مافێن مرۆڤی ل عیراقی: داعش 150 ئافرەتێن دژی جیھادا نیکاحێ کوشتن
ئەڤرۆ:
وەزارەتا مافێن مرۆڤی یا عیراقی راگەھاند، ئێک ژ سەرکردێن تیرۆرستێن داعش ب ناڤێ (ئەبو ئەنەسێ لیبی) 150 ژن و کچ ل قەزا فەلوجە کوشتن ژبەر رازینەبوونا وان ل سەر (جیھادا نیکاحێ) کو داعشێ ئەو جیھادە ل فەلوجە سەپاندیە.
کامل ئەمین پەیڤدارێ فەرمیێ وەزارەتا مافێن مرۆڤی یا عیراقی بۆ ئەڤرۆ گوت” ھندەک ژێدەرێن تایبەت پەیامێ کوشتنا وان ژن و کچان گەھاندە مە ل وەزارەتا مافێن مرۆڤی و ئەڤ کریارێن کوشتنێ ھەموو ل سەر دەستێ تیرۆرست (ئەبو ئەنەسێ لیبی) ل ناحیا سەقلاویە و ل (زەغارید) ل تاخێ جولان ھاتینە ئەنجامدان و ھەموو کوشتی ژی ل دو گۆرێن ب کۆم ھاتینە ڤەشارتن”.
کامل ئەمین گوت ژی” تیرۆرستێن داعش مزگەفتا (موحەمەدیە) ل ناڤەندا قەزا فەلوجە یا کریە زیندان و ب سەدان وەلاتی ژ زەلام و ژنێن دژی کریارێن داعش تێدا د دەستەسەرکرینە”.
پەیڤدارێ وەزارەتا مافێن مرۆڤی یا عیراقی ئاشکراکر کو چالاکڤانەکێ کوردێ ئێزدی کو ل دەرڤەی عیراقێ دژیت شیایە ب رێیا ھندەک کەسێن ناڤبەر، دو کچێن ئێزدی ژ فەلوجە بکڕیت و رزگار بکەت، ئەڤ چەندە ژی رادەیا وەحشیەتا تیرۆرستێن داعشێ دیاردکەت کو گرتیێن ئێزدی یێن ئافرەت خوە یێن گەھشتینە فەلوجە ژی.
ل دۆر دیرۆکا روودانا وێ کوشتنا ب کۆم یا ئافرەتێن فەلوجە ل سەر دەستێ تیرۆرستێن داعش، کامل ئەمینی گوت” ئەڤە ب تنێ ژ چەند ژێدەرەکێن باوەرپێکری یا گەھشتیە مە و دێ پتر دووڤچوونێ ل سەر ڤی بابەتی کەین و ل وردەکاریێن ھوورتر گەریێن ھەتاکو بشێین ڤێ چەندێ دیکیومێنت بکەین و بکەینە دناڤ وان بەلگەنامێن وەزارەتا مافێن مرۆڤی دا کوم دکەت و بۆ نەتەوێن ئێکگرتی و رێکخراوێن نێڤدەولەتی و کۆمسیۆنا مافێن مرۆڤی دھنێریت”.