مه‌سرور بارزانی پێشوازیێ ل شانده‌كێ ئه‌مریكی دكه‌ت
سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل شانده‌كێ ئه‌مریكی ب سه‌رۆكایه‌تیا ماتیۆ توله‌ر بالیۆزێ ئه‌مریكا ل ئیراقێ كر.
د كۆمبوونه‌كێ دا، دووماهی گورانكاری و پێشهاتێن پرۆسا سیاسی ل ئیراقێ و ره‌وشا سووریێ و ده‌ڤه‌رێ هاته به‌حسكرن.
ته‌وه‌ره‌كێ سه‌ره‌كی یێ كۆمبوونێ تایبه‌ت بوو ب بریارا دادگه‌ها بلند یا فیدرالی سه‌باره‌ت كه‌رتێ په‌ترۆلێ و غازێ ل هه‌رێما كوردستانێ. سه‌رۆكێ حوكمه‌تا هه‌رێمێ دووپاتی ل مافێن دستووری یێ هه‌رێما كوردستانێ كر و ئاماژه‌كر كو ئه‌ڤ بریاره، پێشێلكرنا مافێن دستووری یێن هه‌رێما كوردستانێ یه و خزمه‌تا به‌رژه‌وه‌ندیا وه‌لاتیان و سه‌قامگیری و ئارامی و ئاسایشێ ئیراقێ ناكه‌ت و به‌رهه‌ڤیا هه‌رێمێ بۆ چاره‌سه‌ركرنا كێشان ب رێیا دانوستاندنان و ل سه‌ر بنه‌مایێ دستووری نیشاندا. شاندێ ئه‌مریكی پشته‌ڤانیا خوه بۆ به‌رده‌وامیا سه‌قامگیریا ئابووری و سیاسی ل هه‌رێما كوردستانێ دووپاتكر.گه‌ف و مه‌ترسیێن تیرۆرستێن داعشێ و گرنگیا به‌رده‌وامبوونا پشته‌ڤانیا پێشمه‌رگه‌ی، ته‌وه‌ره‌كێ دی یێ دانوستاندنان بوو.
