مووسل دێ بیتە حەلەبا دویێ
ئه‌ڤرۆ نيوز:
ھێزێن عیراقی تووشی چەندین رێگریان بووینە د شەڕێ مووسلێ دا و ھێزێن عیراقی یێن بژارە و فرقەکا زریپۆشان بزاڤێن مەزن دکەن ژبۆ کونترۆلکرنا تاخێن رۆژھەلاتێ باژێرێ مووسلێ و پاراستنا وان ژ ھێرشێن چەکدارێن داعشێ ئەوێن خەندەکان بکاردئینن بۆ ھاتنوچوون و ھێرشێن خوە.
ل دووڤ راپۆرتەکا رۆژناما (ئەندبندنت) یا بریتانی ل رۆژا 14 چریا دویێ 2016 ێ، ژ زاردەڤێ بەرپرسەکێ بەرێ یێ عیراقی ھاتیە کو د ئێک رۆژدا ھێزێن عیراقی 37 سەرباز ژدەستدان و 70 ژی بریندار بوون و دیارکر کو ھێزێن عیراقی یێن مەندەھوش بووین ب قەبارێ تۆرا خەندەکێن داعشێ کولاین کو درێژیا وان دبیتە 45 کیلۆمەتر.
خویاکر ژی کو ھێزێن دژە تیرۆر یێن عیراقێ و فرقا نەھێ یا زریپۆشان بۆ دەمێ دو ھەفتیانە بزاڤا پێشڤەچوونێ دکەن ل رۆژھەلاتا رووبارێ دیجلە، بەلێ داعش بەردەوام خوەکۆژان ب شێوی تاک دھنێریت بۆ ئەنجامدانا کریارێن خوەکۆژی ب رێیا ترۆمبێلێن مینرێژکری و قەناسان و تێمێن بچووک یێن ھاونان بۆ شەڕکرنێ ل وان تاخێن بەری نوکە لەشکرێ عیراقی ئازادکرنا وان راگەھاندی.
خسرۆ گۆران ئەندامێ سەرکرداتیا پارتی دیموکراتی کوردستان، د وێ راپۆرتا رۆژناما بریتانی دا دبێژیت” ل دەستپێکێ ئەز یێ گەشبین بووم ب ئازادکرنا مووسلێ ددەمێ دو ھەتا سێ ھەفتیان دا، بەلێ نوکە ئەز پێشبینیێ دکەم کو دێ ب ھەیڤان ڤەکێشیت”. خسرۆی ئاماژە دا” ھەکە داعش یا بەردەوامبیت د شەڕی دا ب ڤی شێوەی، دێ پتریا باژێرێ مووسلێ وێران بیت و ھێڤی دکەم وەکو حەلەبێ لێ نەھێت”.
ل دووڤ ھندەک شرۆڤەکارێن لەشکری، بەردەوامبوونا دۆرپێچکرنا مووسلێ بۆ دەمەکێ درێژ و کەفتنا ھژمارەکا مەزن یا قوربانیێن سڤیل و ھاتنا لەشکرێ تورکی بۆ ناڤ شەڕی، دێ بیتە ئەگەرێ دروستبوونا ئاریشەکا نێڤدەولەتی کو دێ تووشی سەرۆکێ ئەمریکی یێ نوو دونالد ترامبی بیت و وی دەمی دێ ترامب ل بەردەم بژارەیا زێدەکرنا ھێرشێن ئەسمانی دژی داعشێ بیت کو دبیت ئەو چەندە ژی ببیتە ئەگەرێ پەیداکرنا زیانێن گیانی یێن مەزن دناڤ خەلکێ مووسلێ کو ھژمارا وان دگەھیتە ملیۆنەک و 500 ھزار کەسان.
ھێزێن عیراقی ل شەڕێن بۆری پشت بەستنەکا مەزن ل سەر ھێرشێن ئەسمانی یێن ھەڤپەیمانیا نێڤدەولەتی دکر ژبۆ شکاندنا چەکدارێن داعشێ ل باژێرێن رومادی و تکریتێ، ل شەڕێ رومادی ل سالا 2015 ێ، نێزیکی 70% ژ وی باژێری وێران بوو و پتریا خەلکێ رومادی کو ھژمارا وان 350 ھزار کەس بوون ئاوارە بوون و داعشێ ژی ھەتاکو دووماھی دلۆپا خوینێ شەڕ لێ نەکر، ھەمان تشت ل دەڤەرێن دەوروبەرێن مووسلێ ژی پەیرەوکر وەکو بەەرتللاو قەرەقۆش کو دەمێ دو سال و نیڤان بوو خەلکێ وان ئاوارە بووی و دەلیڤە ب ساناھیتر بوو کو ھێرشێن ئەسمانی دژی وان ھەرجو دەڤەران بھێنە کرن، بەلێ ئەنجامدانا ھەمان ھێرشێن ئەسمانی ل ناڤ مووسلێ دێ گەلەک یا ب زەحمەت بیت، ژبەر ھەبوونا خەلکی دناڤ باژێری دا و بەرفرەھیا رووبەرێ باژێری ژی، ھەرچەندە ھێزێن ھێزێن عیراقی دھێرشێن خوە یێن دەستپێکی دا سەرکەفتن ب دەستڤەئینابوون ھەتا گەھشتنا وان بۆ نێزیکی باژێرێ مووسلێ و ژ ھینگێ و وێڤە ھێزێن عیراقی دچنە دناڤ ھندەک تاخان دا و دوبارە پاشڤە دزڤرنەڤە.