فێستیڤالا ئەدەبی یا كوردستانا مەزن ل دهۆكێ دێ هێتە گێڕان
زنار تۆڤی
ئەلند مزووری، رێكخەر و رێڤەبەرێ كارێن فیستیڤالا ئەدەبی یا كوردستانا مەزن، گۆت: ئەڤ فیستیڤالە هەر سالەكی ل باژێرەكێ كوردستانێ دێ هێتە ئەنجامدان، گەڕا ئێكێ ب شێوێ ئونلاین بوو، سالا دویێ ب شێوەكێ ئاسایێ ل هەولیرێ هاتە گێڕان، گەڕا سێیێ ل سلیمانیێ بوو،
هەر سێ گەڕێن بووری تایبەت بوون ب شعرا كلاسیكا عەرۆزێ ڤە، پشتی ب دووماهی هاتنا گەڕا سێیێ كۆمبوونا لژنا بەرهەڤكرنا فیستیڤالێ هاتە كرن، ئەم چەند هەڤال ژ دهۆكێ ل گەل وان پشكداربووین، وان داخواز كر گەڕا چارێ ل دهۆكێ بیت، مە پشتەڤانیا خۆ بۆ ئیدارا فیستیڤالێ دیاركر، د وێ كۆمبوونێ دا بڕیار هاتە دان، بۆ ڤێ گەڕێ سێ فۆرمین هوزانێ پشكدار ببن، كلاسیكا كێشا عەرۆزی، كلاسیكا كێشا خۆمالی، هوزانا ئازاد و ل تیرمەها 2026 ێ، لژنەك هاتە پیكئینان بۆ وەرگرتنا بەرهەمان، د ڤێ لژنێ دا هەلبەستڤان (رزگار وەحید) وەك ئەندامەك ژ دهۆكێ هاتە دەست نیشانكرن، لژنەك هاتە پێكئینان بۆ هەلسەنگاندنێ، دڤێ لژنێ دا ئەم دو هەلبەستڤان ژ دهۆكێ بووین، ئەز وەك سەرۆكێ لژنێ و هەلبەستڤان شەعبان سلێمان، وەك ئەندام، هەلبەستڤان عەتایی كلاسیك ژ سلێمانیێ، دەم ژلایێ ئیدارا فیستیڤالێ هاتە دەستنیشانكرن بۆ وەرگرتنا بەرهەمان بۆ ماوێ هەیڤەكێ، پتر ژ 135 هەلبەستان گەهشتنە لژنا وەرگرتنێ، پشتی ڤاڤارتن و هەلسەنگاندنێ بڕیار هاتە دان ژ هەر فورمەكی 10 هەلبەست بچنە دووماهیێ، بڕیارە فیستیڤال ل 3 چریا ئێكێ بهێتە ئەنجامدان.
هەروەسا گۆت: هەلبەستڤان (هەلبەستا بازی) ب كارێن پەیوەندیان هاتە راسپاردن، پارێزگەها دهۆكێ و رێڤەبەریا گشتییا رەوشەنبیری و هونەری ل دهۆكێ، پشتەڤانیا خۆ بۆ مە دیاركرییە، ئێكەتیا نڤیسەرێن كورد تایێ دهۆكێ، هۆلا ئێكەتیا نڤیسەران، خستە د خزمەتا فیستیڤالێ دا، كۆلیژا هونەرێن جوان/ پشكا مۆزیكێ ئەركێ گرۆپێ مۆزیكێ بۆ ژەنینا پارچە ئاوازان و برگا مۆزیكێ خستە د خزمەتا فیستیڤالێ دا.