مه‌سرور بارزانی:خه‌ونا سه‌ربخوه‌يا كوردستانێ چو جاران ب دووماهى ناهێت
ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ دديداره‌كێ دا ل گه‌ل مالپه‌رێ (ئه‌لمۆنيتۆر) به‌حسێ به‌رده‌واميا خه‌ونا سه‌ربخوه‌يا كوردستانێ دكه‌تودبێژيت وه‌كو خه‌ونا نه‌ته‌وه‌كى، ب ديتنا من چو جاران ب دووماهى ناهێت.
مه‌سرور بارزانى گۆت ژى” پێدڤيه دواقعبين بين سه‌باره‌ت ئه‌گه‌ران، مه دديت پێشهاته‌كا گرنگه بۆ جيهانێوحوكمه‌تا عيراقێ ژى پێدڤيه بزانيت داخوازيا گه‌لێ كورد چيه، له‌وما مه ريفراندۆم ب ڤى شێوه‌ى ئه‌نجامدا، ئه‌م نيگه‌رانێن پاشه‌رۆژا گه‌لێ خوه بووين ومه دڤيا پشت راست بين كو چو روو ب رووبوونه‌ك په‌يدا نابيت وپه‌يوه‌نديه‌كا ئاشتيخوازانه وسه‌قامگير دێ مه ل گه‌ل به‌غدا هه‌بيت دچارچۆڤه‌كى دا كو هه‌ردو ئالى ل سه‌ر بنه‌مايێ به‌رژه‌وه‌نديا هه‌ڤپشك بريارێ ل سه‌ر بده‌ن”.
مه‌سرور بارزانى دياركر” مخابن ب ديتنا من نيازا گه‌لێ كوردستانێ ب قه‌سد شرۆڤه‌كا شاش بۆ هاته كرن، چونكى راده‌ربرين ب وێ رامانێ ناهێت كو روو ب رووبوون پێدڤى بيت”.
هێشتا گۆت” بريارا ريفراندۆمێ كو كوردان داى تاوان نه‌بوو وتنێ ئاشكراكرنا حه‌زا كوردان بوو، به‌لێ ده‌مه‌كى جڤاكێ نێڤده‌وله‌تى دژى وێ حه‌زێ دراوه‌ستيت، ئه‌و چه‌نده به‌روڤاژى هه‌موو وان بنه‌مايانه كو نه‌ته‌وێن ئێكگرتى پالپشتيێ لێ دكه‌ت وژپێخه‌مه‌ت وان دروست بووى”.
دپشكه‌كا دى يا ديدارا خوه دا، مه‌سرور بارزانى گۆت” مه به‌رى ريفراندۆمێ ل گه‌ل گه‌له‌ك وه‌لاتان ئاخڤت وچو ئاليه‌كى به‌غداژى ل گه‌ل بيت دژايه‌تيا خوه بۆ مافێ چاره‌نڤيس وسه‌ربخوه‌يا كوردستانێ رانه‌گه‌هاند ووان زێده‌تر كێشه ل گه‌ل ده‌مێ وێ هه‌بوو”.
ل دۆر سزايێن به‌غدا ل سه‌ر هه‌رێما كوردستانێ، مه‌سرور بارزانى كو نوكه ل ئه‌مريكايه ول گه‌ل به‌رپرسێن بلند يێن ئيدارا ترامپى كۆمبوويه، دبێژيت” راگرتنا گه‌شتێن نێڤده‌وله‌تى ل فرۆكخانێن هه‌رێما كوردستانێ وسزايێن به‌غدا ل سه‌ر هه‌رێما كوردستانێ، برياره‌كا نه‌دستوورى بوو ونابيت فرۆخانه تێكهه‌لى پرسێن سياسى بهێنه كرن”.
گۆت ژى” نوكه دانوستاندنێن مه دبه‌رده‌وامن بۆ ڤه‌كرنا فرۆكخانان وكوردان ژى پتريا مه‌رجێن به‌غدا يێن قه‌بوولكرن، به‌لێ به‌غدا هه‌ر هێجه‌تان دئينيت ونوكه چو هێجيت بۆ ڤه‌كرنا فرۆكخانان نه‌مايه وتنێ برياره‌كا سياسى يه ويا كريه پشكه‌ك ژ هه‌وا هه‌لبژارتنان”.
مه‌سرور بارزانى دياركر ژى” دپه‌راێزا كۆنفرانسێ ئاسايشێ ل ميونشن ئه‌م ل گه‌ل حه‌يده‌ر عه‌بادى، سه‌رۆك وه‌زيرێن عيراقێ كۆمبووين، ل وێرێ عه‌بادى سۆزا ڤه‌كرنا فرۆكخانان دا، به‌لێ پێشتر ژى سۆزێن ب وى جۆرى يێن هاتينه دان ونه‌برينه سه‌رى ونوكه ژى چاڤه‌رێ دكه‌ين دا بزانين ئايا عه‌بادى دێ سۆزا خوه به‌ته سه‌رى يان ژى هه‌روه‌كو يێن بۆرى بجهنائينيت”.
