نێچیرڤان بارزانی:پێدڤیه حوكمه‌تا ئیراقی قه‌ره‌بوویا كه‌سوكارێن قوربانیێن ئه‌نفالان بكه‌ت وهه‌رێم ژی زێده‌تر خزمه‌تا وان بكه‌ت
سه‌رۆكێ هه‌رێما كوردستانێ، نێچیرڤان بارزانی، ل سالیادا 34 یا ئه‌نفالێن به‌هدینان په‌یامه‌ك به‌لاڤكر وتێدا داخوازدكه‌ت هه‌موو بزاڤه‌ك بۆ ب جینوسایدنیاسینا ئه‌نفالان ل سه‌ر ئاستێ نێڤده‌وله‌تی بهێته دان، دبێژیت ژی، تاكه گه‌ره‌نتیا پاراستنا مافێن دستووری و ده‌ستكه‌فتان ئێكرێزیا ئالیێن سیاسی یه.
ده‌قێ په‌یاما نێچیرڤان بارزانی ب هه‌لكه‌فتا ئه‌نفالێن به‌هدینان دا:
ل ڤان رۆژان هه‌لكه‌فتا 34 سالیا تاوانا ئه‌نفالێن به‌هدینان ساخ دكه‌ین كو وه‌كو دووماهی قۆناغا ئه‌نفالان ل 25 ئاب هه‌تا 6 ئیلۆنا 1988 له‌شكرێ وی ده‌می یێ ئیراقێ دژی پێكهاتێن جودا جودا یێن خه‌لكێ به‌هدینان ئه‌نجامدای. سه‌رێ رێز بۆ گیانێ پاقژێ شه‌هیدان دچه‌مینین و ب شكۆڤه بیرئینانا وان دكه‌ین، سلاڤ و رێز بۆ خێزان و كه‌سوكارێن وان دهنێرین.
تاوانا ئه‌نفالێ كو هه‌ر ژ گه‌میان هه‌تا دووماهی قوناغ ل به‌هدینان (182) هزار وه‌لاتیێن بێتاوانێن كوردستانێ تێدا بوونه قوربانی وهاتنه شه‌هیدكرن، وه‌كو دادگه‌ها بلند یا تاوان ل ئیراقێ دانپێدان پێ كری، جینۆساید و تاوانا شه‌ری و تاوانا دژی مرۆڤایه‌تیێ یه، له‌وما پێدڤیه هه‌ر چ زوویه حوكمه‌تا فیدرالی یا ئیراقی قه‌ره‌بوویا كه‌سوكارێن قوربانیان بكه‌ت. ل هه‌رێما كوردستانێ ژی پێدڤیه خزمه‌تا زێده‌تر یا كه‌سوكارێن قوربانیان بهێته كرن و ل گه‌ل ب دوگیومێنتكرنا واتانێ، هه‌موو بزاڤه‌ك بهێته كرن بۆ وێ چه‌ندێ ل سه‌ر ئاستێ نێڤده‌وله‌تی وه‌كو جینۆساید بهێته نیاسین.
ب ڤێ هه‌لكه‌فتێ دووپاتیێ ل ئێكرێزیا ئالیێن سیاسی و پێكهاته‌یێن هه‌رێما كوردستانێ دكه‌ین كو تاكه گه‌ره‌نتیا پاراستنا مافێن دستووری و ده‌ستكه‌فتێن هه‌رێما كوردستانێ و پاشه‌رۆژه‌كا باشتر یا نڤشیێن مه‌یه، هه‌ر ئه‌وژی دێ رێگر بیت ل دووباره‌بوونا وان تاوانێن ب درێژیا دیرۆكێ دژی پێكهاته‌یان و ئاخ و ئاڤ و هه‌وا و شروشت و ژینگه‌ها كوردستانێ هاتینه كرن.
بیرئینانا شه‌هیدان به‌رده‌وام یا بلند و شكۆدار بیت، سوپاس و رێز و پێزانین بۆ جوامێریا خه‌لكێ هه‌ولێرێ و به‌حركێ و ده‌وروبه‌رێن وان كو ل كه‌مپا ب زۆر یا جێژنیكان د هاوارا لێقه‌ومایێن به‌هدینان چووین و هاریكاریا وان كری. میهره‌بانی ومرۆڤپه‌روه‌ریا وان چ جاران ناهێته بیركرن.
