مه‌ترسيا هه‌رفينێ كه‌فته سه‌ر سكرێ مووسل
ئەڤرۆ نيوز:
پەرلەمانتارەکێ ھەرێما کوردستانێ ئاشکرا دکەت کو مەترسیا ھەرفینێ یا ل سەر سکرێ مووسلێ ھەی و حوکمەتا عیراقێ بەرپرسا ئێکێ یە کو وێ مەترسیێ ل سەر نەھێلیت و گۆت “ئەمریکیان ژی ھەست ب ڤێ مەترسیێ کریە”.
ئاری ھەرسین پەرلەمانتارێ فراکسیۆنا پارتی ل پەرلەمانێ کوردستانێ بۆ (تۆڕا میدیا رووداو) راگەھاند ل گۆر دووڤچوونەکا وان، مەترسی ل سەر سکرێ مووسلێ ھەیە و فاکتەرێن ھەرفینێ ھەنە و گۆت “ئەرکێ حوکمەتا فیدرالە کاری بۆ نووژەنکرنا وان جھان بکەت، کو مەترسیا ھەرفینێ ل سەرە و ھەکە بھەرفیت ھەردو باژارێن مووسل و بەغدا دێ بن ئاڤ بن”.
پەرلەمانتارێ فراکسیۆنا پارتی ل پەرلەمانێ کوردستانێ خویا ژی کر کو ئەڤە چەند سالە سکرێ مووسلێ پێدڤی نووژەنکرنێ یە، لێ ھاتیە پشتگوھخستن، لەورا مەترسیا ھەرفینێ زێدەتر بوویە و گۆت “کۆژمێ ٢٥٠ ھەتا٥٠٠ ملیۆن دۆلاران پێدڤینە بۆ نووژەنکرنێ”.
ھەروەسا ئاری ھەرسین گۆت “ئەمریکیان ژی ھەست ب ڤێ مەترسیێ کریە، لەورا نھا ل کۆمپانیەکا تایبەتمەند دگەڕیێن کو بشێت وان جھێن خرابی و مەترسیا ھەرفینێ ل سەر دروست بکەت”.
ھەژی گۆتنێ یە سکرێ مووسلێ مەزنترین سکرە ل عیراقێ و ل سالا ١٩٨٣ ژ ئالیێ دو کۆمپانیێن بیانی ڤە ھاتیە دروستکرن.
