نێزیک دێ شوقە بۆ مامۆستایێن دھۆکێ ھێنە ئاڤاکرن
ئه‌ڤرۆ نيوز:
جێگرێ سەرۆکێ ئیکەتیا مامۆستایێن کوردستانێ دیارکر، ھەتا نوکە نیڤا مامۆستایان ناسنامەیێن خوە نووکرینە و ئەڤێن نە بوینە ئەندام ھاریکاریێن ئێکەتیا مامۆستایان ژێ ناگریت، ھەروەسا ئیماژە بڤێ چەندێ کر، بەرھەڤیێن پڕۆژێ ئاکنجیبوونا مامۆستایێن دھۆکێ دوماھی ھاتیە و دەمەکێ نێزیک دێ شوقە بۆ مامۆستا ھێنە ئاڤاکرن.
ئەحمەد گەرمیانی، جێگرێ سەرۆکێ ئێکەتیا مامۆستایێن کوردستانێ بۆ رۆژناما ئەڤرۆ گۆت” ژ سەرجەمێ ١٢٠ ھزار مامۆستایێن ھەرێما کوردستانێ تنێ ٦٠ ھزار مامۆستایان ناسنامەیێن ئێکەتیا مامۆستایان نووکرینە و ئەڤێن دیژی ئابوونە نەدایە و نەبووینە ئەندام، ژبەرکو بەریا نوکە ئەندامبوون ل ئێکەتیا مامۆستایان ب شێوەیەکی بوو ب رێیا رێڤەبەرێ قوتابخانا ئابوونە ل ھەموو مامۆستایان دھاتنە وەرگرتن، بەلێ نوکە ئابوونە بۆ ھەیڤەکێ بوویە ھزار دینار و مامۆستا ب حەزا خوە دشێت ب بیت ئەندام و دشێت نەبیتە ئەندام، بەلێ ئەڤ ئابوونا ل مامۆستا دھێتە وەرگرتن ٧٠%ێ بۆ خزمەتا مامۆستایا دھێتە مەزاختن، ب تایبەتی ددەمێ نەخۆشیێ و کارێن پێدڤی ئەم ھاریکاریا مامۆستایان دکەین،ھەر مامۆستایەکێ نەبیتە ئەندام ئەڤە نەشێت مفاداربیت ژ خزمەتێن خانی و ھاریکاریێن ماددی”.
گەرمیانی گۆتژی” مە نڤیسارەکا فەرمی ئاراستەی سەرۆکایەتیا جڤاتا وەزیران و پارێزگەرێ دھۆکێ و لایەنێن پەیوەندیدارکریە، بۆ دەستپێکرنا پڕۆژێ ئاڤاکرنا شوقەیان بۆ مامۆستایێن دھۆکێ،بەری ھەیڤا رەمەزانێ وەرە مە بزاڤێن خورتکرینە پڕۆژە بھێتە دەستپێکرن،نوکە دەستەیا گشتیا وەبەرھینانێ نڤیسارەک بۆ وەبەرھینانا دھۆکێ ھنارتیە و داخوازا بۆ چوونا دوماھیێ ل دۆر پڕۆژێ مامۆستایان دکەت، دەمەکێ زۆری نێزیک دێ دەست ب ئاڤاکرنا شوقەیان بۆ مامۆستایێن دھۆکێ ھێتەکرن.
