مزگينيه‌كا خۆش بۆ مامۆستايان ل دۆر مووچه‌ى و پارێ هاندانێ
ئه‌ڤرۆ نيوز:
بەرپرسەکێ ئێکەتیا مامۆستایێن کوردستانێ دیار کر کو بڕیارە ھەیڤا بھێت دەستکاریا مووچێ مامۆستایان بھێتەکرن و ل گۆرەی پێشنیارا حوکمەتێ دێ مووچێ بنەڕەتی و دەرمالێن جێگیر، وەکو: دەرمالێن باوەرنامێ و خێزان و زارۆیان بۆ مامۆستایان ھێنە مەزاختن و دبێژیت: ژ بەر قەیرانا دارایی کارتێکرنەکا زۆر ل تەخا مامۆستایان بوویە، لەو حوکمەتێ سۆز دایە ھەتا ڕەوشا دانا مووچەی ئاسایی دبیت بەلاڤکرنا دەرمالێ ھاندانێ ژی بۆ مامۆستایان دێ بەردەوام بیت.
عەتا ئەحمەد، جێگرێ سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ خویا کر، بڕیاربوو ل گەل بەلاڤکرنا مووچێ ھەیڤا ئادارێ گوھۆڕین د پاشکەفتکرنا مووچێ مامۆستایان دا بھێتەکرن، لێ نەھاتە کرن و گۆت: “ل گۆرەی وان پێزانینێن ژ حوکمەتێ گەھشتینە بەر دەستێ مە، وەکو ئێکەتیا مامۆستایێن کوردستانێ، حوکمەتێ ئەڤ چەندە بۆ مە خویا کریە کو ژ بەر دانا قەڕێن کۆمپانیان ڤێ ھەیڤێ نەشێن پێداچوونێ د مووچێ مامۆستایان دا بکەن، لێ بڕیارە ھەیڤا بھێت ل گەل بەلاڤکرنا مووچێ ھەیڤا نیسانێ رێژا پاشکەفتکرنێ ل سەر مووچێ مامۆستایان بھێتە کێمکرن و دێ پێداچوون د مووچێ مامۆستایان دا ھێتەکرن، بۆ ڤێ مەرەمێ ژی چەند پێشنیارەک ھاتینەکرن، ژ وانا پێشنیارەک ھەیە کو مووچێ بنەڕەتی ل گەل دەرمالێن جێگیر، وەکو: دەرمالێ باوەرنامێ و خێزان و زارۆیان بۆ تەخا مامۆستایان بھێتە مەزاختن، ب دیتنا مە ژی ئەڤە کارەکێ باشە ھەکە ئەڤ پێشنیارە بکەڤیتە د بیاڤێ ب جھئینانێ دا، چونکو ب ڤێ چەندێ دێ مووچێ مامۆستایان گەلەک باشتر لێ ھێت ژ ڤی مووچێ نوکە بۆ مامۆستایان دھێتەدان، لەوڕا بۆچوونا مە ژی ل گەل ڤێ پێشنیارێ دایە و د بەرژەوەندیا مامۆستایان ژی دایە”.
جێگرێ سەرۆکێ ئێکەتیا مامۆستایان ئاماژە ب وێ چەندێ ژی کر، ل دووڤ سۆزێن حوکمەتێ داینە ئێکەتیا مامۆستایان دێ بەلاڤکرنا دەرمالێ ھاندانێ ژی کو 150 ھزار بۆ مامۆستایێن ھاتنوچوونێ بۆ دەرڤەی سەنتەرێ باژێران دکەن و 100 ھزار ژی بۆ وان یێن دناڤ باژێڕان دا بەردەوام بیت ھەتا وی دەمێ ب تەمامی ڕەوشا بەلاڤکرنا مووچەی ئاسایی دبیت و مووچە وەکو بەرێ بھێتە بەلاڤکرن و گۆت: “ھەرچەندە مە گازندە ھەنە ھەتا نوکە حوکمەتێ ب تنێ دەرمالێ دو ھەیڤان ل سەر مامۆستایان بەلاڤکریە و دو ھەیڤان ل پاشە، بەلێ ھەر ژ ڤێ چەندێ باشترە کو چو دەرمالێن ھاندانێ نەبن، ئەم پێشبینی دکەین ل گەل پێداچوونێ ب مووچێ مامۆستایان دەرمالێ ھاندانێ ژی یێ بەردەوام بیت”.
ل دۆر کاریگەریێن قەیرانێ ل سەر ئێکەتیا مامۆستایان ژی عەتا ئەحمەد ئاشکرا کر، ئەڤە دو سالە حوکمەتێ چو ھاریکاریێن دارایی پێشکەشی ئێکەتیا مامۆستایان نەکرینە، ئەڤێ چەندێ ژی کاریگەریێن زۆر ل سەر کار و چالاکیێن ئێکەتیا مامۆستایێن کوردستانێ ھەبووینە و گۆت: “ژ کۆما 120 ھزار مامۆستایان ب تنێ 72 ھزار ل ئێکەتیێ ئەندامن و مە ژی بۆ بەرچاڤگرتنا قەیرانا دارایی پارێ ناسناما سەندیکایێ و ئابوونا سالانە ژ 25 ھزار دیناران کێمکریە بۆ 10 ھزار دیناران، ئەڤە سەرەڕای ڤێ ئێکێ ژ بەر نەبوونا بودجێ ئەم نەشیاینە د دەمێ خوە دا کۆنگرەی ئەنجام بدەین و ھەر شەش ھەیڤان جارەکێ ئێکەتیا مامۆستایان دەمێ خوە درێژ دکەت ھەتا وی دەمێ ڕەوشا دارایی بەر ب باشبوونێ دچیت و کۆنگرێ مامۆستایان دھێتە گێڕان”.
