مهرجێن گران یێن ئینانا ژنا دویێ بووینه ئهگهرێ ههڤژینیا مسیار
هەولێر، قائید میرۆ:
پارێزهرهكی دیار کر، ژبهرکو مهرجێن گران یێن قانوونێ بۆ ئینانا ژنا دویێ بووینه ئهگهر نوكه ههڤژینیا مسیار ببیته بهدیل و گۆت؛ قانوون نهشیایه ببیته رێگر ههمبهر زهلامان بۆ ئینانا ژنا دویێ تنێ جورێ ههڤژینیێ هاتیه گۆهۆڕین و پتریا كچ و ژنێن ههڤژینیا مسیار پێكدئینن كهس و كارێن وان د ئاگههدار نینن و ب دزیڤه ئهف پرۆسه دهێته ئهنجامدان.
پارێزهر و شارهزایێ قانوونێ شالاو ئهبوبهكر عهلی بۆ رۆژنامەیا ئهڤرۆ دیار كر، یا خۆیایه قانوونا بارێ كهسی یا ههرێما كوردستانێ یا سالا 2008ێ یا هاتیه راستڤهكرن ب ژمارە 15 مهرجێن زۆر گران داناینه بۆ كهسێن دخوازن زێدهتری ژنهكێ بینن یان ژی بۆ چهند جارهكا پرۆسا ههڤژینیێ پێك بینن، ههتا ئهگهر ههڤژینا ئێكێ یا رازی ژی بیت قانوونێ ههر مهرجێن گران داناینه و گۆت؛ بتنێ ههبۆنا راپۆرتا نۆشداری و پشتڕاست بوون بۆ ڤێ چهندێ کو ههڤژینا وی كهسێ دخوازیت ههڤژینا دویێ بینیت شیانێن زارۆك بوونێ نینن یانژی شیانێن سکسی نینن.
پارێزەری دیار کر ژی، لگورهی بڕگا پێنجێ یا قانوونا بارێ كهسی سزا ژی بۆ كهسێن زێدهگاڤیێ دكهن دیار كریه كو ژ سێ سالێن زیندانكرنێ كێمتر نهبیت و پێنج سالان ژی زێدهتر نهبیت ئهڤه سهرهڕای دانانا سزایێ ماددی کو ملیۆنهك ههتا سێ ملیۆن دینارایە و گۆت؛ ئهگهر زهلامهك ل دهرڤهی دادگههێ ههڤژینا دویێ بینیت، ئهڤه بۆیه ئهگهر ههر كهسهكێ نیهتا ئینانا ژنا دویێ ههبیت ههڤژینا ئێكێ دهلیڤه ل پێشه بۆ تۆماركرنا سكالایێ و سزادانا ههڤژینێ خۆ بشێوهیهكی پشتی حوكمێ زیندانكرنێ تهمام دبیت و ب كهفالهت دهێته ئازاد كرن ههڤژینا خۆ بەردەت.
شالاو گۆتژی؛ ژبهركو ههڤژیناوی سكالا لسهر تۆمار كریه و بۆیه ئهگهرێ گرتن و زیندانكرنێ، مخابن ئهڤه بۆیه ئهگهرێ ههڕفاندنا خێزانێ ، ههر دانانا وان مهرجان و قهدهغهكرنا ژنا دویێ بۆیه ئهگهر زهلام بچن ل دادگههێن دهرڤهی ئیدارهیا حوكمهتا ههرێما كوردستانێ گرێبهستا ههڤژینا دویێ تۆمار بكهن و ب دزیڤه پرۆسا ههڤژینیێ پێكبینن.
پارێزهری ئاماژه پێكر کو نووترین كاریگهریێن قانوونا قهدهغهكرنا ژنا دویێ پێكئینانا ههڤژینیا مسیاره كو تێدا زهلام ب دزی ههڤژینا خۆ دێ چیته ناڤا پرۆسا ههڤژینیا دویێ، ژبهركو ژبلی ئهو رێكارێن قانوونی و مهرجێن گران یێن قانوونێ ههڤژینا ئێكێ
ژی رێگره زهلام ههڤژینهكا دی ههبیت و گۆت؛ لهوڕا شهریعهتی مهرج دیار نهكریه ههڤژینا ئێكی رازی بیت پاشی زهلام ههڤژینا دویێ بینیت، ئهگهرهكێ دی یێ زێدهبوونا ههڤژینیا مسیار ئهوە هژمارهكا زۆر یا ژنان هاتینه تهلاقدان و بێ ههڤژین ماینه.
پارێزهر شالاو ئهبوبهكر عهلی د بەردەوامیا ئاخفتنێن خۆدا دیار کر کو ئهڤان سالێن دووماهیێ رێژهیا بەردانێ زۆر زێده بوویه، هندهك ژوان ژنێن هاتینه بەردان زارۆك ههنه، ناخوازن جارهكادی ژبهر زارۆكێن خۆ بچنه دناڤا پرۆسا ههڤژینیێ، بتایبهتی ناخوازن مال و مێهڤان و بهرپرسیاریهتی ههبیت ئهڤه وهك رێكا بهدیل ههڤژینیا مسیار پێكدئینن، بتایبهتی دگهل وان زهلامێن ههڤژینا خۆ بەردای یانژی ههڤژینا دویێ پێك دئینیت و ژ ترسا ههڤژینا ئێكێ نهشێت مال و حال ههبن.
پارێزەری دیار کر ژی، ههروهسا ئهو كچێن قهیره و تەمەنێ وان مەزن و نهچووینه ناڤا پرۆسا ههڤژینیێ مسیار وهكه چارهسهر دبینن، تایبهتی هندهك ژوان ترۆمبێل و خانی و جهێ ئاكنجیبوونێ ژی ههیه و ئهڤی جورێ ههڤژینیێ بۆ لایهنێ سۆزداری و جنسی مفادار دبن و گۆت؛ د ئهنجامدا مسیار د قانوونێ دا نههاتیه بهحسكرن و ههتا ئهگهر زارۆك ژی ههبن ناسنامه بۆ ناهێته دهركرن، ههردهمێ ژن داخوازا جودابوونێ ژی بكهت ئهڤه چو مافهك نینه و زۆربهیا حالهتێن نوكه یێن ههڤژینیا مسیار باب و كهس و كارێن ژنێ ژی د ئاگههدار نینن و ب دزیڤه دگهل زهلامی دگههنه رێكهفتنێ.
