دەمێ سێ هەیڤێن بوریدا زێدەتر ژ ئێك ملیۆن و نیڤ گەشتیار هاتنە دەڤەرێن گەشتیاریێن هەرێما كوردستانێ و گۆت ژی: هەرێما كوردستانێ ژ بلی هاڤینەهەوارێن گەشتیاری بۆ وەرزێ بهار و هاڤینێ ل دەڤەرێن چیایێن هەرێما كوردستانێ، تایبەتمەندیێن گەشتیاریێن زستانێ هەیە و سالانە، ل وەرزێ زستانێ ب سەدان هزار گەشتیار ب مەرەما تام وەرگرتن ل دیمەنێن زستانێ ل بەشێن دیێن عێراقێ ب تایبەت دێنە هەرێما كوردستانێ.
بەرێ ژی ئەمەل جەلال، سەرۆكێ دەستەیا گەشتوگوزارا هەرێمێ ڕاگەهاندبوو، دەستەیا مە پلانەكا دومدرێژا هەشت سالی و پلانەكا مامناڤەندی داڕشتیە، كۆ ئارمانجا مە پێشوازیێ ل 20 ملیۆن گەشتیاران د سالەكێدا بكەن.
ئیبراهیم عەبدولمەجید، پەیڤدارێ دەستەیا گشتی یا گەشتوگوازارا هەرێما كوردستانێ دیر كر: «ئامادەكاری پێك هاتنە ژ پێكئینانا چەند لیژنەكا لسەر ئاستێ رێڤەبەراتیا بۆ هندێ كۆ ل بازگەهان ئاماران بەرهەڤ بكەن و پێشوازییەكا جان ژ گەشتیاران بكەن و كار ئاسانیێ بۆ وان بكەن و نەخشە و ڕێبەرێ جهێن گەشتیاری بڵاڤكەن، هەمی مێڤانخانه و خارنگەهـ و هۆتێل بۆ گەشتیاران دێ هێنە ڤەكرن».
بەحسا وێ ژی كر: «ل بازگەهان ئاسانكاری بۆ هاتنا گەشتیاران دهێتە كرن و كێمتر ژ پێنج خولەكا هەموو كارێن پێتڤی دێ هێنە كرن و ناهێتە پاشخستن، هەڤدەم مە تیمێن دی ژی هەنە كۆ سەرەدانا گەشتیاران بكەن هەتا بزانن د وارێ خزمەتگوزاری د چ رەوشەكێدانە، وەك چاڤدێریكرنا بهای و ڕێك ب گرانكرنا جهێن گەشتیاری و بهایێ كەلوپەل و هەوجەداریان ناهێتە دان».
