مالپەڕەكێ ئیتالی: پرسا ژ چەككرنا میلیشیایان ل ئیراقێ دەزگەهێن دەولەتێ فالنجی كرینە
مالپەرەكێ ئیتالی د راپۆرتەكێ دا باسێ ئاریشەیێن حوكمەتا ئیراقێ دبن كارتێكرنا گڤاشتنێن ئەمەریكا و هەژموونا ئیرانێ دا دكەت و د راپۆرتەكێ دا ب ناڤێ ئیراق وەكو گۆرەپانا ناڤەندی یا ململانێیا هەرێمی وێنەیەكێ گەلەك رەش ژ بۆ پاشەڕۆژا حوكمەتا ئیراقێ دكێشیت.
ل گۆر راپۆرتا مالپەرێ «سپیێشل یۆراسیا» یێ ئیتالی، بەغدا د رەوشەكا ئیفلیجبوونا سیاسی و ئەمنی دا دژیت د ناڤبەرا داخوازێن واشنتۆنێ ژ بۆ ژچەككرنا میلیشیایان و هەژموونا كوور یا ئیرانێ ل ناڤ دامودەزگەهێن سیاسی و ئەمنی و ئابۆری یێن ئیراقێ دا.
راپۆرتا ئیتالی ئەوێ چەندێ ب دوور دبینیت كو داخوازا سەرۆك وەزیران عەلی زەیدی ژ بۆ ژ كەككرنا میلیشیایان بجهـ بهێت چونكو حوكمەتێ نهۆ نە شیانێن سەربازی و نە هەژموونا سیاسی یا پێدڤی هەیە كو ڤێ بڕیارێ بجهـ بینیت.
ئاماژە ب وێ چەندێ ژی كرییە كو واشنتۆن خودانا كارتەكا گڤاشتنا داراییە ل رێیا سیستەمێ دارایی یێ ئەمریكی و هەژمارێن ئیراقێ لێ تەهران ژی خودانا كارتێن هەڤبەرامبەرە كو خۆ د تەنگئاڤا هورموز و دابینكرنا غاز و كارەبێ دا دبینیت.
وی مالپەری هۆشداری داینە كو بەرسڤدانا ب تەمامی یا بەغدایێ بۆ گڤاشتنێن ئەمەریكا دبیت ئیرانێ نەچار بكەت كارتێن گڤاشتنێن ئابۆری بكار بینیت بۆ گڤاشخستنێ ل سەر حوكمەتێ د بەرامبەری دا رەتكرنا داخوازێن ئەمەریكی دبیت ببیتە ئەگەرێ سزایێن توندتر یان سنۆرداركرنا دارایی یا ئیراقێ.
راپۆرتێ باسێ وێ چەندێ ژی كرییە كو بزاڤێن ژ چەككرنا میلیشیایان ب هێز دبیت ببنە ئەگەرێ دابەشبوونا دامودەزگەهێن سەربازی و ئیفلیجبوونا جڤاتا نوونەران و هەلوەشاندنا حوكمەتێ ژ ئەنجامێ پەیوەندیێن هندەك گرۆپان ب تۆڕێن سیاسی و ئابۆری یێن ناڤ دەولەتێ ڤە.
ل گۆر راپۆرتا ئیتالی ئیران ئیراقێ وەكو قوولاهییا ستراتیژییا خۆ و گۆرەپانەكێ بۆ هەلمژینا گڤاشتنێن سەربازی بكار دئینیت و دبیت پێ باشتر بیت حوكمەتەكا ئیراقی یا لاواز یان ئیفلیجكری هەبیت ژ وێ چەندێ كو حوكمەتەك هەبیت ب تەمامی لایەنگرییا واشنتۆنێ بكەت.
راپۆرتێ هۆشداری ژی دایە كو بڕینا هاتنا دۆلاری ئەمریكی ب شێوەیەكێ گشتی دبیت دەرئەنجامێن بەرۆڤاژی هەبن چونكو دبیت ئیراق بەرەڤ بەرفرەهكرنا بازرگانییا نەدۆلار و پشتبەستنا پتر ب ئابۆرییا ئیرانێ بچیت.
راپۆرتێ پێشبینییا وێ چەندێ كریە كو هەكە رێككەفتنەكا دیپلۆماسی نەهێتە كرن حوكمەتا زەیدی بەری ب دووماهیهاتنا سالێ دێ تووشی مەترسییا ژناڤچوونا سیاسی و سەرهلدانا ململانێیا ناڤخۆیی و گۆشەگیرییا ئابۆری بیت.
